بۇل - ساياگۇل نۇربولاتقىزى دەگەن قارشاداي عانا قارىنداسىم. قانداسىم. قىتايدىڭ شىڭجاڭ ولكەسىنىڭ قۇلجا قالاسىنا قاراستى اۋىلدا تۋعان. 2014 جىلى شىلدەدە شەشەسى ەكەۋى ەلگە ورالعان. تۇرىپ جاتقان ۇيلەرى ساتىلماعان سوڭ، اكەسى مەن ءسىڭىلىسى قىتايدا قالىپ قويعان. كەيىن ولار 2016 جىلى قازاقستانعا ءبىرجولاتا كوشىپ كەلگەن. ءسىڭىلىسىن جىل باسىندا مەكتەپكە كىرگىزۋ ءۇشىن، قىتايداعى ءۇيىنىڭ اقشاسىن الماستان، ەلگە كەلگەن. ءسويتىپ، اكەلەرى 2017 جىلدىڭ اقپانىندا قىتايعا قايتىپ بارىپ، اقشاسىن الماق بولعاندا پوليتسيا ۇستاپ الىپ، قۇجاتتارىن العان. ال وزدەرى استاناعا كەلىپ، پاتەر جالداپ تۇرادى. ساياگۇل 2017 جىلى ءساۋىر ايىندا قازاقستاننىڭ ازاماتتىعىن الىپتى.

ساياگۇل سىزدەردەن كومەك سۇرايدى. بىزدەن كومەك سۇرايدى. اكەسىنىڭ قىتايدا قاماۋدا جاتقانىن ايتىپ اراشا تىلەگەن بەينە جازباسى الەۋمەتتىك جەلىدە ءجۇر.

ءبىز ساياگۇلدىڭ وزىمەن حابارلاسىپ، ءمان-جايدى سۇراپ بىلدىك. ءوزىنىڭ ايتۋىنشا، كۇنى كەشە عانا اكەسىنە قاتىستى بارلىق بولعان جايدى بايانداپ، قازاقستاننىڭ سىرتقى ىستەر مينيسترلىگىنە ارىز-حات جازىپ تاپسىرىپتى. ول جاقتاعىلار: «اكەڭىز قىتاي ازاماتى ەكەن. قيىنداۋ بولادى. دۇيسەنبى حابارلاسىپ، بىلسەڭىزدەر بولادى. ءبىز قولىمىزدان كەلگەن كومەكتى بەرەمىز» دەپ جاۋاپ قاتىپتى.

ودان كەيىن ءدال وسى ارىزىنىڭ قىتايشا نۇسقاسىن استاناداعى قىتاي كونسۋلدىعىنا دا اپارىپ تاپسىرعان ەكەن. ول جاقتاعىلار: «ءسىزدىڭ ارىزدى ءتيىستى ورگاندارعا جەتكىزەمىز. بىراق، ول جاقتاعىلاردىڭ جۇمىسى كوپ. ءبىراز ۋاقىت كۇتەسىزدەر» دەپتى. ساياگۇلدىڭ ۇندەۋى مىنە:

Abai.kz