قر باس پروكۋرورى قايرات ءماميدىڭ نازارىنا!

قۇرمەتتى قايرات مىرزا!

بۇل مەنىڭ گازەت ارقىلى سىزدەن ناقاقتان سوتتى بولعان ازاماتتاردىڭ تاعدىرىنا اراشا بولۋدى سۇراپ جازىپ وتىرعان ءۇشىنشى ماقالام. العاشقى ماقالام «قازاقستان - ZAMAN» گازەتىندە    ( №35, 03.09. 2009ج.) «قر پرەزيدەنتى اكىمشىلىگىنىڭ باسشىسى ا.ءمۋسيننىڭ نازارىنا، قر جوعارى سوتىنىڭ توراعاسى م. الىمبەكوۆ،  باس پروكۋرور ق.ءمامي مەن ەكونوميكالىق جانە سىبايلاس جەمقورلىققا قارسى كۇرەس اگەنتتىگىنىڭ توراعاسى ق.قوجامجاروۆ مىرزالاردىڭ قاپەرىنە!» دەگەن ەسكەرتپەمەن «وبلىس اكىمى ب.قۋاندىقوۆ مىرزا، «ءولى مونشاڭىزعا» ەگەلىك ەتىڭىزشى...» نەمەسە ءۇش ازامات ناقاقتان-ناقاق تۇرمەدە نەگە وتىر؟», ەكىنشىسى «جاس قازاق ءۇنى» (№17,27.04.2010ج) گازەتىندە    «قىزىلوردا وبلىسىنىڭ اكىمى ب.قۋاندىقوۆ، وبلىس پروكۋرورى ب.ەسەنبەكوۆ مىرزالار گازەتكە ناقتىلى جاۋاپ بەرۋدەن نەگە جالتارادى؟ الدە قىلمىستى بۇركەمەلەگەندەرىنە قىسىلىپ ءجۇر مە؟» دەگەن تاقىرىپتارمەن جاريالانعاندى...

قر باس پروكۋرورى قايرات ءماميدىڭ نازارىنا!

قۇرمەتتى قايرات مىرزا!

بۇل مەنىڭ گازەت ارقىلى سىزدەن ناقاقتان سوتتى بولعان ازاماتتاردىڭ تاعدىرىنا اراشا بولۋدى سۇراپ جازىپ وتىرعان ءۇشىنشى ماقالام. العاشقى ماقالام «قازاقستان - ZAMAN» گازەتىندە    ( №35, 03.09. 2009ج.) «قر پرەزيدەنتى اكىمشىلىگىنىڭ باسشىسى ا.ءمۋسيننىڭ نازارىنا، قر جوعارى سوتىنىڭ توراعاسى م. الىمبەكوۆ،  باس پروكۋرور ق.ءمامي مەن ەكونوميكالىق جانە سىبايلاس جەمقورلىققا قارسى كۇرەس اگەنتتىگىنىڭ توراعاسى ق.قوجامجاروۆ مىرزالاردىڭ قاپەرىنە!» دەگەن ەسكەرتپەمەن «وبلىس اكىمى ب.قۋاندىقوۆ مىرزا، «ءولى مونشاڭىزعا» ەگەلىك ەتىڭىزشى...» نەمەسە ءۇش ازامات ناقاقتان-ناقاق تۇرمەدە نەگە وتىر؟», ەكىنشىسى «جاس قازاق ءۇنى» (№17,27.04.2010ج) گازەتىندە    «قىزىلوردا وبلىسىنىڭ اكىمى ب.قۋاندىقوۆ، وبلىس پروكۋرورى ب.ەسەنبەكوۆ مىرزالار گازەتكە ناقتىلى جاۋاپ بەرۋدەن نەگە جالتارادى؟ الدە قىلمىستى بۇركەمەلەگەندەرىنە قىسىلىپ ءجۇر مە؟» دەگەن تاقىرىپتارمەن جاريالانعاندى...

كەلىتىرىلگەن ماقالا اتتارىنان-اق بايقاپ وتىرعان بولارسىز، اڭگىمە وسىدان ەكى جىل بۇرىن  شيەلى اۋداندىق سوتىنىڭ توراعاسى س.سۇلەيمەنوۆ، اۋدان اكيماتىنىڭ «شيەلىنى كوركەيتۋ» مەكەمەسىن تاراتۋ تۋرالى قاۋلىسىنان سوڭ، اتالعان مەكەمەنى تاراتۋ كوميسسياسى قۇرىلىپ،  اۋداندىق سالىق كوميتەتىنىڭ توراعاسى دانابەك ەرماعانبەتوۆ، بانكروتقا كەتىپ جاتقان كاسىپورىن ديرەكتورى ەدىل جۇبانىشبەكوۆ، باس ەسەپشى مۇحامەديار ءجۇسىپ اتالىنعان مەكەمەنىڭ قىزىلوردادا تۇراتىن 100 ورىندىق مونشا عيماراتىن 0,45 گەكتار جەرىمەن باس پايدالارىنا جاراتىپ، ولار تەرگەۋ قورىتىندىسىمەن سول مونشانى ساتۋدان تۇسكەن مەملەكەتكە 29 848 000 تەڭگە زيان كەلتىرگەنىن سوت وندىرىسىندە انىقتاپ، «...ەرماعانبەتوۆ دانابەك قۋاندىقۇلىن قازاقستان رەسپۋبليكاسى قك-ءنىڭ 176 بابىنىڭ 3 بولىگىنىڭ «ا،ب،گ» تارماقتارىمەن جانە 307 بابىنىڭ  2 بولىگىمەن كىنالى دەپ تاۋىپ، قك-ءنىڭ  176 بابىنىڭ  3 ءبولىمىنىڭ «ا،ب،گ» تارماقتارىمەن ونىڭ مۇلكىن تاركىلەپ جانە مەملەكەتتىك قىزمەت لاۋازىمدارىن اتقارۋ قۇقىعىنان جەتى جىلعا ايىرا وتىرىپ،  5 جىلعا باس بوستاندىق ەركىنەن ايىرۋعا، قك-ءنىڭ  307 بابىنىڭ 2 بولىگىمەن ەكى جىلعا باس بوستاندىق ەركىنەن ايرۋعا، قر قك-ءنىڭ   58 بابىنىڭ 3 بولىگىنىڭ تالابىنا ساي قاتاڭدىعى جەڭىلىرەك جازانى نەعۇرلىم قاتاڭ جازاعا ءسىڭىرۋ جولىمەن(!) تۇپكىلىكتى مۇلكىن تاركىلەپ، مەملەكەتتىك قىزمەت لاۋازىمدارىن اتقارۋ قۇقىعىنان  7 جىلعا ايىرا وتىرىپ،  5 جىلعا باس بوستاندىق ەركىنەن ايىرۋ جازاسىن تاعايىنداۋعا، جازاسىن جالپى رەجيمدەگى كولونيادا وتەۋدى بەلگىلەۋگە...» دەپ «اسىعىس، ءارى زاڭسىز» ۇكىم شىعارعان بولاتىن. بۇلاي ايتىپ وتىرعانىمىز، ايىپتالۋشىلاردىڭ سوت شەشىمىنە وراي «...قارجى پوليتسياسى مەن سوت تەرگەۋى جان-جاقتى وبەكتيۆتى جۇرمەي قر قىجك- ءنىڭ 24 بابى ورەسكەل بۇزىلدى...» دەپ وبلىستىق سوتتىڭ قىلمىستىق ىستەر قارايتىن اپەللياتسيالىق القاسىنا  شاعىمدانۋىندا كەلتىرىلگەن، دالەلدى قۇجاتتارى مەن ناقتىلى دەرەكتەرى  ءبىراز ادىلەتسىزدىكتىڭ بەتىن اشىپ بەرگەن-ءدى. بۇل قۇجاتتار مەن دەرەكتەر قىزىلوردا وبلىسىنىڭ اكىمى ب.قۋاندىقوۆ پەن شيەلى اۋدانىنىڭ بۇرىنعى اكىمى ە.مۇستافاەۆ جاساعان زاڭسىزدىقتى  قوماعاي زاڭگەرلەر قالاي بۇركەمەلەپ وتىرعاندىعىن كورسەتتى.

