ەير-استانا ۇشاعىنداعى جولسەرىكتەن مەملەكەتتىك ءتىلدى تالاپ ەتكەنى ءۇشىن تۇرىك ءتىلشىسى وعىز دوعاندى پوليتسەي ۇستاپ اكەتتى، - دەپ حابارلايدى اباي-اقپارات. قازاق مەملەكەتىندە قازاق تىلىندە قىزمەت كورسەتۋدى سۇراعان شەتەل ازاماتىنا 6800 تەڭگە ايىپپۇل سالىنعان.

ەير-استانا ۇشاعى بىرىنشىدەن، حالىقارالىق دارەجەدەگى ءتىلشىنىڭ الدىندا مەملەكەتتىڭ ابىرويىن ايرانداي توكتى. ويتكەنى، وعىز دوعان الەۋمەتتىك جەلىدە تاراتقان ۆيدەوسىندا كومپانيا قىزمەتكەرلەرىنىڭ ءبىر اۋىز ءسوز قازاقشا بىلمەيتىنى انىق كورىنىپ تۇر. بۇل قىزمەتكەرلەر ەير-استانا كومپانياسىنا قالاي قىزمەتكە قابىلدانعان؟ مەملەكەتتىك تىلدەن ەمتيحان تاپسىرعان با؟ تاپسىرسا، نەلىكتەن تالاپ ەتىلگەن كەزدە قازاقشا سويلەمەيدى؟

ەكىنشىدەن، تۇرىك ازاماتىنىڭ قازاق ءتىلىن تالاپ ەتۋى ءبىزدىڭ قوعامدىق ساناعا ۇلكەن سوققى بولىپ تيۋگە ءتيىس. قازاقستاننىڭ كەيبىر كەرتارتپا ازاماتتارى قاساقانا ۇيرەنبەي جۇرگەن ءتىلىمىزدى وزگە ەلدىڭ ازاماتى بىلەدى. دەمەك، وعىز دوعان - مەملەكەتتىڭ دوسى. ەير-استانا ەلباسىنىڭ تاپسىرماسىنان باس تارتىپ، اتا-زاڭىمىزدا جازىلعان زاڭداردى اياق استى ەتىپ وتىرعاندىقتان - مەملەكەتتىڭ جاۋى. بۇل ەموتسياسىز ايتىلعان ءسوز. ەگەر دە تۇرىك جۋرناليسىنە كومپانيا قىزمەتكەرى قازاقشا سويلەگەن بولسا، ونىڭ ۆيدەو-جازباسىن جاريالاسىن. سوسىن، تىلشىمەن تىلدەسكەن كومپانيا قىزمەتكەرى بۇكىل جۇرتشىلىقتىڭ الدىنا شىعىپ، ەڭ ازى بەس مينۋت مەملەكەتتىك تىلدە ءوز ويىن ايتسىن. ەگەر دە بەس مينۋت مەملەكەتتىك تىلدە سويلەي الماسا، وسىنداي قىزمەتكەردى قىزمەتكە العانى ءۇشىن ەير-استانا زاڭ الدىندا جاۋاپ بەرۋىن تالاپ ەتەتىن بولامىز.

ۇشىنشىدەن، Oğuz Doğan ءوزىنىڭ الەۋمەتتىك جەلىدەگى پاراقشاسىندا جولسەرىكتەن قازاقشا سويلەۋدى تالاپ ەتكەنى ءۇشىن ونى پوليتسيا ۇشاقتان ءتۇسىرىپ العانىن جانە 6800 تەڭگە ايىپپۇل سالعانىن جازدى. شەتەل ازاماتىنا ءبىزدىڭ مەملەكەتتىك ءتىلدى بىلگەنى ءۇشىن ايىپپۇل سالعىزۋى - بۇكىل قازاق ۇلتىنىڭ، جالپى قازاقستاندىقتاردىڭ مۇددەسىن ەسكەرمەۋ دەپ ءبىلۋ قاجەت. ەلدىڭ مۇددەسىمەن ساناسپايتىن كومپانيا جۇمىسىن توقتاتۋ كەرەك.

نۇرگەلدى ابدىعانيۇلى

Abai.kz