شالعايداعى اۋىلدا ءبىر جۇكتى ايەل جەسىر قالىپتى. ولگەننىڭ ارتىنان ولمەك جوق، كۇن كورۋ كەرەك. تاۋدان وتىن جارىپ، مالىنا ءشوپ تاسىپ، تاماعىن تاۋىپ جۇرەدى. ءبىر كۇنى ادەتتەگىدەي قىرعا شىعادى، سوندا جارالى اق كۇزەنگە كەزىگەدى. (كۇزەن – تىشقاننىڭ تۇقىمداسى.) ونى ەمدەپ، وزىنە سەرىك ەتىپ اسىراپ الادى.

اق كۇزەن جاراسىن جازعان يەسىنە بارىنشا ادال بولىپتى. باۋىرمالدىعى سول، جۇكتى ايەلدىڭ جانىنان ءبىر ەلى اجىراماپتى. ءۇي جانۋارى ەمەس، ايدالادان كەلگەن دالا حايۋانى بولسا دا، ادامنىڭ ءتىلىن ايتقىزباي تۇسىنەتىن تىلالعىش-تىن. ايى-كۇنى جەتىپ، ايەل بوسانادى. تىرەۋى جوق جەسىردىڭ ۋايىمى دا، تىرلىگى دە، ەڭبەگى دە ەكى ەسەلەنەدى. بالاسىن جالعىز اسىراپ-باعۋعا تۋرا كەلەدى. ناپاقاسىن تابۋعا تىسقا شىققاندا نارەستەنى اق كۇزەنمەن بىرگە قالدىرىپ كەتەتىن بولادى. كۇندەردىڭ كۇنىندە ادەپكى ارەكەتىمەن تاۋعا تارتادى. جيعان-تەرگەنىن قولتىقتاپ قايتادى. ءۇي ماڭىنا جاقىنداي بەرە اق تەرىسى قىزاراڭداعان كۇزەندى كوزى شالادى. يىعىنداعىن تاستاي سالا اق كۇزەنگە تاقايدى. اۋزى-باسى قىزىل قانعا بويالعان اق كۇزەندى كورگەندە جۇرەگى تاس توبەسىنە شىعىپ، اھ ۇرىپ، وعان باس سالادى. اقىرى ءولتىرىپ تىنادى. سول ساتتە ءۇي ىشىنەن شارانا شىر ەتەدى. اپتىعىپ كىرىپ بارعاندا بەسىكتىڭ جانىنا جەتەر جەردە پارشالانىپ جاتقان جىلاندى كورەدى...

وسى وقيعا تۋرا ءبىزدىڭ قازاق قوعامىنىڭ كۇيى سەكىلدى. ءبىر-ءبىرىنىڭ القىمىنان الىپ جاتقان بىرەۋ. سوتتايمىز، قامايمىز، ۇرامىز، جىعامىز، شالامىز. جوق قىپ جىبەرۋگە جانىمىزدى سالامىز. ونىڭ وسى ۋاقىتقا دەيىنگى ادالدىعىنا بويلاپ بولمايىز، ءىسى مەن ساي كەلگەن ءسوزىن ساراپتامايمىز. «ءبۇلىندى» دەيمىز، «نەگە ءبۇلىندى؟» دەمەيمىز. ەڭ وكىنىشتىسى، قاي زاماندا دا سونىڭ ءبارىن سىرتتان سىعالاعان بىرەۋ ىستەمەدى، ءوزىمىز.

دارحان دالادان كەلىپ، تالابى تاۋداي تىرشىلىككە كوندىگىپ، كوپكە قىزمەت قىلىپ، قىم-قۋىتتا قازاقتى قورعايمىن دەپ قولىن مالىپ اپ يەسىنە بىلعانىشتى بوپ قالعان اق كۇزەندەرىم-اي!

ابايدى ساباپ، ءبىرجاندى ارقانمەن قازىققا قارماپ، ىرىلەرىن سىبىرگە ايداپ، كىلكىگەن قايماعىن وتىز جەتىدە قىرىپ، جەلتوقساندا جەر جاستاندىرىپ، جاردان جىعۋدى سارى الماسقا، زامانبەككە، التىنبەككە، س. ىبىرايعا جالعاعان قوعامعا س. احمەتوۆ، تالعات پەن ايان، ت. جامانقۇلوۆ، ج. ماماي بوپ جەتىپ، قىزىل-قارا قانعا بويالعان اق كۇزەندەرىم-اي!

سولاردىڭ اۋپىرىمدەپ بويعا ءبىتىپ، ايداي تولىپ، كۇندە تۋىپ، بۋىنى بەكىپ كەلە جاتقان شارانا-رۋحتى وعان قاس قىلعان اجداھالاردان قورعاعانىن بىلە مە، سو جۇرت؟ اقيقاتىن اڭداعاندا تىم كەش بولعانىن، بولاتىنىن سەزە مە سو كوپ؟...

...

مىنا جەردە اتى اتالعانداردىڭ، قالىس قالعانداردىڭ فوتولارى ءتىزىلىپ تۇر دەپ ساناي سالىڭىزدار. تەلەارنادا رەجيسسەردىڭ، جۋرنالدا ديزاينەردىڭ، گازەتتە ءفوتوتىلشىنىڭ قىزمەتىن پايدالانۋ ميىنا ءسىڭىپ قالعان ادامعا قيىن ەكەن عوي.

ايدانا شوتبايقىزى

Facebook-تەگى پاراقشاسىنان