سايت پەن الەۋمەتتىك جەلىلەردى قاراپ وتىرسام، تەك الماتى مەن الماتى وبلىسىندا تۇراتىن ادامدار بۇگىنگى جەر سىلكىنىسىنەن كەيىنگى ۇرەي قۇشاعىنا ورانعان سەزىمدەرىمەن ءبولىسىپ جاتىر. بىرەۋ «ءبىسمىللاسىن» ايتىپ، «قۇداي ساقتاسىن» دەپ جاتىر. ەكىنشىسى، «ومىرىمدە ءبىرىنشى رەت وسىنداي قورقىنىشتى ءساتتى باستان كەشىپ وتىرمىن» دەپتى. بىراق ءدال وسى ۋاقىتتا استانادا بولعان جەر سىلكىنىسى تۋرالى اقپاراتتى كوزىم شالمادى.

تاڭعى 5-تەن وتە تاڭ نامازىن وتەپ، قايتادان جاتا بەرگەنىمىز سول ەدى، اسپاشام سىقىرلاپ، تىلەنديەۆا كوشەسىندەگى №36-ىنشى 14 قاباتتى ءۇي كادىمگىدەي تەڭسەلدى، تەربەلدى. اسپاشامعا قاراپ، 2-3 بالل بار-اۋ دەپ شامالادىق. بەينەكامەراعا ءتۇسىرۋ بىلاي تۇرسىن، سىقىرلاعان شامعا قاراۋدىڭ ءوزى قورقىنىشتى. ءتىل كاليما-ءشاھادات ايتۋدان (وعان دا شۇكىر) تىنبادى: «ءاشھادۋ ءانلا ءيلاھا يللاللا ءۋا ءاشھادۋ ءاننا ءمۇحاممادان ابدۋھۋ ءۋا راسۋلۋھۋ (اللادان باسقا عيبادات ەتۋگە لايىقتى جاراتۋشىنىڭ جوقتىعىنا جانە مۇحاممەد ونىڭ سوڭعى پايعامبارى ەكەندىگىنە ءشاھادات (كۋالىك) ەتەمىن).

ءبىر كەزدە توقتاعانداي بولدى، بىرەر سەكۋندتان كەيىن اسپاشام تاعى سىقىرلاپ، بويى سورايعان سارى ءۇي تەڭسەلىپ قويا بەردى. وي دەگەن جۇيرىك ەمەس پە، شىركىن؟! «بالالاردى دالاعا الىپ شىعايىن با؟ بىراق لەزدە 12-ءىنشى قاباتتان بىردەن قايدا شىعىپ ۇلگەرەم؟... ۇلكەن باعاننىڭ استىنا تىعىلايىق پا؟ ودان امان قالۋىمىزعا كىم كەپىل؟ اللانىڭ ءوزى جارىلقاسىن! ناماز وقىلدى، دارەت بار... قۇدايدان ءۇمىت بار»، – دەگەن ويلاردان كەيىن شاراسىز جاعدايىمىزدى جاراتۋشىنىڭ وزىنە تاپسىردىق.

تاۋبەمىزگە كەلتىرگەن تاڭعى جەر سىلكىنىسى ۇيقىمىزدى قاشىرىپ، ءبىراز ويلاندىرىپ تاستادى:

- اللانىڭ سىناعىنان كەيىن ەڭ اۋەلى ونىڭ وزىنەن عانا پانا سۇراۋدى ۇمىتىپ كەتەدى ەكەنبىز. وزىڭشە قۇتىلۋدىڭ جولىن «قاراستىراسىڭ...» بىراق قولىڭنان تۇك كەلمەيتىنىن امالسىز مويىندايسىڭ.

- بولماشى قاس قاعىم ساتتە وسى كۇنگە دەيىن جىبەرىپ العان كەمشىلىكتەرىڭ مەن قاتەلىكتەرىڭ، ودان قالدى كۇنالارىڭ كوز الدىڭنان الما-كەزەك وتەدى ەكەن. سونى قاتتى ۋايىمداپ كەتەسىڭ.

- قوعامدا كۇنالى ىستەر كوبەيسە، اللانىڭ ءبىز ولشەپ، بولجاپ بىلە بەرمەيتىن ۇلكەندى-كىشى ازابى جەتەتىنىن تۇسىنەسىڭ. كەزىندە قيىن كۇيگە دۋشار بولعان قاۋىمداردى ەرىكسىز ەسكە ءتۇسىرىپ، ولاردان عيبرات الاسىڭ.

- كوپ جاعدايدا تاڭ قىلاۋ بەرگەن ساتتە جەر دۇمپۋلەرى تىركەلەدى. بۇل ۋاقىتتا قانشاما پەندە شىرت ۇيقىدا جاتادى. قۇلدىڭ وسى ءبىر وتە ءالسىز، بەيشارا حالدەگى كورىنىسىن ەلەستەتىپ كورىڭىز. تاڭ نامازىن جىبەرىپ العان كەزدەردى ەسكە العاندا ودان سايىن وكىنەسىڭ.

- جەر سىلكىنىسى اقتىق ساپارعا قانشالىقتى دايىن ەكەندىگىڭدى الدىن الا سىناپ كورەتىندەي. مۇندايدا بالا-شاعا، اعايىن-تۋىس، مال-مۇلىك، جۇمىس ءبارىن سىرىپ قويىپ، يماني حالىڭمەن جالعىز قالاسىڭ... ويلاناتىن وقيعا...

اعابەك قوناربايۇلى، قازاقستان مۇسىلماندارى ءدىني باسقارماسى ءباسپاسوز ءبولىمىنىڭ مەڭگەرۋشىسى

Abai.kz