ىلەسپە اۋدارماشىلار قازاقستاندا قاجەتتى ماماندىقتىڭ ءبىر ءتۇرى بولىپ تابىلادى. ۇلتارالىق كەلىسىم ماسەلەسىن اركەز ەستە ۇستايتىن قازاقستاندىقتار ۇلىق جيىندار مەن ۇلكەندى كىشىلى شارالار بارىسىندا وسى ىلەسپە اۋدارماشىلاردىڭ قىزمەتىنە جۇگىنەدى.

قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ مەملەكەتتىك تاپسىرماسى بويىنشا  ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى «قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى» اياسىندا مەملەكەتتىك ءتىلدىڭ قولدانىس دەڭگەيىن كەڭەيتۋ، ىلەسپە اۋدارماشىلاردىڭ بىلىكتىلىگىن ارتتىرۋ ماقساتىندا قازاقشا-ورىسشا، ورىسشا-قازاقشا ىلەسپە اۋدارما جۇرگىزۋدى ۇيرەتۋدىڭ شەبەرلىك كلاستارىن وتكىزەدى.

اتالعان شەبەرلىك كلاستارى مەملەكەتتىك ءتىلدىڭ قولدانىس اياسىن كەڭەيتۋ ماقساتىندا قازاقشادان ورىسشاعا جانە ورىسشادان قازاقشاعا ىلەسپە اۋدارما جاسايتىن اۋدارماشىلاردىڭ بىلىكتىلىگىن ارتتىرۋدى كوزدەيدى.

شەبەرلىك كلاستارىندا اۋدارما تەورياسى، جازباشا اۋدارما مەن اۋىزشا اۋدارمانىڭ ەرەكشەلىكتەرى، ىلەسپە اۋدارماشىعا قاجەتتى بازالىق گرامماتيكالىق جانە فرازەولوگيالىق مودەلدەر، سوزدىك قوردى بايىتۋ جۇمىستارى بويىنشا دارىستەر وقىلادى. سونىمەن قاتار، اۋدارماشى ماماندارعا اۋدارما تەورياسى مەن پراكتيكاسى، اۋدارماتانۋدىڭ وزەكتى ماسەلەلەرى شەڭبەرىندە وقۋ-ادىستەمەلىك كومەك كورسەتىلىپ، اۋدارما سالاسىنداعى عالىم  ماماندار وزىق تاجىريبەسىمەن بولىسەدى.

شەبەرلىك كلاسىن بەلگىلى اۋدارماشى، فيلولوگيا عىلىمدارىنىڭ كانديداتى كامال الپەيىسوۆا (سۋرەتتە) جۇرگىزەدى. شەبەرلىك ساباقتارىنا عالىم اۋدارماشىلار، سالا ماماندارى، مينيسترلىكتەر مەن اكىمدىكتەردىڭ، وبلىستىق، قالالىق  تىلدەردى دامىتۋ باسقارمالارىنىڭ، مەملەكەتتىك جانە مەملەكەتتىك ەمەس مەكەمەلەردىڭ اۋدارماشىلارى قاتىسادى.

قاتىسۋشىلارعا بىلىكتىلىك سەرتيفيكاتتارى تابىستالادى.

شەبەرلىك كلاستارى استانا  قالاسىندا 16-20 قازان ارالىعىندا تۇران-18, بيزنەس ورتالىعىندا بولادى. باستالۋى ساعات 09:00

Abai.kz