ەلوردادا وتكەن «استانا ەكسپو-2017» حالىقارالىق مامانداندىرىلعان كورمەسى قازاقستان تاريحىنداعى ەڭ جەمىستى ستراتەگيالىق جوبالاردىڭ بىرىنە اينالدى, - دەپ حابارلايدى Abai.kz اقپاراتتىق پورتالى.

بۇل تۋرالى جۇما كۇنى استانا اكىمى اسەت يسەكەشەۆ حالىقارالىق مامانداندىرىلعان كورمەسىن ۇيىمداستىرۋ مەن وتكىزۋگە اتسالىسقان استانالىق اكىمدىكتىڭ قىزمەتكەرلەرىن سالتاناتتى ماراپاتتاۋ راسىمىندە مالىمدەدى.

«ەكسپو-2017» كورمەسى ەكونوميكانىڭ بارلىق سالالارىنىڭ دامۋىنا، تۋريستىك سالانىڭ وسۋىنە تۇرتكى بولعان قوسىمشا قوزعاۋشى كۇشىنە اينالىپ، بۇكىل ەلىمىزدىڭ الەمدىك ارەناداعى ەڭ ءتيىمدى ءيميدجدى جوبالارىنىڭ ءبىرى اتانعانى ءسوزسىز»، - دەدى ءا.يسەكەشەۆ.

استانا اكىمىنىڭ پىكىرىنشە، كورمەنىڭ ارقاسىندا ەلوردا جاڭا ەۋروپالىق بەينەگە ەنىپ، وزگەرىپ، وركەندەي ءتۇستى. قىزمەت كورسەتۋدىڭ، جايلىلىق پەن قاۋىپسىزدىكتىڭ جاڭا دەڭگەيى پايدا بولدى.

«ءبىزدىڭ ەلوردامىز، «ەكسپو-2017» كورمەسىنىڭ ارقاسىندا وزگەرىپ، ودان بەتەر قارقىندى دامي باستادى»، - دەپ كورسەتتى ءا.يسەكەشەۆ.

ەكسپو-2017 بارىسىندا، ءتىپتى، قىلمىستار سانى دا ازايدى. بۇعان قوسىمشا بەينەباقىلاۋ كامەرالارىنىڭ ورناتىلۋى سەپتىگىن تيگىزدى.

«ەسەپ بەرىپ وتىرعان كەزەڭ ىشىندە 2178 بەينەباقىلاۋ كامەرالارى ورناتىلىپ، استاناداعى قىلمىستار سانى ەداۋىر تومەندەگەنى حاق. 2017 جىلدىڭ 8 ايىندا تىركەلگەن قىلمىستاردىڭ سانى 18 % ازايىپ، ياعني 28 791-دەن 23 595-كە دەيىن كەمىدى»، — دەپ حابارلادى ءا.يسەكەشەۆ.

ونىڭ ايتۋىنشا، ەكسپو كورمەسىنىڭ بارلىق 93 كۇنى ىشىندە ەشبىر شتاتتان تىس وقيعا ورىن الماعان.

«كورمە ءوتتى، الدىمىزدا استانانىڭ 20 جىلدىعى كەلە جاتىر. بىزگە وسى دەڭگەيدى ساقتاپ قالۋ ماڭىزدى»، - دەپ ەسكە سالدى استانا اكىمى ءوزىنىڭ قىزمەتتەستەرىنە.

«ءبىز قالا رەتىندە پرەزيدەنتتىڭ قويعان مىندەتىن ورىندادىق. استانا تۇرعىندارىنا وسىنداي مەيىرىمدى، بەيبىت جانە تاتۋلىق اتموسفەراسىن جاساۋعا كومەكتەسكەندەرى ءۇشىن ەرەكشە العىس بىلدىرەمىز. وسى ءبىر جاعىمدى اتموسفەرانى ساقتاپ قالۋىمىز كەرەك»، - دەپ مالىمدەدى يسەكەشەۆ EXPO كورمەسىن وتكىزۋگە اتسالىسقان ۇزدىك قىزمەتكەرلەردى ماراپاتتاۋ راسىمىندە.

Abai.kz