رەسەي بايقوڭىرعا قۇلاعان پروتون ءۇشىن وتەماقى تولەيدى. قىزىلوردا وبلىسىنىڭ اكىمى قىرىمبەك كوشەرباەۆ وسىلاي دەدى.

2013 جىلى قازاقستاننىڭ تەرريتورياسىنا قۇلاعان رەسەيلىك زىمىران تاسىعىش "پروتون-م" قازاق دالاسىنا 600 توننا گەپتيل ۋىن جايدى. سونىڭ زاردابىن حالىق  كۇنى بۇگىنگە دەيىن تارتىپ كەلەدى.

بۇل ماسەلەگە بايلانىستى ەكى تاراپ ءوزارا كەلىسە الماي كەلگەن. رەسەي جالعا الىپ، جۇمىس جاساپ وتىرعان بايقوڭىر عارىش ايلاعىنان ۇشىرىلعان زىمىران تاسىعىشتىڭ قۇلاۋى ءتۇرلى ەكولوگيالىق ىندەتتەرگە اكەلىپ سوقتىردى.

ەندى مىنە، ارادا 4 جىل وتكەندە تاراپتار ورتاق شەشىمگە كەلىپتى. رەسەي جاعى كەلتىرىلگەن ەكولوگيالىق شىعىندى وتەۋگە مىندەتتى بولدى. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆ ايتتى.

"مەن "پروتون-م" قۇلاعان كۇننىڭ ەرتەسى اپات بولعان جەرگە باردىم. جاعدايدى ءوز كوزىممەن كوردىم. ءبىز رف تاراپىمەن ءتىل تابىسا الماي كەلدىك. ولار رەسەيدىڭ ەكولوگيالىق كودەكسىنە جۇگىندى. ءبىز ءوزىمىزدىڭ كودەكستى العا تارتتىق. ارادا اسا قاتتى داۋ بولعان جوق. سوندىقتان ورتاق شەشىمگە كەلۋىمىز كەرەك بولدى. جانە ول شەشىمگە كەلدىك.

ءبىز ەندى قازاقستاننىڭ ەكولوگيالىق كودەكسىمەن جۇمىس جاسايتىن بولامىز. كەلىسسوزدەر دە ءجۇرىپ جاتىر.  ۇكىمەتارالىق كوميسسيانىڭ قۇزىرىندا 2013 جىلعى اپاتتىڭ شىعىنىن وتەۋ ماسەلەسى قارالۋدا. رەسەي بىزگە وتەماقى وتەي مە، جوق پا دەگەن ساۋال ورىنسىز. وتەيدى. مىندەتتى" ، - دەدى وبلىس اكىمى قىرىمبەك كوشەرباەۆ.

 Abai.kz