وسى ادىلەتسىزدىككە وراي ءبىزدىڭ جازىپ وتىرعان ءۇش ماقالامىزدان تىس سول كەزدە رەسپۋبليكالىق ءۇش باسىلىم; «قازاقستان» گازەتى «قىلمىس قاي جەرگە بوي تاسالاسا - سول جەرگە الەك كىرەدى.  (№37, 02 10 2008 ج), «جاس الاش» گازەتى «شيەلىشە سوتتاۋ».  (№79, 02.10.2008 ج), «زاڭ گازەتى» «ءولى مونشانىڭ» يەسى كىم؟» (№154, 09.10.2008 ج), «قازاقستان» گازەتى «مەڭدۋانانى جەگەن كىم؟»، (№20 28.05 2009ج) دەگەن تاقىرىپتارمەن   سوتتىڭ  ادىلەتسىز ۇكىم شىعارعاندىعى تۋرالى وتكىر سىن ماقالالار جاريالاپ،  سۋديا س.سۇلەيمەنوۆتىڭ سوت تەرگەۋىن ءبىر جاقتى قاراپ، دۇرىس وتكىزبەگەندىگىن،  تومەنگى ساتىدا شىعارىلعان بۇل ۇكىمدى وبلىستىق سوتتىڭ قىلمىستىق ىستەر جونىندەگى اپەللياتسيالىق القاسى قاراعان كەزدە، كورسەتىلگەن ورەسكەل كەمشىلىكتەرگە ءمان بەرىلۋىن، قولدان ۇيىمداستىرىلعان قىلمىسپەن جازىقسىز سوتتالىپ تۇرمەدە وتىرعان ءۇش ازاماتتىڭ تاعدىرىنا اراشا ءتۇسىپ، ولاردى جەدەل بوستاندىققا شىعارۋىن تالاپ ەتكەندى. ەلباسىمىز ۇنەمى باق-تارداعى سىن ماتەريالدارعا ۋاقتىلى جاۋاپ بەرۋدى قانشاما مىندەتتەپ، ونىڭ ورىندالۋىن قاداعالاۋدى زاڭ ورىندارىنا تاپسىرسا دا، ول سىرقاتتان باسقا مەكەمەلەر تۇگىلى، سول زاڭدىلىقتىڭ مۇلتىكسىز ورىندالۋىن باقىلايتىن ءسىز باسقاراتىن مەكەمە دە تاياۋ ارادا ايىعا قوياتىن ءتۇرى كورىنبەيدى.

