بۇگىن استاناداعى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قر پرەزيدەنتى اكىمشىلىگىنىڭ باسشىسى – ۇلتتىق كوميسسيانىڭ توراعاسى ءا.جاقسىبەكوۆتىڭ توراعالىق ەتۋىمەن  قازاقستان رەسپۋبليكاسى پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ ءۇشىنشى وتىرىسى ءوتتى.

وتىرىس باستالعانعا دەيىن كوميسسيا مۇشەلەرى «رۋحاني جاڭعىرۋ» باعدارلاماسىن باسقارۋ جونىندەگى كەڭسەنىڭ (جوبالىق كەڭسە) جانە ونىڭ جانىندا جۇمىس ىستەيتىن كوممۋنيكاتسيالىق ورتالىقتىڭ قىزمەتىمەن تانىستى.

جوبالىق كەڭسە «رۋحاني جاڭعىرۋ» باعدارلاماسىنىڭ بارلىق باعىتتارى بويىنشا كۇللى ورتالىق جانە جەرگىلىكتى اتقارۋشى ورگانداردىڭ قىزمەتىن ۇيلەستىرۋدى قامتاماسىز ەتەدى.

جۇمىسىن باستاعاننان بەرى جوبالىق كەڭسە مينيسترلىكتەر مەن اكىمدىكتەر ۇسىنعان 1170 جوبانى پىسىقتادى، قازىر ولار جۇزەگە اسىرىلا باستالدى.

وتىرىستا ۇلتتىق كوميسسيا مۇشەلەرى «رۋحاني جاڭعىرۋ» باعدارلاماسىن ىسكە اسىرۋ بارىسىن قارادى. اقتوبە جانە شىعىس قازاقستان وبلىستارىنىڭ اكىمدەرى مەن جۇمىس توپتارىنىڭ جەتەكشىلەرى اتقارىلعان جۇمىستار جونىندە ەسەپ بەردى.

جالپى العاندا، قازاق ءتىلىن لاتىن الىپبيىنە كوشىرۋ جوباسى بويىنشا ءتيىستى جۇمىس توبى الداعى كۇزدە جاڭا ءالىپبيدىڭ نۇسقاسىن قاراۋعا ۇسىناتىن بولادى.

ساراپشىلار «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا گۋمانيتارلىق پاندەر بويىنشا 17 وقۋلىقتىڭ ءتىزىمىن جاسادى. باعدارلامانىڭ اياسىندا قۇرىلعان ۇلتتىق اۋدارما بيۋروسى ولاردى اۋدارۋعا كىرىستى.

«قازاقستاننىڭ كيەلى جەرلەرىنىڭ گەوگرافياسى» جوباسى بويىنشا رەسپۋبليكالىق دەڭگەيدەگى 100 جانە وڭىرلىك دەڭگەيدەگى 500 كيەلى نىسان ىرىكتەلىپ الىندى.

«جاھانداعى زاماناۋي قازاقستاندىق مادەنيەت» جوباسى بويىنشا ۇزدىك تۋىندىلاردىڭ ءتىزىمى جاسالدى.

وعان ادەبيەت سالاسىنداعى 216, «تەاتر، كينو جانە حورەوگرافيا» جانرىنداعى 48, بەينەلەۋ ونەرى بويىنشا 182 جانە مۋزىكا سالاسىنداعى 200-دەن استام شىعارما ەنگىزىلدى.

تۋىندىلاردى الدىن-الا ىرىكتەۋ قوعامدىق تالقىلاۋدى ەسكەرە وتىرىپ جاسالادى. ودان كەيىن ءتىزىم ونىڭ ىرىكتەۋ تالاپتارىنا سايكەستىگىن ساراپتاۋ ءۇشىن ساراپتامالىق توپتارعا ۇسىنىلادى.

«قازاقستانداعى 100 جاڭا ەسىم» جوباسىنا 1500 ءوتىنىم كەلىپ ءتۇستى، ولاردان ءارى قاراي اشىق داۋىس بەرۋگە ۇسىنىلاتىن ارالىق پۋلدار تۇزىلەتىن بولادى.

ۇلتتىق كوميسسيا قازاقستان رەسپۋبليكاسى پرەزيدەنتىنىڭ جارلىعىمەن قوعامدىق سانانى جاڭعىرتۋ باعدارلاماسىن جۇزەگە اسىرۋ، ەلدىڭ ءارى قاراي دا دايەكتى تۇردە مادەني-گۋمانيتارلىق دامۋىن قامتاماسىز ەتۋ ماقساتىندا قۇرىلعان بولاتىن.

كوميسسيا قۇرامىندا تانىمال قوعام قايراتكەرلەرى، عالىمدار، جازۋشىلار، جۋرناليستەر، پارلامەنت دەپۋتاتتارى، پرەزيدەنت اكىمشىلىگىنىڭ وكىلدەرى، ۇكىمەت مۇشەلەرى، وڭىرلەر مەن استانا، الماتى قالالارىنىڭ اكىمدەرى، قازاقستان حالقى اسسامبلەياسىنىڭ مۇشەلەرى جانە ساياسي پارتيالاردىڭ وكىلدەرى بار.

Abai.kz