رەسەيدە سايلاۋعا داۋىس بەرۋشىلەر سانى وتە از بولعان
رەسەيدىڭ ورتالىق سايلاۋ كوميسسياسى 10 قىركۇيەكتە وتكەن 82 ايماقتىڭ جەرگىلىكتى ورگان مۇشەلەرىن سايلاۋعا قاتىسۋشىلاردىڭ وتە از بولعانىن مالىمدەدى. داۋىس بەرۋشىلەردىڭ تەك 29 پايىزى قاتىسقان.
رەسەيدىڭ ىشكى ىستەر مينيسترلىگى بولسا، سايلاۋ تىنىش ءوتتى دەپ مالىمدەدى. باقىلاۋشىلار سايلاۋ ۋچاسكەلەرىندە بيۋللەتەندەردى ۋىستاپ جاشىككە سالعان، سايلاۋشىلاردى اقشامەن جانە ىشىمدىكپەن ساتىپ العان جاعدايلاردىڭ كەزدەسكەنىن حابارلادى.
وسك بولسا، سايلاۋ قورىتىندىسىنا اسەر ەتەتىندەي زاڭ بۇزۋشىلىقتار ورىن العان جوق دەدى.
ادەتتەگىدەي سايلاۋعا قاتىسۋشىلاردىڭ جوعارعى كورسەتكىشى اباقتىلار مەن پسيحياتريالىق اۋرۋحانالاردا تىركەلگەن. بۇل جونىندە "وتكرىتايا روسسيا" حابارلايدى.
پرەمەر-مينيستر دميتري مەدۆەدەۆ سايلاۋ "جوعارعى دەڭگەيدە" ءوتتى، بارلىق ايماقتاردا سايلاۋشىلار بەلسەندىلىك تانىتتى دەپ مالىمدەدى.
Abai.kz