رەسپۋبليكالىق پروكۋراتۋرادان گازەتتەردەگى سىنعا  جاۋاپ بولمادى. وسى ارالىقتا سوتتالۋشى ازامات شيەلىلىك دانابەك ەرماعانبەتوۆتەن ءوز تاعدىرىنا اراشا ءتۇسۋ تۋرالى مەنىڭ اتىما سەنىم حاتى مەن ءوز ءوتىنىشى ءتۇستى. وسى ءوتىنىش بويىنشا  قىزىلورداعا بارىپ، ناقتىلى قوسىمشا قۇجاتتاردى تاعى دا ىزدەۋگە تۋرا كەلدى. تاپتىم. «باقساق باقا ەكەن» دەمەكشى، تابىلعان قۇجاتتارعا قاراسام، بۇل ماسەلەگە شىنىمەن-اق  وبلىس اكىمى ب.قۋاندىقوۆتىڭ تىكەلەي قاتىسى بار بولىپ شىقتى. بۇل شارۋانى اياعىنا دەيىن جەتكىزۋ ءۇشىن وبلىستىق اكيمات 14.03.2003 جىلى تاعى دا شيەلى اۋدانىنىڭ شارۋاشىلىق جۇرگىزۋ قۇقىعىنداعى «شيەلىنى كوركەيتۋ» مەملەكەتتىك كوممۋنالدىق كاسىپورىنىن قۇرۋ تۋرالى №450 قاۋلىسىن شىعارادى. وسى جەردە ويلانىپ قارالىقشى، قىزىلوردا قالاسىنا كوممۋنالدىق قىزمەت كورسەتەتىن مەكەمەنى، ءوز كۇنىن ءوزى ازەر كورىپ وتىرعان، قالادان 200 شاقىرىم شالعايداعى شيەلى اۋدانى اكىمدىگىنە اۋدارار باستارىنا نە كۇن تۋدى ەكەن؟.. بۇل ساسقان ۇيرەكتىڭ ارتىمەن سۇڭگىگەن تىرشىلىگى بولاتىن.   وسى قاۋلى نەگىزىندە شيەلى اۋدانىنىڭ اكىمى اپپاراتى 01.04.2003 جىلى №49 ساندى شيەلى اۋدانىنىڭ شارۋاشىلىق جۇرگىزۋ قۇقىعىنداعى «شيەلىنى كوركەيتۋ» مەملەكەتتىك كوممۋنالدىق كاسىپورىنىن قۇرۋ تۋرالى بۇيرىعى ءوز ىزىمەن ومىرگە كەلەدى. جاڭا مەكەمەگە مەملەكەتتىك بولا تۇرا جارعىلىق قارجى قارالمايدى(؟!). بۇل زاڭسىزدىققا كونبەگەن  شيەلى اۋداندىق ادىلەت باسقارماسى 22.11.2005 جىلى «شيەلى كوركەيتۋ» مەكەمەسى جارعىسىنا وزگەرتۋ مەن تولىقتىرۋلار ەنگىزۋىن تىركەۋدەن باس تارتقان ءوزىنىڭ №158 ساندى بۇيرىعىن شىعارادى. اۋداندىق ادىلەت مەكەمەسى تاراپىنان شىعارىلعان بۇل زاڭدى قارسىلىققا اۋدان اكىمشىلىگى قىسىم جاساپ  25.12.2005 جىلى  مەكەمەنىڭ جارعىسى   اۋدان اكيماتىنىڭ №1186 ساندى قاۋلىسىمەن بەكىتىلەدى(؟!...). ماسقارا! وسى قۇجاتتان سوڭ امال جوق 29.12.2005 جىلى اۋداندىق ادىلەت باسقارماسى ءوزىنىڭ №164 بۇيرىعىمەن مەكەمەگە № 110 1933 08 مك تىركەۋ كۋالىگىن بەرەدى. 18.05.2005 جىلى  شيەلى اۋدانىنىڭ اكىمى ءوزىنىڭ №981 قاۋلىسىمەن قىزىلوردا قالاسىنداعى «قىزىلوردا سەرۆيزدى»  ءوز تەريتورياسىنا كىرمەسە دە، «شيەلىنى كوركەيتۋ» مەكەمەسىنە قوسۋ تۋرالى(؟!) زاڭعا سىيىمسىز قاۋلى الادى. قانشاما زاڭسىزدىق، قانشاما زاڭ ورىندارىنىڭ كوزىنە تۇسپەگەن قۇيتىرقى قۇجاتتار!...

مەن وسى قۇجاتتار كوشىرمەسىمەن پرەزيدەنت اكىمشىلىگىنىڭ ۇيىمداستىرۋ ءبولىمىنىڭ مەڭگەرۋشىسى س.قاناەۆ پەن پرەزيدەنت جانىنداعى ادام قۇقىقتارى جونىندەگى كوميسسيا  زاڭگەرلەرىنىڭ قابىلداۋىندا بولدىم. وبلىس اكىمى ب.قۋاندىقوۆ تاراپىنان ورىن العان زاڭسىزدىقتارعا قولداعى قۇجاتتاردى كورسەتە وتىرىپ كوزدەرىن جەتكىزدىم. قابىلداعان ازاماتتار ورىن العان زاڭسىزدىقتارعا باستارىن شايقاي وتىرىپ، تاپسىرىلعان قۇجاتتار كوشىرمەلەرىنىڭ   زاڭدىلىعىن انىقتاپ،  جازباشا تۇردە جاۋاپ بەرۋ ءۇشىن،  مەنىڭ كوزىمشە بىزدەن تۇسكەن شاعىمدى قر باس پروكۋرورى ءسىزدىڭ اتىڭىزعا جولدادى. سىزدەردەن كەلگەن جاۋاپتى سارالاپ،  قوسىمشا وزدەرى دە جازباشا جاۋاپ جازاتىن بولدى. قۇزىرلى ورىننان شىققان وسى ەكى حاتقا قوسىمشا، گازەتتەردەگى ءوزىم جازعان ماقالالاردى تىركەي  وتىرىپ، ءوز اتىمنان ءسىزدىڭ اتىڭىزعا ءۇشىنشى حاتتى دا جولدادىم. ءبىر سوت ۇكىمىنە بايلانىستى ءۇش جەردەن حات بارعان سوڭ، ونىڭ ۇستىنە ماسەلەگە وبلىس اكىمى مەن  پروكۋرورىنىڭ قاتىسى بارلىعى جازىلعان سوڭ، ءوزىڭىز باسقارىپ وتىرعان ۆەدوموستۆانىڭ ابرويىن ويلاساڭىز دا جاۋاپتى ءبىر قىزمەتكەرىڭىز قىزىلورداعا ارنايى سوعىپ، ماسەلەنىڭ ءمان جايىن اشىپ قايتار دەگەن ءۇمىت بولعاندى. بىراق  زاڭدىلىقتىڭ بۇزىلماۋىن باقىلايتىن ءسىز باسقاراتىن رەسپۋبليكاداعى باستى مەكەمە بۇل ءۇمىتتى اقتامادى. تۇسكەن شاعىم  ءبىر دەپورتامەنتتەن ەكىنشى دەپورتامەنتكە اۋىسۋمەن ءجۇرىپ الدى. بولماعان سوڭ ءوز قابىلداۋىڭىزعا وڭايلىقپەن قول جەتپەيتىن بولعان سوڭ، باسقارما پروكۋرورى ە.التىنبەكوۆتىڭ قابىلداۋىندا بولدىم.  اڭگىمە بارىسىندا باس پروكۋراتۋردا ادام تاعدىرىنا ات ءۇستى قارايتىن وسىنداي كادرلاردىڭ وتىرعانىنا قايران قالدىم. بۇل ازامات ارىزدا كورسەتىلگەن ۋاجدەردى تەكسەرۋ ماقساتىندا قىزىلوردا وبلىسىنىڭ پروكۋراتۋراسىنان سۇراتىلعان قىلمىستىق ءىستى قاراپ، ءىستى ودان ءارى زەردەلەۋ ءۇشىن باستىعىنا جارتى بەت راپورت جازىپ، ەكىنشى  دەپورتامەنتكە وتكىزگەنىن ايتتى. مەن;

