ول رەسەيلىك ارىپتەسى ۆلاديسلاۆ سۋركوۆپەن دۋبايدا كەزدەسكەننەن كەيىن، ءۇش كۇننەن سوڭ جۋرناليستەرگە سۇحبات بەردى. وسى كەزدەسۋدەن كەيىن ۆولكەر كيەۆكە بارىپ، ۋكراينا پرەزيدەنتى پەتر پوروشەنكومەن جانە ۇكىمەت مۇشەلەرىمەن كەزدەسكەن.

اقش بىتىمگەرلىك ميسسياسى قاقتىعىس الاڭىندا، سونىمەن بىرگە ۋكراين-رەسەي شەكاراسىنا ورنالاسادى دەپ ۇمىتتەنەدى. ۆولكەردىڭ پىكىرىنشە، سول كەزدە عانا مينسك كەلىسىمىن ورىنداۋعا مۇمكىندىك تۋادى.

ۋكراينانىڭ دونەتسك جانە لۋگانسك وبلىستارىندا رەسەي قولداۋ كورسەتەتىن سەپاراتيستەرمەن قاقتىعىس 2014 جىلدىڭ ءساۋىر ايىنان بەرى جالعاسىپ كەلەدى. مينسك كەلىسىمى اياسىندا اتىستى توقتاتۋ جاريالانعان. بىراق تاراپتار كەلىسىمدى ءجيى بۇزادى.

Abai.kz