سەرىك احمەتوۆ بوستاندىققا شىعادى. ەلدىڭ ەكس-پرەمەر-ءمينيسترى سەرىك نىعمەتۇلى احمەتوۆ 21-قىركۇيەكتە اباقتىدان شىعارىلادى، دەپ جازدى "Today.kz" سايتى.

شەشىم 21-قىركۇيەك كۇنى كۇشىنە ەنەدى ەكەن. وسىدان كەيىن ەكس-پرەمەر اباقتىدان بوسايدى. بوسايدى دەگەنمەن، جازاسىن قاراعاندى وبلىسىندا وتەيتىن بولادى. سەبەبى، سەرىك احمەتوۆكە كەسىلگەن جازانىڭ تولىق مەرزىمى اياقتالماعان. ءالى 4 جىل 26 كۇن  بار. مىنە، سول 4 جىل، جارتى ايدى سەكەڭ ەلىندە، ۇيىندە جاتىپ وتەيتىن بولادى.

سەكەڭ تۇرمەدە ءتارتىپتى بولىپتى. ءتورت بىردەي ماقتاۋ قاعاز الىپتى. ءسويتىپ، ءوزى جازاسىن وتەگەن 159/18 كولونياسىندا ءوزىن جاقسى قىرىنان كورسەتىپ، كوزگە تۇسكەن. راقىمشىلىقا ىلىنگەن. ونىڭ ۇستىنە سەرىك نىعمەتۇلى مەملەكەتكە كەلتىرگەن  شىعىندى تولىق وتەگەن ەكەن.

ايتا كەتەيىك، 1 ءساۋىر كۇنى اۋداندىق سوت قاراعاندى اكىمىنىڭ ارىزى بويىنشا احمەتوۆ باستاعان 5 بۇرىنعى شەنەۋنىككە قاتىستى ۇكىم شىعارعان. ۇكىم بويىنشا ماتەريالدىق شىعىن ەسەبىندە 17 ميلليون 310 مىڭ تەڭگەنى بيۋدجەتكە قايتارۋ مىندەتتەلگەن.

ال 2017 جىلدىڭ 29-ساۋىرىندە احمەتوۆ جانە 4 ەكس-شەنەۋنىك اپپەلياتسيالىق شاعىم تۇسىرگەن. ول شاعىم قاناعاتتاندىرىلعان جوق.

اۋەلدە سوت احمەتوۆكە 10 جىل جازا كەسكەن بولاتىن. بۇل 2015 جىلى بولعان. 2016 جىلدىڭ ناۋرىزىندا قاراعاندى وبلىستىڭ سوتىنىڭ  اپپەلياتسيا القاسى سەرىك نىعمەتۇلىنىڭ جازاسىن 8 جىلعا قىسقارتقان ەدى.

ءىلياس اقباي

Abai.kz