استانا ەكسپو-2017 كومپانياسىنداعى ەسىموۆتىڭ ءرولى تۋرالى جازباقپىز. جاقىندا «ۆرەميا» باسىلىمى احمەتجان ەسىموۆتىڭ ساياسي كارەراسىنداعى وزگە دە جۇمىستارعا شولۋ جاساپ، ەكس-اكىمنىڭ باسقا دا لاۋازىمدى قىزمەتتەردە تىعىرىقتان جول تاپقان، انتي-داعدارىس مەنەدجەرلىگىن اتاپ ءوتىپتى. ءبىز دە احمەتجان ەسىموۆتىڭ ەلەۋلى ىستەرىنە از-كەم شولۋ جاساپ كوردىك.

احمەتجان سماعۇلۇلى پرەزيدەنتتىڭ تاعايىنداۋىمەن «استانا ەكسپو-2017» ۇلتتىق كومپانياسىن باسقاردى. ەڭ قىزىعى ول كورمەنىڭ وتۋىنە 21 اي ۋاقىت قالعاندا باسشىلىققا كەلدى.  سول كەزدە ساياسي سكەپتيكتەر مەن وپپونەتتەر تاراپى احمەتجان ەسىموۆتىڭ ىسىنە كۇمانمەن قاراسا، ونىمەن ىستەس بولعان ازاماتتار مۇلدە بولەك پىكىردە ەدى.

احمەتجان سماعۇلۇلى – اۋىلشارۋاشىلىق مينيسترلىگىن باسقاردى. احمەتجان مىرزا مينيستر بولعان جىلدارى اتقارعان جۇمىستارى تۋرالى كاسىپكەر، قر ەڭبەك ارداگەرى يۆان ساۋەر ونىڭ بىلىكتى باسشى ەكەنىن ايتادى.

راسىندا، احمەتجان مىرزا اۋىلشارۋاشىلىق مينيسترلىگىن باسقارىپ تۇرعان جىلدارى قازاقستاننىڭ استىق القاپتارىنداعى بيدايدى وڭدەپ، ۇن دايارلاۋ ءىسى جۇيەگە كەلتىرىلىپ، الەمدىك رەيتينگتە ۇن ەكسپورتىنان قازاقستان كوش باستادى.

سالىستىرمالى تۇردە ايتايىق، 2015 جىلى قازاقستان رەسەيدەن ۇن ونىمدەرىن يمپورتتايتىن 10 ەلدىڭ قاتارىنا كىردى.

ونان سوڭ، احمەتجان مىرزا الماتى دەيتىن ايدىك شاھارعا اكىم بولىپ تاعايىندالدى. ەسىموۆ ەل ەسىندە الماتىنى ەڭ ۇزاق باسقارعان اكىم رەتىندە قالدى. تابانداپ تۇرىپ 7 جىل قالا باسشىسى بولدى.

ەسىموۆ اكىم بولىپ تۇرعان كەزدە، ونىڭ ورىنباسارى بولعان ۆيكتور دولجەنكوۆتىڭ ايتۋىنشا، كەزەكتى قارجى داعدارىسىنان كەيىن الماتىدا سالىمشىلاردىڭ ماسەلەسى ءورشىپ تۇرعان-دى. قۇرىلىس كومپانيالارى مەن سالىمشىلاردىڭ اراسىنداعى داۋدى شەشۋدە احمەتجان ەسىموۆ مىرزانىڭ ەڭبەگى زور بولدى. سالىمشىلارعا قاتىستى ول 120-دان استام شەشىم شىعارىپتى. بۇل جىلدارى احمەتجان مىرزا  16200 سالىمشىنىڭ ماسەلەسىن شەشتى. بۇل وتباسى مۇشەلەرىمەن قوسا ەسەپتەگەندە 64 مىڭ ادام ەدى. احاڭنىڭ ماسەلەنى شەشۋشى مەنەدجەرلىگى تۋرالى كوپ ايتۋعا بولادى، كوپ مىسال كەلتىرۋگە بولادى، ونىڭ ءبىر عانا الماتىنىڭ «باراحولكاسىنان» زامانۋي ساۋدا ءۇيىن جاساۋ تۋرالى يدەياسى نەگە تۇرادى؟!

احمەتجان مىرزا الماتىداعى الاتاۋ اۋدانىنىڭ قۇرىلىسىنا ەلەۋلى ۇلەس قوستى. ەستەرىڭىزگە سالا كەتەيىك، 2006 جىلعى شاڭىراق، باقاي ىقشام اۋداندارىنداعى زاڭسىز سالىنعان ءۇي قوجايىندارىمەن ىشكى ىستەر ورگانى وكىلدەرىنىڭ اراسىنداعى داۋدى شەشۋدە دە ەسىموۆتىڭ ساياسي بىلىكتىلىگى ۇلكەن ءرول اتقاردى.

الاياقتارعا الدانىپ قالعان 20 مىڭداي ادام باسپاناسىز قالاتىن قاۋىپ بولعان. احمەتجان ەسىموۆ مىرزا ۇكىمەتكە بولعان جايدى بايانداپ، 3800 وتباسىنىڭ ۇيلەرىن زاڭداستىرىپ بەردى.

ول ەۋروپادا ەلشى بولىپ جۇرگەندە دە، الماتىدا اكىم بولىپ قىزمەت ەتكەندە دە، ءتىپتى مينيستر بولعان جىلدارى دا ءوزىنىڭ داعدارىستان شىعا بىلەتىن بىلىكتىلىگىن كورسەتكەن-ءتىن. ەندى ول ەكسپو بازاسىندا تىڭ جوبالاردى جۇزەگە اسىرۋمەن اينالىساتىن بولدى.

Abai.kz