- ءسىز سوت ۇكىمىنىڭ حاتتاماسىمەن تولىق تانىسىپ شىققان بولساڭىز، اۋداندىق سوت ءوز وندىرىسىندە ايىپتىلار مونشانى ساتۋدان مەملەكەتكە 29 848 000 تەڭگە زيان كەلتىرگەنىن انىقتاپ، سول ءۇشىن جاۋاپتىلاردى قىلمىسكەر ەتىپ كورسەتكەن. كەلتىرىلگەن وسى زيانعا بايلانىستى ۇكىم شىعارىلعان سوڭ، سول قارجىنىڭ شىققان جەرىن انىقتاۋ كەرەك ەدى. ونداي قۇجات جوق.  جالپى مەملەكەت بيۋدجەتىنەن ءبولىندى دەگەن وسى قارجى شىنىمەن بولعان با جانە شىنىمەن-اق  «شيەلى كوركەيتۋ» مەكەمەسىنە جەتكەن بە، ءبىز وسىنى سوت حاتتامسىنان تاپپاي ءجۇرمىز؟ -دەگەن ساۋالىمىزعا;

-اۋداندىق سوت بۇل ماسەلەگە بايلانىستى كەزىندە ارنايى جەكە قاۋلى شىعارۋى كەرەك ەدى، شىعارماپتى. مەن بۇل تۋرالى باستىعىما جازعان ءوز راپورتىمدا كورسەتتىم. ءىستى ودان ءارى زەردەلەيتىن دەپورتامەنت وبلىستىق اكىمشىلىك العان قاۋلىلاردىڭ زاڭدىلىعىن تەكسەرگەندە، بۇل ماسەلەنى دە تولىق قامتيتىن بولادى... دەپ قيپاقتاپ قالدى. بىزدىڭشە، اۋداندىق سوتتىڭ وسى كەمشىلىگىن كورسەتۋ ارقىلى دا رەسپۋبليكالىق پروكۋراتۋرا تاراپىنان قاداعالاۋ شاعىمىن كەلتىرۋگە بولاتىن ەدى عوي. ونداي نيەت جاسالمادى، ادام تاعدىرىنا بايلانىستى  شاعىمنىڭ قاراۋ مەرزىمىنىڭ ۇزارتىلۋىنا قاراعاندا، ارالىقتا ءبىراز «كۇپتى» ماسەلەلەر بولعان سياقتى... بۇلاي ويلاۋعا سوتتا وسى ءىستىڭ ات ءۇستى قارالۋىنا ۇيتقى بولعان شيەلى اۋدانىنىڭ پروكۋرورى سول كەزدە اعا كومەكشى لاۋازىمىمەن ءسىزدىڭ باس كەڭسەڭىزدەن شىعا كەلۋى دە سەبەپ بولىپ وتىر. ..

سودان شاعىم جەتكەن ەكىنشى دەپورتامەنتكە شاپقىلادىق. وبلىستىق اكيمات العان قاۋلىنىڭ زاڭدىلىعىن زەردەلەپ انىقتاۋعا ءتيىستى بۇل دەپورتامەنت  قىزمەتكەرلەرىنىڭ تىرلىگى العاشقىدان دا سوراقى بولىپ شىقتى. وزدەرىنە، دايەكتەپ زەردەلەۋ ءۇشىن جولدانعان شاعىمدى، كىدىرتپەستەن دەپورتامەنت باستىعى ا.كراۆچەنكونىڭ قولىمەن 13 مامىر كۇنگى №7/433-10 حاتپەن قىزىلوردا وبلىستىق پروكۋراتۋراسىنا جولداعانشا اسىعىپتى. وبلىس پروكۋرورى تاراپىنان ورىن الىپ وتىرعان كەمشىلىكتى كورسەتكەن شاعىمدى سول پروكۋرورودىڭ ءوز اتىنا جولداۋدى قاي زاڭدىلىققا نەمەسە ەتيكاعا سىيدىرۋعا كەلەدى؟...

ۇيات-اق. بالكىم، «يت ءيتتى جۇمسايدى، يت قۇيرىعىن جۇمسايدى» دەگەن وسى بولار. زاڭسىز قامالىپ ءۇش ازامات اباقتىدا جاتىر، ءسىز باسقارىپ وتىرعان ادىلدىككە جاناشىر بولار دەگەن رەسپۋبليكا پروكۋراتۋراسى قىزمەتكەرلەرىنىڭ ىستەپ وتىرعان تىرلىگى مىناۋ. سوندا رەسپۋبليكالىق جاۋاپتى مەكەمەدە ورىن الىپ وتىرعان مۇنداي جاۋاپسىزدىقتى كىم كورۋى ءتيىس ؟..

<!--pagebreak--><!--pagebreak-->

بۇل زاڭسىزدىقتىڭ اياعى قاي جەرگە جەتىپ جىعىلار ەكەن دەگەن نيەتپەن اراعا  ەكى اپتا سالىپ، قىزىلورداعا جەتتىك. وبلىس پروكۋرورى ب.ەسەنبەكوۆ مىرزا قىرىق سىلتاۋ ايتىپ، قابىلداۋدان قاشقاقتاي باستادى. كەيىن ءمالىم بولعانداي وزدەرىنە تۇسكەن شاعىمعا بايلانىستى مەنىڭ اتىما 24  مامىر كۇنى شىعارىپ سالما جاۋابىن جىبەرىپ تە قويعان ەكەن. سول حاتتىڭ كوشىرمەسىن كورسەتە وتىرىپ سويلەسۋگە بولاتىن ەدى عوي. ولاي جاساي المادى...  وزدەرىنە تۇسكەن ءبىزدىڭ شاعىممەن اينالىسقان جاۋاپتى قىزمەتكەر ا. سايفۋلماليكوۆ وڭتۇستىك قازاقستان وبلىسىنان اۋىسىپ كەلگەن پروكۋروردىڭ ورىنباسارى ەرجان ەراليەۆتىڭ قابىلداۋىنا كىرگىزدى. شاعىمعا بايلانىستى اششىلاۋ سوزدەر ايتىلدى. اڭگىمە سوڭى ناسىرعا شاۋىپ بارا جاتقانىن سەزگەن ورىنباسار دارمەنسىزدىكتەن پروكۋرورعا ءوزى ەرتىپ كىردى. اراداعى اڭگىمەنىڭ ءمان جايى تولىق باياندالعانشا قىپ-قىزىل بولىپ، ءۇن-ءتۇنسىز وتىرعان پروكۋرور ب.ەسەنبەكوۆ  شاعىمدى وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپورتامەنتىنە جىبەرتىپ، ءىستى قاداعالاۋدى ە.ەرجانوۆتىڭ تىكەلەي وزىنە تاپسىردى. قابىلداۋدان كوڭىلىمىز قوڭالتىقسىپ شىقتى. وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپورتامەنتى ءاربىر تەرگەۋ جۇمىستارىن سوتقا جىبەرەردە وبلىستىق پروكۋراتۋرا باقىلاۋى ارقىلى وتكىزەدى. بار جۇمىسىنىڭ كورسەتكىشى وسى مەكەمەگە تىكەلەي بايلانىستى. سونداي جاعدايدا بۇل مەكەمە ءوز قىزمەتىن قاداعالايتىن پروكۋراتۋرانىڭ كەمشىلىكتەرىن قالاي كورسەتپەك؟..

