جۋرناليستەر وداعىنىڭ توراعاسى ماتاەۆ ساحاروۆ جۇلدەسىمەن ماراپاتتالدى
قازاقستان جۋرناليستەر وداعىنىڭ توراعاسى سەيىتقازى ماتاەۆ قۇقىق قورعاۋشى اندرەي ساحاروۆ اتىنداعى "ەرلىگى ءۇشىن" سىيلىعىمەن ماراپاتتالدى. بۇل جونىندە سىيلىقتى تاعايىنداۋشىلارعا سىلتەمە جاساپ، جەرگىلىكتى باق حابارلادى. ماتاەۆتىڭ ءوزى وردەن الۋ ءۇشىن قۇجات تاپسىرماعان. بۇل ۇيىمداستىرۋ كوميتەتىنىڭ باستاماسى بولعان.
اندرەي ساحاروۆ اتىنداعى سىيلىق نەگىزىنەن اقيقات ءۇشىن كۇرەسكەن جۋرناليستەرگە، قۇقىق قورعاۋشىلارعا بەرىلەدى. بۇل جولى قازىلار القاسىنىڭ قۇرامىندا نوبەل سىيلىعىنىڭ لاۋرەاتى سۆەتلانا الەكسيەۆيچ بولعان. وسىعان دەيىن اتالعان جۇلدە اننا پوليتكوۆسكاياعا، راديو سۆوبودا مەن "نوۆايا گازەتاعا" بەرىلگەن.
سەيىتقازى ماتاەۆ 2016 جىلى مەملەكەت قارجىسىن زاڭسىز پايدالاندى دەگەن ايىپپەن التى جىلعا باس بوستاندىعىنان ايىرىلعان. ول 2017 جىلدىڭ اياعىندا مەرزىمىنەن بۇرىن شارتتى تۇردە بوستاندىققا شىقتى.
Abai.kz
