مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان ۆلاديمير ءپۋتيندى رەسەي فەدەراتسياسىنىڭ پرەزيدەنتى لاۋازىمىنا سايلانۋىمەن قۇتتىقتادى.

نۇرسۇلتان نازارباەۆ سايلاۋداعى ايقىن جەڭىس ۆلاديمير ءپۋتيننىڭ ءوز ەلىن دامىتۋعا جانە ونىڭ ۇلتتىق مۇددەلەرىن ىلگەرىلەتۋ ىسىنە قوسقان زور ۇلەسىن رەسەي حالقىنىڭ تاعى دا جوعارى باعالاعانىنىڭ دالەلى بولىپ سانالاتىنىن اتاپ ءوتتى.

«ءسىزدىڭ ءتيىمدى باسشىلىعىڭىزدىڭ ارقاسىندا رەسەي اۋقىمدى ساياسي جانە ەكونوميكالىق رەفورمالار جۇرگىزۋ، حالىقتىڭ الەۋمەتتىك ءال-اۋقاتىن ارتتىرۋ، جاھاندىق جانە وڭىرلىك وزەكتى پروبلەمالاردى شەشۋ ارقىلى سەنىمدى تۇردە العا باسىپ كەلەدى.

ەلدەرىمىز اراسىنداعى ستراتەگيالىق سەرىكتەستىك پەن وداقتاستىقتىڭ جارقىن مىسالى بولىپ وتىرعان ءداستۇرلى دوستىق پەن تاتۋ كورشىلىك قاتىناستاردى دامىتۋ ىسىنە قوسقان ءسىزدىڭ جەكە ۇلەسىڭىزدى ەرەكشە اتاپ وتكىم كەلەدى.

قازاقستان ەكى ەل حالىقتارىنىڭ مۇددەسى ءۇشىن رەسەيمەن ەكىجاقتى فورماتتا دا، ەۋرازيالىق ەكونوميكالىق وداق اياسىندا دا بايلانىستاردى كەڭەيتۋ ءىسىن جالعاستىرۋدى كوزدەپ وتىر.

مەن سەنىم مەن ءوزارا تۇسىنىستىككە نەگىزدەلگەن دوستىعىمىزدى قادىرلەيمىن ءارى ونى جوعارى باعالايمىن.

ءبىزدىڭ بىرلەسكەن جۇمىسىمىز الداعى ۋاقىتتا دا كوپقىرلى ىنتىماقتاستىعىمىزدىڭ بارلىق ماسەلەلەرى بويىنشا استانا مەن ماسكەۋدىڭ تابىستى ديالوگىنىڭ بەرىك نەگىزى بولىپ قالا بەرەتىنىنە سەنىمدىمىن»، – دەلىنگەن جەدەلحاتتا.

نۇرسۇلتان نازارباەۆ ۆلاديمير پۋتينگە زور دەنساۋلىق، اماندىق جانە جاۋاپتى مەملەكەتتىك قىزمەتتە جاڭا جەتىستىكتەر، ال دوستاس رەسەي حالقىنا بەيبىتشىلىك پەن باق-بەرەكە تىلەدى.

Abai.kz