اتالىنعان مەكەمە باستىعى نۇرلان قامباتىروۆ مىرزا ءوز قىزمەتىنە جاڭادان كەلىپ جاتقان كەزى ەكەن. ءبىزدىڭ شاعىمدى وزىمەن بىرگە كەلگەن ورىنباسارى ت.شىنتاەۆقا جۇكتەدى. اتاسىنا راحمەت.  دەپورتامەنت باستىعىنىڭ ورىنباسارى تەرگەۋ الدى تەكسەرۋ جۇمىستارىن جەدەل قولعا الدى. ناتيجيەسىندە 06.11.2010 جىلى قوسىمشا ناقتى قۇجاتتارعا سايكەس №12-8/12778 ساندى تەكسەرۋ اكتىسى جانە جەكە مەنىڭ اتىما حات ازىرلەندى. الدىمەن حاتتاعا مىناداي دەرەكتەرگە نازار اۋدارالىق.

«...ارىزداعى ««بەيبارىس» جشس-نە بيۋدجەتتەن 29 848 000 تەڭگە اۋدارىلعان با؟» دەگەن ماسەلەگە وراي;

«...ەكونوميكالىق جانە الەۋمەتتىك دامۋ قورىنان قىزىلوردا ارنايى ەكونوميكالىق ايماعىنىڭ اكىمشىلىك كەڭەسىنىڭ شەشىمىمەن «ايجان» شجق-نا «قىزىلوردا ريسماش» زاۋىتىن قالپىنا كەلتىرۋگە جانە جاتكالىق ماشينالار شىعارۋ ءۇشىن 20.05.1997 جىلى №31 ساندى جانە 02.09.1997 جىلعى №74 ساندى كەلىسىم شارتتارىمەن قوردىڭ ەسەبىنەن 30 ميلليون تەڭگە نەسيە بەرىلگەن. كەيىننەن قىزىلوردا ارنايى ەكونوميكالىق ايماعىنىڭ قىسقارتىلۋىنا بايلانىستى قىزىلوردا قالاسىنىڭ اكىمى 12.04.1999 جىلى №196 قاۋلىسىمەن بۇل قارجىنىڭ قايتارىپ الۋ قۇقىعىن «قىزىلوردا» مم-نە بەرگەن. وبلىس اكىمىنىڭ 14.01.2000 جىلعى №133 شەشىمىمەن «قىزىلوردا» مم-ءنىڭ  29 848 000 تەڭگە دەبيتورلىق قارىزى «قىزىلوردا سەرۆيز» مكك-نا وتكەن..»

وسى جەردە حاتتاعى وسى ءۇزىندى مەن №12-8/12778 اكتىدەگى تىركەلىپ كورسەتىلگەن ناقتىلى قۇجاتتارعا ساي مىناداي پىكىر ايتقىمىز كەلىپ وتىر. شجق «ايجانعا» (ج.ش.س بەيبارىس) قىزىلوردا ارنايى ەكونوميكالىق ايماعى اكىمشىلىك كەڭەسى توراعاسىنىڭ 28.05.1997 جىلعى №17-ءشى قاۋلىسىمەن جانە «قازاگروپرومبانك» قىزىلوردا فيليالىنىڭ 20.05. جانە 02.09.1997 جىلعى 31-ءشى  جانە 74-ءشى نومەرلى كرەديتتىك كەلىسىم-شارتتارى نەگىزىندە 6-ايعا دەيىنگى 8% نەسيەمەن جالپى سوماسى 30 ملن. تەڭگە بەرىلگەن. ياعني 20.05.1997 جىلى الىنعان 20 ملن. تەڭگە نەسيەنىنىڭ تولىق وتەۋ مەرزىمى 20.11.1997 جىل، ال 02.09.1997 جىلى الىنعان 10 ملن.تەڭگە نەسيەنىڭ تولىق وتەۋ مەرزىمى 28.02.1998 جىلعا دەيىن. (كەلىسىم-شارتتاعى ەكى جاقتى قول قويىپ ءمور باسىلعان مالىمەتتەر قولىمىزدا). بۇل 30 ملن. تەڭگە نەسيە مەرزىمىندە وتەلمەگەن. وسىنى بىلە تۇرا قالا اكىمى 12.04.1999 جىلعى ءوزىنىڭ №196-شى قاۋلىسىمەن  30 ملن.تەڭگەنى 8% مولشەرىمەن قايتارىپ الۋ قۇقىعىن قاي زاڭعا سايكەس "قىزىلوردا» مم-نە بەرگەن؟ نە سەبەپتى كەلىسىم-شارتتا كورسەتىلگەندەي  بۇل قارجىنى ءوندىرىپ الۋدى زاڭعا سايكەس سوتقا جۇگىنىپ مەملەكەتكە ءوندىرىپ الۋ شارالارىن ۇيىمداستىرماعان؟ ەڭ قىزىعى نەسيە الۋ كەزىندە كەپىلدىككە قويعان مۇلىكتەر قايدا كەتكەن؟ حاتىمىزعا قايتا ورالايىق; «...مونشا تۋرالى;

«... الدىن الا تەكسەرۋ مەن قۇجاتتاردى زەردەلەۋ بارىسىندا، قىزىلورودا قالاسى پرولەتارسكايا كوشەسى №1 مەكەن جايدا ورنالاسقان مونشا عيماراتىنىڭ مەنشىك يەلەرى بىرنەشە رەت  اۋىسىپ وتىرعاندارى بەلگىلى بولدى.

07.07.1992 جىلى قىزىلوردا قالاسى اكىمشىلىگىمەن كەلىسىم شارتقا سايكەس 197 مىڭ سومعا ۆ.ديۋزەنوۆكە ساتىلعان.

