بۇگىن «نۇر وتان» پارتياسىنىڭ ورتالىق اپپاراتىندا وتكەن پارتيالىق تىڭداۋدا يندۋستريالدى-يننوۆاتسيالىق دامۋدىڭ 2015-2019 جىلدارعا ارنالعان مەملەكەتتىك باعدارلاماسى اياسىندا اتقارىلعان ىستەر جايى ءسوز بولدى.

«نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد ەلباسىمىزدىڭ تىكەلەي باستاماسىمەن تاۋەلسىزدىك جىلدارىندا قازاقستان ەكونوميكانىڭ شيكىزاتتىق ەمەس سەكتورىن دامىتۋدا اۋىز تولتىرىپ ايتارلىقتاي جەتىستىكتەرگە قول جەتكىزگەنىن اتاپ ءوتتى. اتالعان باعدارلامانىڭ جەتىستىكتەرىنە توقتالىپ وتكەن مۇحتار قۇل-مۇحاممەد ەلباسىنىڭ تاپسىرماسىمەن يندۋستريالدىق-يننوۆاتسيالىق دامۋ باعدارلاماسى اياسىندا 1000-نان استام جاڭا كاسىپورىندار سالىنعانىنا جانە ونى جۇزەگە اسىرۋعا 5 تريلليون تەڭگەدەن استام قاراجات بولىنگەنىنە نازار اۋداردى.

وسىنىڭ ءبارى پرەزيدەنتتىك باعدارلامانىڭ ناتيجەسى ەكەنىن ايتقان پارتيا توراعاسىنىڭ ءبىرىنشى ورىنباسارى: «ەلىمىزگە بۇكىل دۇنيەجۇزىنە تانىمال اسا ءىرى كومپانيالار كەلىپ، ميللياردتاعان دوللار ينۆەستيتسيا سالدى جانە ەڭ وزىق تەحنولوگيالاردى اكەلدى. ءدال وسى جاڭا كاسىپورىندار مۇناي باعاسى ءۇش ەسەگە تومەندەگەن كەزدە ەل ەكونوميكاسىنىڭ تۇراقتى دامۋىن قامتاماسىز ەتىپ وتىر. ەندەشە ءبىز ەلباسى تاپسىرمالارىنىڭ ۋاقىتىندا ورىندالۋىن قاتاڭ باقىلاۋعا الۋىمىز كەرەك»، – دەدى.

پارتيالىق تىڭداۋدا ارنايى بايانداما جاساعان ينۆەستيتسيالار جانە دامۋ ءمينيسترى جەڭىس قاسىمبەك تەك وسى جىلدىڭ وتكەن 8 ايىندا عانا 489,8 ملرد. تەڭگەنى قۇرايتىن 32 جوبا جۇزەگە اسىرىلىپ، 3,9 مىڭ جۇمىس ورنى اشىلعانىن اتاپ ءوتتى.

«مەملەكەتتىك باعدارلاما جۇزەگە اسىرىلا باستاعاننان بەرى وڭدەۋ ءوندىرىسىنىڭ ءوسۋ قارقىنى داعدارىسقا دەيىنگى 2008 جىلمەن سالىستىرعاندا 25,2 پايىزعا كوبەيىپ، كەن ءوندىرۋ سالاسىنىڭ ءوسۋ قارقىنىن (13,9 پايىز) باسىپ وزدى. ەلىمىزدە وندەۋ سالاسى بويىنشا 26 جاڭا سەكتور قۇرىلدى. ناتيجەلى جۇمىسپەن جانە ەلىمىزدىڭ بارلىق وڭىرىندە تۇراقتى ەكونوميكانى قامتاماسىز ەتەتىن جاڭا يندۋستريالدى بازا پايدا بولدى»، – دەدى ج.قاسىمبەك.

سونداي-اق، ءىس-شاراعا «نۇر وتان» پارتياسى پارلامەنت ماجىلىسىندەگى فراكتسياسىنىڭ جەتەكشىسى گۇلميرا يسيمباەۆا، ءماجىلىس توراعاسىنىڭ ورىنباسارى ۆلاديمير بوجكو، ءماجىلىس دەپۋتاتتارى، «يندۋستريالدى دامۋ» باعىتىنداعى پارتيالىق كوميسسيا مۇشەلەرى، بىرقاتار ۆەدومستۆو وكىلدەرى، ساراپشى ماماندار، «اتامەكەن» ۇلتتىق كاسىپكەرلەر پالاتاسى جانە تاۋاروندىرۋشىلەر مەن كاسىپورىنداردىڭ رەسپۋبليكالىق قاۋىمداستىعىنىڭ باسشىلارى قاتىستى. سونداي-اق، بەينەبايلانىس ارقىلى ەلىمىزدىڭ بارلىق ءوڭىرى تىكەلەي قوسىلدى.

بۇگىندە ەلىمىزدە ەلباسىمىزدىڭ باستاماسىمەن كوپتەگەن مەملەكەتتىك باعدارلامالار جۇزەگە اسىرىلۋدا. الايدا كەز كەلگەن ءىستىڭ جەمىستى بولۋى ونىڭ جۇيەلى جۇرگىزىلۋىمەن قۇندى. وسى تۇرعىدان كەلگەندە «نۇر وتان» پارتياسىنىڭ پرەزيدەنتتىك باعدارلامالاردىڭ ورىندالۋىن ەرەكشە باقىلاۋدا ۇستاۋى كوڭىل قۋانتادى.

Abai.kz