قحر-دان ورالىپ، جامبىل وبلىسى، تاراز قالالىق كوشى-قون پوليتسياسىنان ىقتيارحات العان 251 ەتنيكالىق قازاق تۋرالى ىڭعايسىز اقپارات تارالعالى  ءبىراز ۋاقىت بولدى.

كوشى-قون زاڭناماسى تۇزەلىپ، كەدەرگىلەر الىنىپ، قازاق كوشى ەندى قارقىن الادى دەپ تۇرعانىمىزدا، مىناداي جاعدايدىڭ ءجۇز بەرۋى – وتە وكىنىشتى.

بۇل - ءبىر سوزبەن ايتقاندا، مىڭداعان قانداستارىمىزدىڭ تاعدىرىنا بالتا شاباتىن، مەملەكەتتىڭ بەدەلىنە نۇقسان جەتكىزەتىن ءىس.

ولار تۇراقتى تىركەۋگە تۇرىپ، ىقتيارحات العان 2014-2015 جىلدار – قازاق كوشىنىڭ ەڭ ءبىر توقىراۋعا ۇشىراعان، قازاقستان رەسپۋبليكاسىنىڭ ازاماتتىعىن الۋدىڭ قول جەتپەس شىڭعا اينالعان، تۇراقتى تىركەۋگە تۇرۋدا كەدەرگىلەردىڭ كوبەيگەن تۇسى ەكەنىن بۇكىل ەل بۇگىن جاقسى بىلەدى.

شەتتەن كەلگەن ءار قازاقتىڭ ەڭ باستى ارمانى – قاسيەتتى قازاقستان توپىراعىندا قالۋ. سول ءۇشىن قانداستارىمىز قالاي دا تاريحي وتانىندا تابان تىرەپ قالۋدىڭ قامىندا بولعانىن، سول ءۇشىن وسىنداي قادامعا بارعانىن دۇرىس ءتۇسىنۋىمىز كەرەك.

قۇدايعا تاۋبە، قازاق كوشىن بۇل شىڭىراۋدان سۋىرىپ الىپ، جارىق الەمگە قايتا شىعارعان، ءوز ارناسىنا سالعان ۇلت كوشباسشىمىز نۇرسۇلتان ءابىشۇلى.

قازىرگى تاڭدا بۇل ازاماتتار قۇجاتسىز سەندەلىپ قالعانى بولماسا، قازاق ەلىنە ءسىڭىپ، ءتۇرلى كاسىپپەن اينالىسىپ، ومىرگە ۇرپاق اكەلىپ، ءونىپ-ءوسىپ جاتقان جاعدايى بار. كوبى كاسىپكەرلىكپەن اينالىسىپ، جۇمىس كوزىن اشىپ وتىر. مەملەكەتكە سالىق تولەۋدە. قىسقاسى، ەلىمىزگە قىلداي اۋىرتپالىق ءتۇسىرىپ وتىرعان جوق.

«وتانداس-ەل» رەسپۋبليكالىق قوعامدىق بىرلەستىگى قر ىشكى ىستەر مينيسترلىگىنەن بۇل ماسەلەنىڭ وڭ باعىتتا شەشۋدى ءۇمىت ەتەدى. سوڭعى رەت وزگەرتۋلەر مەن تولىقتىرۋلار ەنگىزىلىپ قابىلدانعان «حالىقتىڭ كوشى-قونى تۋرالى» زاڭىنىڭ اياسىندا بۇل ازاماتتاردى قايتا باستان تولىق قۇجاتتاندىرۋعا مۇمكىندىك بار ەكەنىن ەسكەرتەدى. سونىمەن بىرگە، بۇل ءتۇيىندى شەشۋدە قۇقىق قورعاۋ ورگاندارى، ەڭ الدىمەن، نيۋ-يوركتە قازاقستان رەسپۋبليكاسى جوعارعى كەڭەسىنىڭ قاۋلىسىمەن 1994 جىلعى 16 اقپاندا راتيفيكاتسيالانىپ قول قويىلعان 1989 جىلعى 20 قاراشاداعى «بالا قۇقىقتارى تۋرالى» حالىقارالىق كونۆەنتسيانى قاتاڭ ەسكەرۋى كەرەك دەپ ەسەپتەيدى.

«وتانداس-ەل» رەسپۋبليكالىق قوعامدىق بىرلەستىگى

Abai.kz