قىزىلوردا قالاسى اكىمشىلىگى مەن ۇجىمدىق مونشانىڭ باسشىسىنىڭ 31.08.1992 جىلعى بىرلەسكەن وتىرىسىنىڭ قاۋلىسى شىعىپ، سوعان سايكەس 08.09.1993 جىلى شەشىممەن مونشا مەملەكەتتىك مەنشىككە  قايتا الىنىپ، وبلىستىق تۇرعىن ءۇي كوممۋنالدىق شارۋاشىلىق بالانىسىنا بەرىلگەن.

قىزىلوردا وبلىسى بويىنشا قر جەكەشەلەندىرۋ جونىندەگى مەملەكەتتىك كوميتەتىمەن 02.10.1995 جىلى مونشا عيماراتىن ساتۋعا كونكۋرس وتكىزىلىپ، ونىڭ جەڭىمپازى «ايجان» شجق  76 مىڭ تەڭگەگە ساتىپ الدى دەپ  تانىلىپ، بۇل جونىندە 06.10.1995 جىلى №1009 ساندى ەكەۋ ارا كەلىسىم شارت جاسالىپ، 18.10.1995 جىلى جەكەشەلەندىرۋ جونىندەگى مەملەكەتتىك كوميتەتى وبلىستىق تۇرعىن ءۇي كوممۋنالدىق شارۋاشىلىعىمەن ءۇش جاقتى الىس بەرىس اكتىسى نەگىزىندە «ايجان» شجق-نا وتكەن.

«ايجان» شجق-ى 20.11.1997 جىلى «بەيبارىس» جشس-ءى دەگەن اتاۋمەن وزگەرتىلىپ، قايتا قۇرىلعان.

«بەيبارىس» جشس-ءى «ايجان» شجق-نىڭ كەزىندەگى قۇرالعان قارىزدىڭ ەسەبىنەن 15.04.2004 جىلعى كەلىسىم شارت نەگىزىندە  «قىزىلوردا سەرۆيس» مكق-نىڭ بالانىسىنا بەرگەن.

شيەلى اۋدانى اكىمىنىڭ 18.05.2005 جىلعى №981 ساندى قاۋلىسىمەن «قىزىلوردا-سەرۆيس» مكك-نى قۇقىتارى مەن مىندەتتەرى قوسا «شيەلى كوركەيتۋ» مكك-نا قوسىلۋىنا بايلانىستى، 29.12.2005 جىلعى №164 ساندى بۇيرىقپەن اتالىنعان مونشا بالانىسقا الىنعان...

حاتتاعى  جانە اكتىدەگى ناقتى  دەرەكتەردىڭ ءوزى-اق بارلىق جايدىڭ ءمانىن اشىپ بەرىپ وتىرعان جوق پا؟ العاشقى ساۋدادا جەكە ادامعا 197 مىڭ سومعا ساتىلعان مونشا كەيىنگى  «ايجانعا» ساتىلعاندا ودان دا قۇنسىزدانىپ 76 مىڭ تەڭگەگە ءتۇسىپتى. وسىنداي توزىعى جەتكەن مونشانى مەلەكەت ەسەبىنە  قايتادان 29 848 000 تەڭگەگە قايتارىپ الار وبلىس اكىمدىگىنىڭ باسىنا نە كۇن تۋدى ەكەن؟.. اۋداندىق سوت ءوز ۇكىمىن شىعاراردا وسى ماەلەگە قاساقانا نەگە نازار اۋدارمادى، كىمنىڭ جىرتىسىن جىرتقىسى كەلدى ؟!..

وبلىستىق پروكۋراتۋرا مەنىڭ اتىما جازعان شىعارىپ سالما حاتىندا «قىزىلوردا سەرۆيس» مكك-نىڭ تاراتىلىپ، «شيەلىنى كوركەيتۋ» مكك-نا مۇلكى مەن قىزمەتكەرلەرىن قوسۋدىڭ زاڭدىلىعىن تەكسەرۋ تۋرالى ساۋالىما;

