تۇلەن تۇرتكەن توڭىرەكتى قاراپ وتىرىپ كەيدە ەلىمىزدەگى ىنتىماق-بىرلىككە، تىنىشتىققا ءتاۋ ەتەسىڭ. ءتاۋ ەتەتىن سەبەبىمىز: اناۋ – سيرياداعى سۇرگىن، ۋكرايناداعى ۇرىستار. قاراپ وتىرساق، سيرياداعى جۇرت ءتۇبى ءبىر دىنقارىنداس ەل. سول ەلدى بيلىكتى قولدان بەرگىسى كەلمەيتىن كۇشتەر مەن وعان قارسى كۇشتەر الەككە سالىپ، الا تايداي ءبۇلدىرىپ بولدى. ال، ۋكرايناداعى جاعدايعا كەلسەك، ونىڭ سۇمدىقتىعى جانىڭدى تۇرشىكتىرەدى. نەگە دەسەڭىز، ۋكراينانىڭ شىعىسىنداعى ورىستار جىكىشىلدىك تۋدىرىپ، وزدەرى تۇرىپ جاتقان ەلدىڭ جەرىن جىرىپ اكەتپەككە ارەكەت ەتىپ باعۋدا. ولاردىڭ بۇلىگىن كرەمل قولداپ وتىر. قۇداي ساقتاسىن، قازاقستاننىڭ بەس وبلىسى رەسەيگە تيەسىلى دەگەندى قوڭىرسىتىپ قوياتىن رەسەي ساياساتكەرلەرى ۋكراين حالقىنىڭ باسىنداعى بۇلتتى الدىمەن ءبىزدىڭ باسىمىزعا ۇيىرۋگە قۇلشىنىپ ەدى. سونداي قىسىلتاياڭنان ءبىز ءوزىمىزدىڭ كەڭدىگىمىزدىڭ، ءوزارا بەك تۇسىنىستىگىمىزدىڭ ناتيجەسىندە شىعىپ كەلەمىز. بۇل رەتتە، ارينە، ەلباسىمىزدىڭ ەڭبەگىن  ەرەكشە اتاماسقا امالىمىز كەم.

قازاقستانداعى ۇلتتار دوستىعىن كوزبەن كورىپ، جۇرەكپەن سەزىپ جۇرگەندەردىڭ ءبىرى مەنمىن. كوڭىلى دالاداي دارقان قازاق حالقى قازىر بارلىق ۇلت وكىلدەرىن ءوزىنىڭ تۋعان-تۋىسىنداي كورەدى. دياسپورالار قازاقتىڭ بولىنبەيتىن قاۋىم-تايپاسىنا ەجەلدەن اينالىپ كەتكەندەي. جەر شارىنداعى افريكا قۇرلىعىنداعى ناسىلدەن باسقا بارلىق ۇلت قازاقستاندا جاساپ، ءومىر ءسۇرىپ جاتىر. ءبىر ەلدە جۇزدەن اسا ۇلت وكىلدەرىنىڭ تاتۋ-ءتاتتى بولىپ داۋلاسپاي، جاۋلاسپاي ءومىر ءسۇرىپ جاتقانى بۇرىن-سوڭدى تاريحتا بولماعان جاعداي. ويتكەنى، حالىقتار دوستىعى ءبىزدىڭ ساياساتتىڭ باستى ۇستانىمى. كورشى مەملەكەتتەردەگى ۇلتارالىق داۋ-جانجالدى جانە رەسەي مەن ۋكراينا اراسىنداعى قانتوگىستى اقپارات قۇرالدارىنان ەستىپ، كورگەندە مامىراجاي تىنىشتىقتاعى قازاقستان جۇماقتى ەلەستەتەدى. ۇلتارالىق، دىنارالىق قاقتىعىس، سوعىستان كەيبىر مەملەكەتتەردىڭ جويىلىپ كەتكەنىن تاريح دالەلدەدى. سوندىقتان، ءبىز ۇلتتاردىڭ دوستىعى مەن بىرلىگىنە قۋانامىز.

تاۋەلسىزدىك العان العاشقى جىلدارى كەيبىر مىسىقتىلەۋ ساياساتكەرلەر «قازاقستان كوپۇلتتىلىعىنان تۇبىندە كۇيرەيتىن ەل» دەگەن سىڭايلى پىكىرلەر ايتىپ، ۇرەيلەندىرگەن بولاتىن. ال، كەرىسىنشە قازاقستاندا ۇلتارالىق دوستىق پەن كەلىسىم ورناپ ەڭ بەيبىت ەل دەگەن اتاققا يە بولدى. كەڭەستىك داۋىردەن باستالعان، ينتەرناتسيونالدىق تاربيە مەن يدەيا قازىر جاڭاشا جاڭعىرىپ، «قازاقستان ۇلتتار لابوراتورياسى» بۇل كۇندە، ءتىپتى، وزگەشە ءبىر ۇلتتار دوستىعىنىڭ «برەندىنە» اينالدى دەسەم قاتەلەسپەيمىن. مەن ءوزىم تاربيە مەكەمەسىندە ەڭبەك ەتكەندىكتەن ۇلتتار دوستىعى تاربيەسىنە قاتتى كوڭىل بولەمىن. باسشىلىق جاسايتىن كوللەدجىمدە ءبىراز ۇلت وكىلدەرى قىزمەت ەتەدى. دياسپورالاردىڭ دا بالالارى بار.

سقاق مولدالىمۇلى،

كوللەدج ديرەكتورى

Abai.kz