ء(امىرحان مەڭدەكە دوستىڭ سۇحباتىنا وراي)

تاپ قازىر مەن ءسوز مىرزامەن بەتپە-بەت كەزدەسىپ وتىرمىن! ونىڭ بەتى قاتتى، ءتۇسى سۇستى، ايتپاعى ادۋىندى. بىلاي دەپ باستاعان: « سەندەردىڭ اتاعى جەر جارعان جازۋشىلار وداعى دەگەن ۇيىمدارىڭ وسى كەزدە جازارماندار وداعىنا اينالىپ بارا جاتىر، مۇنى بىلەسىڭ بە؟ اۋ، وسىلاي دەمەگەندە نە دەيىن ەندى! الدى سەگىز ءجۇز، اياعى مىڭعا مۇرىن تىرەپ تۇر! كوپسىنىپ تۇرعام جوق، كوڭىلدە كىدى وي اتويلاپ تۇرعان سوڭ ايتام-داعى! مەن سان جاعىن سانامالاپ، سىناماق ەمەسپىن، الايدا ساپاسى... ە-ە، دوسىم-اي، وزدەرىڭدى-وزدەرىڭ ماسقارالاپ، ءوز ابىرويلارىڭدى وزدەرىڭ توگىپ، بەدەلدى بەلدەن باسىپ بارا جاتىرسىڭدار-اۋ قازىرگى كەزدە! بولماسا، ناعىز قىران-تالانتتار عانا كوتەرىلە الار ۇشار بيىكتى كورىنگەن «قۇرت-قۇمىرسقاعا» قيا سالۋ – نە دەگەن بەيشارالىق! ويلانىڭدار، ءالى دە كەش ەمەس! ساندى شەكتەپ، ساپاعا كوشىڭدەر اقىلدارىڭ بار بولسا! كەرەك دەسەڭ، مەن ساعان وسى كەزدەگى ەڭ دۇرىس جولدى دا ايتا كەتەيىن – دەرەۋ وداق مۇشەلەرىن قايتادان سۇزگىدەن وتكىزىپ، قايتالاپ تارازىعا سالىپ، ەڭ ىلايىقتى دەگەندەرىن عانا قالدىرۋ قاجەت! ونىڭ، مەن نۇسقاپ كورسەتپەسەم دە، ءادىس-تاسىلدەرى كوپ قوي...».

ىزالى، سۇستى بەينەسىن ءبىر جىلىتپاستان وسىنى ايتتى دا، كەتە باردى. تەرەڭ ويعا شومىپ مەن قالا بەردىم. البەتتە، قالام ۇستاعان كوپ قالامگەرلەردىڭ اراسىندا ءوزىم دە بارمىن عوي، ەگەر ولار ۇيىققا تاپ كەلسە، سولار باتقان باتپاققا مەن دە باتامىن عوي، سوسىن دا بۇل اڭگىمەگە قالايشا نەمقۇرايدى قارايىن!

تەك ول ءۇشىن عانا ەمەس! مۇحاممەد پايعامباردىڭ ءبىر حاديسىندە مىناداي جازبا بولۋشى ەدى: «ءبىر زاماندار بولادى، اقىلدىلار اقىماقتاردى تورگە وزدىرادى، تاعى ءبىر زاماندار بولادى، اقىلدىلار اقىماقتاردى تورگە وزدىرعانى ءۇشىن جاۋاپ بەرەدى...».

اي، قالامگەر، قالامگەرلەر-اي! ءبىز دە كوپ ۇزاماي سونىڭ كەبىن كيىپ جۇرمەسەك جارار ەدى! قازاق دەگەن دانا حالقىم «سۋدىڭ دا سۇراۋى بار» دەپ نەگە شىرىلداپ ايتىپ كەتتى دەيسىڭ!

ويلانار كۇن كەلگەن جوق پا ءالى؟...

جولتاي ءالماشۇلى

Facebook-تەگى پاراقشاسىنان