قادىرلى نۇرسۇلتان ءابىشۇلى!

ەگەمەن ەلىمىزدىڭ قۇقىقتىق ىرگەتاسى – كونستيتۋتسيا كۇنىنە وراي وزىڭىزگە جولداپ وتىرعان  شىنايى  قۇتتىقتاۋىمىزدى قابىل الىڭىز!

اتا زاڭىمىز الەۋمەتتىك تەگىنە، تابىنا، جاسىنا قاراماي رەسپۋبليكا ازاماتتارىنىڭ بارلىعىنا تەڭ قۇقىق بەرەدى. دەگەنمەن، وسى كونستيتۋتسيالىق قۇقىقتاردىڭ بۇزىلاتىن تۇستارى دا بار. ءبىر توپ اتا-انانىڭ سىزگە ۇسىنىلىپ  وتىرعان حاتىنداعى اششى اقيقاتقا كوڭىل ءبولىپ، ەلباسىمىز سەنگەن ەلىمىزدىڭ ەرتەڭى – جاستاردىڭ ورىندى تالاپ-تىلەگىنىڭ ءادىل شەشىمىن تابۋىنا ىقپال ەتۋىڭىزدى وتىنەمىز.

رەسپۋبليكالىق «قازاق ءۇنى» گازەتى  رەداكتسياسى

 قازاقستان

رەسپۋبليكاسىنىڭ

پرەزيدەنتى

ن.ءا.نازارباەۆقا

قادىرلى نۇرسۇلتان ءابىشۇلى!

ءار ازاماتتىڭ قۇقىن قورعايتىن كونستيتۋتسيا كۇنى وزىڭىزگە اشىق حات جولداۋعا ءماجبۇر بولىپ وتىرمىز.

ۇستىمىزدەگى جىلى مەملەكەتتىك ءبىلىم گرانتتارىن بولۋدە  جاڭساقتىقتارعا جول بەرىلىپ، بۇقارالىق اقپارات قۇرالدارىندا قوعامدىق پىكىر بوي كوتەردى. وسىدان كەيىن ءبىلىم جانە عىلىم مينيسترلىگى تاراپىنان دەرەۋ تۇزەتۋ ەنگىزىلدى. دەگەنمەن، 5ۆ042100 «ديزاين» ماماندىعى بويىنشا باسپاسوزدە جاريالانعان ەكى تىزىمدەگى ۇمىتكەرلەر سانى ءتۇرلى ساۋالدارمەن قاتار كۇمان مەن كۇدىك تە تۋعىزىپ وتىر.

«ديزاين» ماماندىعى بويىنشا 10-تامىز كۇنگى تىزىمدە گرانت يەلەنگەن 16 تالاپكەردىڭ اتى-ءجونى بەرىلسە، ال 14-تامىزداعى تىزىمدە 30 تالاپكەر كورسەتىلگەن. سوندا گرانت سانى اياق استىنان قالاي كوبەيىپ كەتكەن؟ ەكىنشى تىزىمدە بىرىنشىدەگى 16 ۇمىتكەردىڭ 7-ءى الىنىپ تاستالىنىپ، جاڭادان 21 تالاپكەر قوسىلعان.  جوعارى ناتيجەلەرى بار 21 تالاپكەر قانداي نەگىزدە، قايدان الىنعان؟ ويتكەنى، ەرەجە بويىنشا، 7 تامىز بەن 13 تامىز ارالىعىندا  بۇل ماماندىق بويىنشا تالاپكەرلەر مىندەتتى تۇردە شىعارماشىلىق ەمتيحاننان ءوتىپ، ولاردىڭ ناتيجەلەرى بىردەن ينتەرنەت ارقىلى مينيسترلىككە جىبەرىلەدى.

