يراك كۇردىستانى باسشىسى بارزاني قىزمەتىنەن كەتپەك
يراكتىڭ كۇردىستان اۆتونوميالىق ايماعىنىڭ باسشىسى ماسۋد بارزاني پرەزيدەنتتىك وكىلەتىن ۇزارتپايدى. 2005 جىلدان بەرى وسى قىزمەتتە وتىرعان بارزاني وكىلەتىن ايماق پارلامەنتى مەن ۇكىمەتكە ءبولىپ بەرۋ تۋرالى جوسپارىن سەنبى كۇنى كۇردىستان اۆتونومياسى پارلامەنتىنە تاپسىرعان. پارلامەنت قۇجاتتى بۇگىن قاراماقشى.
اۆتونوميالىق ايماقتا 1 قاراشادا پرەزيدەنت سايلاۋى وتەدى دەپ جوسپارلانعان ەدى. بىراق، ايماقتاعى جاعداي كۇرت شيەلەنىسىپ كەتۋىنە بايلانىستى وتكەن اپتادا سايلاۋ بەلگىسىز مەرزىمگە دەيىن كەيىنگە شەگەرىلەتىنى تۋرالى حابارلانعان.
بۇعان دەيىن وپپوزيتسيالىق پارتيا ءبارزانيدى وتستاۆكاعا كەتۋگە شاقىرعان. ساياسي وپپونەنتتەرى ونى كيركۋك پروۆينتسياسىنداعى مۇنايعا باي اۋداندارعا يە بولا المادى دەپ ايىپتاعان. اتالعان اۋداندار قازىر ۇكىمەت اسكەرىنىڭ باقىلاۋىندا.
كۇردىستان اۆتونوميالىق ايماعىنىڭ بيلىگى يراك ۇكىمەتىنىڭ قارسىلىعىنا قاراماستان بيىل 25 قىركۇيەكتە تاۋەلىزدىك تۋرالى رەفەرەندۋم وتكىزگەننەن كەيىن، وعان جاۋاپ رەتىندە يراك ارمياسى باعدادتى قولدايتىن شيت قۇرىلىمدارىنىڭ قولداۋىمەن كيركۋكتەن كۇرد جاساقتارىن ىعىستىرا باستاعان.
25 قىركۇيەكتەگى داۋىس بەرۋ ناتيجەسى بويىنشا، وعان قاتىسقانداردىڭ 93 پايىزدان استامى كۇردىستان ايماعىنىڭ يراكتان تاۋەلسىز بولعانىن قالايتىندارىن بىلدىرگەن.
كيركۋك كۇردىستان اۆتونومياسىنىڭ قۇرامىنا كىرمەيدى، الايدا سول پروۆينيتسيادا تۇراتىندار دا رەفەرەندۋمگە قاتىسقان.
باعداد كۇردىستان اۆتونومياسىندا وتكەن رەفەرەندۋم - زاڭسىز دەپ مالىمدەگەن.
Abai.kz
