جۇرت «پرەزيدەنت «ۇكىمەت پەن پارلامەنت قازاقشا سويلەسىن» دەدى» دەپ ءماز بولىپ جاتىر، ال مەن دال بولىپ وتىرمىن.

بىرىنشىدەن، بۇل ماسەلە سوزبەن ەمەس، زاڭمەن شەشىلۋى كەرەك. ەگەر پرەزيدەنتتىڭ ءسوزى جارلىق رەتىندە شىقسا عانا، «شۇكىر» دەۋىمىزگە بولادى. ءسوز ايتىلادى دا، قالادى...

ەكىنشىدەن، قازاق ەلىنىڭ ۇكىمەتى مەن پارلامەنتى پرەزيدەنت ايتپاسا، مەملەكەت تىلدە سويلەمەيدى ەكەن دەگەن تۇجىرىم جاساۋعا ابدەن بولادى ەكەن. بۇل – وسى ەكى ورگاننىڭ، ونى باسقارىپ وتىرعان ادامداردىڭ پاتريوتتىقتان، مەملەكەتشىلدىكتەن جۇرداي ەكەندىگىنىڭ دالەلى.

ۇشىنشىدەن، ەگەر پرەزيدەنتتىڭ ايتقانىن وسى ەكى مەملەكەتتىك ورگان جۇزەگە اسىرسا (وعان ۇلكەن كۇمانىم بار، سەبەبى «ىلەسپە اۋدارما جاساۋ مۇمكىنشىلىگى ءالى جاسالعان جوق» دەگەن سىلتاۋ دايىن تۇر), بۇل - قازاق قاۋىمىنىڭ ولگەنى. دەموكراتيالىق ەلدە حالىق پرەزيدەنتكە ايتقانىن جاساتادى، ال بۇل جەردە، كەرىسىنشە، پرەزيدەنت حالىق وكىلدەرىنە نۇسقاۋ بەرىپ وتىر. دەمەك كەلەسى ءبىر پرەزيدەنت «قىتايشا سويلەڭدەر» دەسە، ەرتەڭىنە ۇكىمەت پەن پارلامەنت قىتايشا سويلەۋگە كوشەدى دەگەن ءسوز! بىلە بىلسەك، بۇل - اسا قاۋىپتى دە قورقىنىشتى قادام!

ءوز باسىم، ەشبىر ەلدە، ەشبىر جەردە مەملەكەتتىك ءتىلى بار ەلدىڭ ۇكىمەتى مەن پارلامەنتىنە مەملەكەتتىك تىلدە سويلەۋ كەرەك دەگەن ۇندەۋدى ەستىمەپپىن.

Abai.kz