«... وسىعان وراي، ياعني اتالعان قىلمىس توڭىرەگىندە جاڭادان اشىلعان ءمان جايلار بويىنشا 06.05.2010 جىلى وبلىستىق پروكۋراتۋرامەن قارجى پوليتسيا دەپورتامەنتىنىڭ قىلمىستار تۋرالى ارىزداردى تىركەۋ كىتابىنا تىركەۋ جولىمەن قوسىمشا تەكسەرۋ جۇمىستارىن جۇرگىزۋ جايلى تاپسىرما جولدانىپ، ونىڭ ورىندالۋى باقىلاۋعا الىندى. اتاپ ايتقاندا، «قىزىلوردا سەرۆيس» جشس-نە قىزىلوردا قالاسى، قۇلتەكەنوۆ كوشەسى №1 ۇيدە ورنالاسقان 100 ورىندىق مونشا جانە «قىزىلوردا سەرۆيس» جشس-گى شيەلى اۋدانى اكىمى اپپاراتىنا قالاي بەرىلگەندىگى، «قىزىلوردا سەرۆيس» جشس-گى مەن «شيەلى كوركەيتۋ» مكك-نى ەكەۋىنىڭ بىرىكتىرۋ زاڭدىلىعىنا تەكسەرۋ جۇرگىزۋدى، «قىزىلوردا سەرۆيس» جشس-نە 29 848 000 تەڭگەنىڭ قانداي ماقساتتا اۋدارىلعانىن تەكسەرىپ، پروتسەسسۋالدىق شەشىم قابىلداۋ تاپسىرىلدى...» دەگەن ءوز قىزمەتى نەمەن اينالىساتىنىن بىلمەيتىن ساۋاتسىز جاۋابىن وقىعاندا ايتارعا ءسوز تاپپاعان ەدىم. وسى جاۋابىنا وراي وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپورتامەنتى  باستىعىنىڭ ورىنباسارى ت.شىنتاەۆتىڭ جاۋابىندا; «جيناقتالعان قۇجاتتار بويىنشا، جوعارىداعى اتالعان مەكەمەلەرگە قاتىستى شىعارىلعان قاۋلىلاردىڭ زاڭدىلىعىنا ءتيىستى باعا بەرۋ پروكۋراتۋرا ورگاندارىنىڭ تىكەلەي قۇزىرەتىندە ەكەندىگىن ەسىڭىزگە سالامىن» دەپ پروكۋروردىڭ سول ساۋاتسىزدىقتارىن ادەمى بەتتەرىنە باسىپتى. بۇل پىكىرگە ءبىزدىڭ جوعارىداعى اتالىنعان اكتىدەگى كورسەتىلگەن قۇجاتتارعا وراي تاعى دا مىناداي قوسارىمىز بار; «قىزىلوردا» مم-ءنىڭ قۇرىلتايشىسى وبلىس اكىمى 05.01.2000 جىلى №126-شى قاۋلىسىمەن وسى اتالعان مەكەمەنى قايتا قۇرۋ نەگىزىندە شارۋاشىلىق جۇرگىزۋ قۇقىعىنداعى ەكى مەملەكەتتىك مەكەمەنى جاڭادان اشۋ جونىندە كوميسسيا قۇرىپ  جانە وسى كوميسسياعا تاراتۋ بالانسىن 2000 جىلدىڭ 13-ءشى قاڭتارعا دەيىن بەكىتۋدى تاپسىرادى. بۇل قاۋلىنىڭ ورىندالۋى سول كەزدەگى وبلىس اكىمىنىڭ ورىنباسارى ب.قۋاندىقوۆقا جۇكتەلەدى. وسى قاۋلىعا سايكەس كوميسسيا مۇشەلەرى 05.01.2000 جىلى سول كۇنگە جاڭادان اشىلماعان بەلگىسىز ەكى مەملەكەتتىك مەكەمەگە تاراتۋ بالانسىن جاساپ ونى سول كۇنى بەكىتەدى(!). بۇل جاڭادان اشىلاتىن مەكەمەنىڭ بىرەۋى «قىزىلوردا-سەرۆيس» مەملەكەتتىك كوممۋنالدىق كاسىپورىنى قىزىلوردا ادىلەت باسقارماسىنا 20.01.2000 جىلى عانا №3842-1933-مك نومەرىمەن تىركەلگەن. ال ەندى قر ازاماتتىق كودەكسىنىڭ 47-ءشى بابىندا «قايتا قۇرىلعان زاڭدى تۇلعانىڭ مۇلىكتىك قۇقىقتارىمەن مىندەتتەرى جاڭادان پايدا بولعان زاڭدى تۇلعاعا بولىنگەن جانە ءبولىپ شىعارىلعان جاعدايدا ءبولۋ بالانسىنا سايكەس اۋىسادى. ايىرۋ بالانسىندا قايتا قۇرىلعان زاڭدى تۇلعانىڭ بارلىق نەسيە بەرۋشىلەرىمەن بورىشقورلارىنا قاتىستى، بارلىق مىندەتتەمەلەرى بويىنشا سونىڭ ىشىندە تاراپتار داۋلاسقان مىندەتتەمەلەر بويىنشا دا قۇقىقتى ميراسقورلىعى تۋرالى ەرەجەلەرى بولۋى ءتيىس»- دەلىنگەن. سوندا زاڭ نە دەپ تۇر، زاڭدى بەلىنەن با سقان اكىمشىلىك قاۋلىسى نە دەپ تۇر؟..

قادىرلى قايرات، ءوزىڭىز ايتىڭىزشى، شىندىعىندا الىنعان قاۋلىلاردىڭ زاڭدىلىعىنا باعا بەرۋ كىمنىڭ مىندەتى؟ ويتكەنى، ءبىزدىڭ بۇل ساۋالىمىزعا وبلىستىق پوكۋروردىڭ ساۋاتى جەتىڭكىرەمەي وتىرعانىن ءوزىڭىز وقىپ وتىرسىز. ال بۇل جاۋاپ وسى ءىس بويىنشا بىزگە وتە قاجەت بولىپ وتىر...

سوڭعى ايتىلار اڭگىمە مەملەكەتتىك ورگانداردىڭ زاڭ ورىندارىنان تۇسكەن حاتتارعا جالعان جاۋاپ بەرەتىندىكتەرى. وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپورتامەنتى باستىعىنىڭ ورىنباسارى قىزىلوردا وبلىسى اكىمىنىڭ ورىنباسارى م.الدوڭعاروۆقا، وبلىستىق ماسليحات حاتشىسى ن.قۇدايبەرگەنوۆكە، قىزىلوردا قالاسىنىڭ اكىمى م.ەرگەشباەۆقا، وبلىستىق قارجى باسقارماسىنىڭ باستىعى ت.ىلياسوۆقا، وبلىستىق مۇراعاتتار مەن قۇجاتتاما باسقارماسىنىڭ باستىعى ع. جارقىنباەۆقا حاتتار جولدادى. سول حاتتارعا قالا اكىمىنىڭ ورىنبارى ب.كولباەۆ; «قىزىلوردا سەرۆيس» مكك-نى قىزىلوردا قالاسىنىڭ كوممۋنالدىق مەنشىگىندە تىركەلمەگەندىكتەن ءتيىستى مالىمەت پەن قاجەتتى قۇجاتتار بەرۋگە مۇمكىندىك جوق ەكەندىگىن مالىمدەيمىز» دەسە، وبلىستىق ماسليحات اپپاراتىنىڭ جەتەكشىسى م.قوسمامبەتوۆ; «ءسىزدىڭ سۇرانىسىڭىزعا بايلانىستى مالىمەتتەردى بەرۋدىڭ مۇمكىندىگى جوق ەكەندىگىن جەتكىزەمىن», وبلىتىق قارجى باسقارماسى باستىعىنىڭ ورىنباسارى س.مىرزاشەۆ; «باسقارما جىلدىق قارجى شارۋاشىلىق قىزمەتى جونىندەگى ەسەپتەرىن 2006 جىلدان باستاپ جيناقتاۋدا. 2000-2005 جىلدار ارالىعىندا قارجى شارۋاشىلىق جونىندە ەسەپ تاپسىرىلماۋىنا بايلانىستى ءسىز سۇراتقان مالىمەتتەردى ۇسىنا المايتىنىمىزدى حابارلايمىز», وبلىستىق مۇراعاتتار مەن قۇجاتتاما باسقارماسى باسقارما باستىعى ع.جارقىنبەكوۆ; «قىزىلوردا قالاسى اكىمىنىڭ تاراپىنان شىققان 1999-2001 جىلعى قۇجاتتاردان «قىزىلوردا سەرۆيز» مەكەمەسى جونىندە مالىمەتتەر تابىلمادى» دەسە قىزىلوردا وبلىسىنىڭ مەملەكەتتىك مۇراعاتى ديرەكتورىنىڭ مىندەتىن اتقارۋشى گ.راحمەتوۆا دا وسى جاۋاپتى قايتالاپتى. بارلىق جاۋاپ ءۇش-ءتورت قاتاردان اسپايدى.تەك وبلىس اكىمى اپپارات باسشىسى ك.جايساڭباەۆ وبلىس اكىمدىگى تاراپىنان الىنعان قاۋلىلاردىڭ زاڭدىلىعى تۋرالى ەشتەڭە ايتپاعانىمەن، ءوز جاۋاپ حاتى سوڭىندا مىناداي دەرەك كەلتىرىپتى; «...مونشا عيماراتىنا قاتىستى. قىزىلودا وبلىسى بويىنشا قر جەكەشەلەندىرۋ جونىندەگى مەمەكەتتىك كوميتەتىمەن 1995 جىلعى 2 قازانداعى قىزىلوردا قالاسى، پرولەتارسكايا كوشەسى (قازىرگى كەزدە كۇلتەكەنوۆا 1) مەكەن جايىنا ورنالاسقان مونشا عيماراتىن ساتۋ بويىنشا كونكۋرس (اۋكتسيون) وتكىزىلىپ، ونىڭ جەڭىمپازى «ايجان» شجك بولىپ تانىلعان. اتالعان شجك-مەن وتىرعان 1995 جىلعى 6 قازانداعى №1009 ساتىپ الۋ-ساتۋ شارتىنا سايكەس جەكەشەلەندىرۋ وبەكتىسىنىڭ باعاسى 152 مىڭ تەڭگە بولىپ تابىلدى.