سوندا جوعارىداعى جاڭا قوسىلعان تالاپكەرلەر قاي جەردە، قاشان شىعارماشىلىق ەمتيحان تاپسىرعان؟ ومىرلىك شىندىق كورسەتىپ كەلە جاتقانداي، ىلۋدە بىرەۋى بولماسا، ونەرگە وتە جاقىن تالاپكەرلەردىڭ ۇبت-داعى كورسەتكىشتەرى اسا جوعارى بولا بەرمەيدى. مۇنى ءبىز ولاردىڭ ناقتى پاندەردەن گورى شىعارماشىلىق ىزدەنىستەرگە كوبىرەك دەن قوياتىندىعىنان دەپ تۇسىنەمىز.

اتا-انالاردى دا، ۇستازداردى دا، تالاپكەرلەردى دە  تاڭ قالدىرعانى-وسى ەكى تىزىمدە دە تمد-دا ەكىنشى، قازاقستاندا كوش باسىندا تۇرعان ءال-فارابي اتىنداعى قازۇۋ-گە  قۇجات تاپسىرىپ، شىعارماشىلىق ەمتيحانداردان جوعارى ناتيجە كورسەتكەن بىردە-ءبىر تۇلەكتىڭ بولماۋى.  مىسالى،

گۋرلەنباەۆا دينارا نىسانعاليقىزى – 118 بالل،

نۇرجانوۆا سابينا – 117 بالل،

ماشەكوۆا ايىم – 117 بالل،

جارىلقاسىن قانىش – 116 بالل

جيناعان ەدى.

وسىنداي ونەرلى جاستارعا مەملەكەت تاراپىنان بىردە ءبىر ءبىلىم گرانتىنىڭ بولىنبەۋى قولدان جاسالعان قيانات دەپ تۇسىنەمىز.

قاراپ وتىرساق،     «ديزاين» ماماندىعى بويىنشا 12 گرانت ل. گۋميلەۆ اتىنداعى ەۆرازيا ۇلتتىق ۋنيۆەرسيتەتىنە، 5 گرانت م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنە، 3 گرانت ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنە، 2 گرانت ا.ياسساۋي اتىنداعى حالىقارالىق قازاق–تۇرىك ۋنيۆەرسيتەتىنە، 1 گرانت ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنە، 1 گرانت م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنە، 1 گرانت م.ح. دۋلاتي اتىنداعى تاراز مەملەكەتتىك ۋنيۆەرسيتەتىنە، 1 گرانت وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنە، 1 گرانت الماتى تەحنولوگيالىق ۋنيۆەرسيتەتىنە، 1 گرانت ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنە ءبولىنىپتى. ەڭ قىزىعى جوعارىداعى اتالعان وقۋ ورىندارىنا 118 باللمەن 10 تۇلەك وتكەن، قالعان 20-سى – 119 جانە 120 بالل. 120-دان جوعارى كورسەتكىش جوق، سوندا بۇل بىرىڭعاي ۇزدىك وقۋشىلار ديزاين ماماندىعىنا قاي مەكتەپتەردەن كەلگەن؟ ال، ءال-فارابي اتىنداعى قازاق ۇلتتىق ۋنيۆەرسيتەتىنە تاپسىرىپ،  جوعارى بالل جيناعان تالاپكەرلەرگە گرانت نەگە بولىنبەگەن؟

         قادىرلى نۇرسۇلتان ءابىشۇلى!

جوعارىداعى ماسەلەلەردى انىق-قانىعىن ايقىنداۋعا، ءال-فارابي اتىنداعى قازاق ۇلتتىق ۋنيۆەرسيتەتىنە ەلىمىز بويىنشا ءبىر-اق جەردە دايارلاناتىن باق ديزاينى ماماندىعىنا مەملەكەتتىك گرانت بولۋگە ءوز تاراپىڭىزدان قامقورلىق كورسەتۋىڭىزدى  سۇرايمىز.

وزىڭىزگە دەگەن زور قۇرمەتپەن،

تالاپكەرلەردىڭ اتا-انالارى:

نازارباەۆا ناتاليا،

ابدۋللاەۆ اديلجان،

مارداەۆا قاراگوز،

مولداشەۆا گۇلميرا،

الدابەرگەنوۆ باحتيار

جانە ت.ب.

دەرەككوزى: qazaquni.kz