الماتى وبلىسىندا «اۋىلىم – التىن بەسىگىم» اتتى اۋىلدىق مادەنيەت ۇيلەرى مەن كلۋبتارى اراسىندا وبلىستىق كونكۋرس ءوتتى. بۇل تۋرالى "Abai.kz" اقپاراتتىق پورتالى حابارلايدى.

اتالمىش ءىس-شارا مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋعا باعىتىندا وتكىزىلدى.ال كونكۋرستىڭ جۇلدەگەرلەرى كەشەندى دىبىس اپپاراتۋرالارى مەن ارقايسىسى 300 مىڭ تەڭگەدەن اقشالاي سىيلىققا يە بولدى. ماراپاتتاۋ سالتاناتى تالدىقورعان قالاسىنداعى ءى. جانسۇگىروۆ اتىنداعى مادەنيەت سارايىندا ءوتتى. جەڭىمپازداردى وبلىس اكىمى اماندىق باتالوۆ قۇتتىقتادى.

كونكۋرس قاتىسۋشىلارىن قۇتتىقتاعان وبلىس اكىمى ا. باتالوۆ:

- حالقىمىزدىڭ مادەني ءال-اۋقاتىن ارتتىرماي، تولىققاندى ەل بولۋ قيىن. بارلىق ونەردىڭ باستاۋىنا اينالعان اۋىل مادەنيەتىنىڭ بولاشاعى – قازاق ەلىنىڭ رۋحاني كەمەلدەنۋى.  سول سەبەپتى اۋىل جۇرتشىلىعىنا دەگەن كومەگىمىزدى اياماي، قولداۋ تانىتۋ – ءبىزدىڭ باستى مىندەتىمىز. جىل سايىن وتەتىن مادەنيەت كۇندەرىن وتكىزۋ فورماتى بيىل وزگەرتىلىپ، اۋىلدىق مادەنيەت ۇيلەرى مەن كلۋبتارى قامتىلدى. بۇل بايقاۋعا اۋىلدارداعى 33 مادەنيەت نىسانى قاتىستى، ولاردىڭ بارلىعىنا دا سىيلىقتار بەرىلەدى. ءار اۋىلدا، ءاربىر ەلدى مەكەندە ۇلكەندەر ءۇشىن دە، جاستار ءۇشىن دە كلۋبتاردىڭ، مادەنيەت ۇيلەرىنىڭ بولعانى ماڭىزدى. سول ماقساتتا جۇمىس جۇرگىزىپ كەلەمىز. وبلىستاعى مادەنيەت نىساندارىنىڭ كۇردەلى جوندەۋ جۇمىستارى مەن جوبالىق-سمەتالىق قۇجاتتارىن ازىرلەۋدىڭ وزىنە عانا 1,1 ملرد. تەڭگە ءبولىندى. الداعى ۋاقىتتا دا بىرلەسىپ اتقارعان ىستەرىمىز جەمىستى بولسىن! مادەنيەتىمىزدى، باعا جەتپەس ونەرىمىزدى ناسيحاتتاۋ جولىنداعى ەڭبەگىمىز ەسەلەنە بەرسىن، - دەدى ءوز سوزىندە.

بايقاۋ قورىتىندىسى بويىنشا 8 اۋىلدىق مادەنيەت ءۇيى جەڭىمپاز دەپ تانىلىپ، ارقايسىسىنا 300 مىڭ تەڭگەدەن اقشالاي سىيلىق سەرتيفيكاتى مەن كەشەندى دىبىس اپپاراتۋرالارى بەرىلدى.

سالتاناتتى ءراسىم بارىسىندا قاتىسۋشىلاردىڭ بارلىعى دا ماراپاتتالىپ، سىيلىقتارعا يە بولدى. ماسەلەن، 10 اۋىلدىق مادەنيەت ءۇيى مەن كلۋبتارعا دىبىس اپپاراتۋراسى سىيعا تارتىلسا، قالعان 15-ىنە  بارلىق قوسالقى قۇرال-جابدىقتارىمەن بىرگە كومپيۋتەرلەر تارتۋ ەتىلدى. ءسويتىپ، كونكۋرستىڭ بارلىق قاتىسۋشىلارىنا مادەنيەت نىساندارىنىڭ جۇمىسىن جاقسارتۋعا، ماتەريالدىق-تەحنيكالىق بازاسىن نىعايتۋعا باعىتتالعان سىيلىقتار بەرىلدى.

شارا بارىسىندا كونكۋرسقا قاتىسۋشىلاردىڭ ۇزدىك نومىرلەرىنەن دايىندالعان گالا-كونتسەرت ۇسىنىلادى.

اتاپ وتسەك، الماتى وبلىسىندا 563 مادەنيەت نىسانى مەن ارحيۆ بار. بيىلعى جىلى مادەنيەت سالاسىنىڭ بيۋدجەتى 8,3 ملرد. تەڭگەنى قۇرادى. قازىرگى كەزدە سارقان اۋداندىق مادەنيەت ءۇيى، جامبىل اۋدانى مىڭباەۆ اۋىلىنداعى، سارقان اۋدانى باقالى اۋىلىنداعى اۋىلدىق مادەنيەت ۇيلەرى، تالدىقورعان قالاسىنداعى مەملەكەتتىك ارحيۆ عيماراتىنا كۇردەلى جوندەۋ جۇرگىزىلىپ، سول سياقتى 5 مادەنيەت نىسانىنىڭ جوندەۋ جۇمىستارىنىڭ جوبالىق-سمەتالىق قۇجاتتارى دايىندالۋدا. 

Abai.kz