2004 جىلعى 15 ساۋىردەگى كەلىسىم شارت نەگزىندەگى «بەيبارىس» جشس («ايجان» شجك) اتالعان مونشانى  29 848 مىڭ تەڭگە قۇرايتىن قارىزدى وتەۋ ءۇشىن «قىزىلوردا سەرۆيز» مكك-نا بەرىلگەندىگىن حابارلايمىز». بۇل جاۋاپ وبلىستىق اكىمشىلىكتىڭ ءوز قولىمەن جاسالعان قىلمىستى ادەمى اشىپ بەرىپ تۇرعان جوق پا؟. سوسىنعى ءبىر قاتتىراق قاداپ ايتار ماسەلە، جوعارىدا «ەش قۇجات تابىلمادى» دەگەن مەكەمەلەردەن «رەتىن» كەلتىرىپ، بىزگە قاجەتتى قۇجاتتاردىڭ ءبارىن تاۋىپ، كوشىرمەلەرىن الدىق. ءتىپتى ايلىق تۇگىلى التىن بەرسەڭ دە ءسىزدىڭ قىزمەتكەرلەر تابا المايتىن، بۇل كۇندە جويىلىپ كەتكەن اگروبانك قۇجاتتارىن دا تاپتىق. سوندا زاڭ ورىندارىنا جالعان جاۋاپ بەرگەن اتالىنعان مەكەمە باسشىلارىنان جاۋاپكەرشىلىكتى كىم سۇرايدى؟

سونىمەن جيناقتالعان قۇجاتتار بويىنشا قىلمىس قۇرامى بار ما، جوق پا؟ بىزدىڭشە بار جانە جەتكىلىكتى. ولار ءبىز جانكەشتىلىكپەن تاۋىپ كەلتىرگەن قۇجاتتار ارقىلى تولىق كورىنىپ وتىر. بىراق، بار دەپ ايتۋعا ءوز كەمشىلىگىن جاسىرىپ باققىسى كەلەتىن وبلىستىق پروكۋرور بۇل قادامعا قالاي بارماق؟ ارينە بارمايدى.

راس، جوعارى سوتقا دەيىن بەكىپ كەتكەن سوت ۇكىمىن جوققا شىعارۋ تىپتەن دە وڭاي شارۋا ەمەس. ول  ۇكىمدى بۇزۋ، قانشاما زاڭ قىزمەتكەرلەرىنىڭ جاۋاپكەرشىلىگىن قاراتادى. ءتىپتى سوتتاعان سۋديالاردىڭ وزدەرى دە سوتتى بولىپ كەتۋى مۇمكىن. بۇل وڭاي شارۋا ەمەس. بىراق سولاقاي شەشىم شىعارعان سوتتاردى قورعايمىز دەپ، جازىقسىز ادامدى جاۋاپقا تارتۋ قاي ادىلەتتىلىككە جاتادى؟ ادىلەتسىز سوتتاۋ دەگەن وسەر ادامنىڭ بۇكىل تاعدىرىنا بالتا شابۋ ەمەس پە؟ مۇنداي ادىلەتسىزدىككە كەزىندە ەلباسى اۋزىنان ءوزىڭىز دە ىلىگىپ، كەيىننەن ادىلدىك ۇستەمدىك قۇرىپ، قىزمەتىڭىزگە ورالىپ، ءسىز جوعارى سوتتىڭ توراعاسى، باس پروكۋرور بولىپ، قازاقستانداعى بۇگىنگى زاڭ جۇيەسىنىڭ قالىپتاسۋىنا ۇلەسىڭىزدى قوستىڭىز. وسىنىڭ ءبارى ءوز-ءوزىڭىزدى سول جالادان اقتاي ءبىلۋىڭىزدىڭ ناتيجيەسى. جالانىڭ ۇلكەن كىشىسى جوق.

قايرات مىرزا! ءدال وسىنداي قيانات ءبىز قورعاپ وتىرعان مىنا ازاماتتاردىڭ دا باسىنا ءتۇسىپ وتىر. ءادىل قاداعالاۋ-تەكسەرۋ جۇمىستارى بولسا، جازىقسىز جاۋاپتى بولعان ازاماتتاردىڭ دا ماڭدايلارى جارقىرار ەدى...

سىزدەن وتىنەرىم، قۇقىق قورعاۋ ورىندارى تاراپىنان ورىن العان وسى ءبىر كوررۋپتسيالىق قىلمىسقا ءوزىڭىز نۇكتە قويىپ، زاڭسىز سوتتى بولعان وسى ءۇش ازامات پەن ولاردىڭ جازىقسىز جاپا شەگىپ وتىرعان جانۇياسىنا قامقور قولىڭىزدى سوزا كورىڭىز؟..

وزىڭىزگە دەگەن سەنىممەن، جازۋشى-جۋرناليست باقتىباي اينابەكوۆ