استانا. 18 قاڭتار. قازتاگ – قر مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ پەن مالايزيا سىرتقى ىستەر ءمينيسترى داتۋك انيفا امان تەلەفون ارقىلى بولعان سۇحباتىندا يكۇ اياسىنداعى ىنتىماقتاستىق ماسەلەلەرىن قاراستىردى، دەپ قر ءسىم ءباسپاسوز قىزمەتى حابارلادى.

«اڭگىمەلەسۋشى تاراپتار، قازاقستان پرەزيدەنتى نۇرسۇلتان نازارباەۆ پەن مالايزيا پرەمەر-ءمينيسترى نادجيب تۋن ابدۋل رازاكتىڭ اعىمداعى جىلعى كەزدەسۋى قوسىمشا سەرپىلىس بەرەدى دەپ كۇتىلىپ وتىرعان قازاقستان مەن مالايزيا اراسىنداعى ىنتىماقتاستىق جاعدايى مەن بولاشاعىن تالقىعا سالدى»، - دەلىنگەن قر ءسىم ءباسپاسوز قىزمەتى سەيسەنبى كۇنى تاراتقان حابارىندا.

قۇجاتتا ايتىلعانداي، «ەكى ەلدىڭ كوشباسشىلارىنىڭ كەزدەسۋىن جەمىستى دايىنداۋ ماقساتىندا، سونىمەن قاتار ەكىجاقتى ىنتىماقتاستىق جانە حالىقارالىق ۇيىمدار شەڭبەرىندەگى ءوزارا ىقپالداستىق ماسەلەلەرىن تالقىلاۋ ءۇشىن تاراپتار ناۋىرىز ايىنىڭ ءبىرىنشى جارتىسىندا استانادا كەلىسسوزدەر جۇرگىزۋگە كەلىستى».

«ءوز كەزەگىندە د.امان قازاقستاندى ەقىۇ-داعى ءساتتى اياقتالعان توراعالىعىمەن قۇتتىقتاي وتىرىپ، ءوزىنىڭ ەلى الداعى ۋاقىتتا قازاقستانعا «يسلام كونفەرەنتسياسى» ۇيىمىنىڭ سىرتقى ىستەر مينيسترلەر كەڭەسىنىڭ توراعاسى رەتىندە سەنىمىن ارتاتىنىن جانە وسى جاۋاپتى ميسسيانى اتقارۋدا كۋالا-لۋمپۋر تاراپىنان استاناعا تولىق قولداۋ كورسەتىلەتىندىگىن جەتكىزدى. ءوز ارىپتەسىنە العىسىن بىلدىرگەن ق.ساۋداباەۆ ەكى ەلدىڭ قارىم-قاتىناسى بەلسەندەنە تۇسەتىنىنە سەنىمىن ءبىلدىردى»، - دەلىنگەن حاباردا.