بۇل وقيعانىڭ ءوتىپ كەتكەنىنە ءبىرتالاي جىل بولدى. بىراق سول وقيعا ەسىمە تۇسسە ەرىكسىز كۇلە بەرەمىن. بۇگىن دەمالىس قوي، سىزدەر دە كۇلسىن دەپ جازىپ وتىرمىن. سونىمەن وقيعا بولدى. جالپى مەنىڭ دوستارىم كوپ بولعانىمەن، جانىما جاقىنى ساناۋلى عانا، بارىندە دە سولاي عوي. مەن ونىمەن "حابار" ارناسىندا تانىستىم. ول دا، مەن دە شتاتتان تىس رەداكتور بولاتىنبىز.

ايىرماشىلىعىمىز مەن جازعاندا كوركەمدەپ جازام، ليريكاعا بوي الدىرام. ول ناقتى قولمەن قويعانداي جازادى، ناعىز جۋرناليست. ءبىر ءبىرىمىزدى جاقسى ءتۇسىنىپ كەتتىك، مەن ونىڭ جازعانىن اسپەتتەيمىن، ول مەنى اسپاننان جەرگە تۇسىرەدى. رەنىش، وكپە جوق. ءبىر ءبىرىمىزدى تولىقتىرعانىمىزعا ءمازبىز. اڭگىمەمىمىز ءبىر تاۋسىلمايدى، ادەبيەت، ونەر، شەتەل ادەبيەتى، تەاتر، كينو، ءومىر ءپالساپاسى، كۇندەگى تىرشىلىك، اس دايىنداۋ، بالا-شاعا ت.ب. ءبىر-بىرىمىزگە تەز ۇيرەنىسىپ كەتتىك، ءومىر بويى ءبىر جۇرگەندەيمىز. ول دا، مەن دە كازگۋ تۇلەكتەرىمىز، بىراق وقىپ جۇرگەندە ءبىر-ءبىرىمىزدى كورمەپپىز. ءومىر ءبىزدى "حابار" ارناسىندا توعىستىردى. كوپ جىلدار كورىنبەگەن سەبەبى جولداسىنىڭ قىزمەتىمەن ماسكەۋدە تۇرعان. سونىمەن ءبىر كۇنى ولار الماتىدان استاناعا كوشەتىن بولدى. وعان ابدەن باۋىر باسىپ العانىم سونشا، بۇكىل الماتى كوشىپ بارا جاتقانداي كۇيدە ءجۇردىم. ء"وزىم شىعارىپ سالامىن" دەپ ولاردى كولىككە وتىرعىزىپ الدىم، تەمىر جول ۆوكزالىنا جەتكەنشە كوڭىلىم استاڭ-كەستەڭ بولدى. ايتەۋىر ۆوكزالعا جەتتىك. كولىك قوياتىن ورىن جوق. سول جەردەن قوشتاسۋعا تۋرا كەلدى. ءومىر سەنەن نە كەرەگىن سۇرامايدى عوي، ءوز دەگەنىن ىستەيدى. ولارمەن قوشتاسىپ كەلىپ كولىككە وتىرسام، ماشينانىڭ ءرولى جوق. تۇك تۇسىنبەيمىن، كوز الدىم تۇمان، تۇك كورىنبەيدى. ويپىرماي، ءرول قايدا كەتىپ قالدى؟! ارى قارايمىن، بەرى قارايمىن! قايدا كەتكەنىن تۇسىنبەيمىن، جاڭا عانا بار ەدى عوي. گازدى باسايىن دەسەم پەدال دا جوق. ابدەن قارا تەرگە ءتۇستىم. ءبىر كەزدە اينەكتەن سىرتقا كوز تاستاسام، ولار ىشەك-سىلەسى قاتىپ كۇلىپ تۇر ەكەن. ماعان الدىڭعى جاقتى نۇسقايدى. سويتسەم، مەن كولىكتىڭ ارتقى ورىندىعىنا وتىرىپ الىپ ءرول ىزدەپ وتىر ەكەنمىن!

وسى وقيعانى ەسكە الىپ كەزدەسكەن سايىن كۇلەمىز! ول مەنىڭ دوسىم - ارداگۇل توقىشەۆا!

جاڭىلحان اسىلبەكوۆا

Facebook-تەگى پاراقشاسىنان