عالىم باقىتكەرەيۇلى. ءمازحاب جانە مەملەكەت
اسا قامقور، ەرەكشە مەيرىمدى اللانىڭ اتىمەن باستايمىن!
مەملەكەت پەن ءدىن اجىراتىلعانمەن مەملەكەت قاشاندا دىنگە دەگەن مۇقتاجدىقتان قۇتىلا المايدى. ويتكەنى، مەملەكەت ۋاقىتشا ءتاننىڭ قاجەتتىلىكتەرىن باسشىلىققا الىپ، دۇنيەلىك ىستەرمەن عانا شۇعىلدانسا، ءدىن ماڭگىلىك رۋحتىڭ قاجەتتىلىكتەرىن باسشىلىققا الىپ، اقيرەت پەن دۇنيەنىڭ ىستەرىن دە بىردەي نازاردا ۇستايدى. سول سەبەپتى دە ءدىني قۇندىلىقتاردان اجىراپ قالعان مەملەكەت دۇرىس باعىت-باعداردان جاڭىلىپ، رۋحاني داعدارىسقا ۇشىراپ، تۇيىققا تىرەلەتىن بولادى.
ءدىننىڭ تولىققاندى، قۋاتتى مەملەكەت قۇرۋداعى ماڭىزىن تۇسىنبەۋدەن قوعامىمىزدا دىنگە قاتىستى دۇرىس كوزقاراس قالىپتاسپاۋدا. سونىڭ ىشىندە يسلام دىنىنە قاتىستى بەلگىلى ءبىر ساقتىق، ءتىپتى بەلگىلى ءبىر شامادا ۇرەي دە ورىن الىپ، سونىڭ سالدارىنان حاق ءدىنىمىز اقپارات كوزدەرى مەن باسىلىم بەتتەرىنەن تيىسىنشە ناسيحاتتالماۋدا. مۇنان زارداپ شەگىپ، زياندا قالىپ جاتقان ەڭ اۋەلى وزىمىزدىڭ ءتول ءمازحابىمىز بولىپ تابىلادى. ويتكەنى، كەلىمسەك جات اعىمدار ونداي ناسيحاتقا مۇقتاج ەمەس. ولاردىڭ ءوز ناسيحاتتارى مەن تاراتىلۋ جولدارى بار. جانە ولار مەملەكەتكە الاقان جايىپ، تاۋەلدى بولىپ وتىرعان جوق. ولاردىڭ قاراجات كوزدەرى شەت ەلدەردەن، ءارى ءوز قاجەتتىلىكتەرىنەن ارتىلىپ كەتپەسە كەمىمەيدى. سول سەبەپتى دە، ەلىمىزدە ءمازحاب تاراپىنان جۇرگىزىلەتىن ءدىن ناسيحاتى كەنجە قالىپ، ءمازحابىمىز ەڭسە تىكتەي الماي جاتسا، بۇل ولار ءۇشىن وتە پايدالى بولاتىنى ءسوزسىز.
اسا قامقور، ەرەكشە مەيرىمدى اللانىڭ اتىمەن باستايمىن!
مەملەكەت پەن ءدىن اجىراتىلعانمەن مەملەكەت قاشاندا دىنگە دەگەن مۇقتاجدىقتان قۇتىلا المايدى. ويتكەنى، مەملەكەت ۋاقىتشا ءتاننىڭ قاجەتتىلىكتەرىن باسشىلىققا الىپ، دۇنيەلىك ىستەرمەن عانا شۇعىلدانسا، ءدىن ماڭگىلىك رۋحتىڭ قاجەتتىلىكتەرىن باسشىلىققا الىپ، اقيرەت پەن دۇنيەنىڭ ىستەرىن دە بىردەي نازاردا ۇستايدى. سول سەبەپتى دە ءدىني قۇندىلىقتاردان اجىراپ قالعان مەملەكەت دۇرىس باعىت-باعداردان جاڭىلىپ، رۋحاني داعدارىسقا ۇشىراپ، تۇيىققا تىرەلەتىن بولادى.
ءدىننىڭ تولىققاندى، قۋاتتى مەملەكەت قۇرۋداعى ماڭىزىن تۇسىنبەۋدەن قوعامىمىزدا دىنگە قاتىستى دۇرىس كوزقاراس قالىپتاسپاۋدا. سونىڭ ىشىندە يسلام دىنىنە قاتىستى بەلگىلى ءبىر ساقتىق، ءتىپتى بەلگىلى ءبىر شامادا ۇرەي دە ورىن الىپ، سونىڭ سالدارىنان حاق ءدىنىمىز اقپارات كوزدەرى مەن باسىلىم بەتتەرىنەن تيىسىنشە ناسيحاتتالماۋدا. مۇنان زارداپ شەگىپ، زياندا قالىپ جاتقان ەڭ اۋەلى وزىمىزدىڭ ءتول ءمازحابىمىز بولىپ تابىلادى. ويتكەنى، كەلىمسەك جات اعىمدار ونداي ناسيحاتقا مۇقتاج ەمەس. ولاردىڭ ءوز ناسيحاتتارى مەن تاراتىلۋ جولدارى بار. جانە ولار مەملەكەتكە الاقان جايىپ، تاۋەلدى بولىپ وتىرعان جوق. ولاردىڭ قاراجات كوزدەرى شەت ەلدەردەن، ءارى ءوز قاجەتتىلىكتەرىنەن ارتىلىپ كەتپەسە كەمىمەيدى. سول سەبەپتى دە، ەلىمىزدە ءمازحاب تاراپىنان جۇرگىزىلەتىن ءدىن ناسيحاتى كەنجە قالىپ، ءمازحابىمىز ەڭسە تىكتەي الماي جاتسا، بۇل ولار ءۇشىن وتە پايدالى بولاتىنى ءسوزسىز.
ال، وزگە دىندەر جايىندا ايتۋدىڭ دا قاجەتى جوق. ونداي دىندەر مەن سەكتالار ءۇشىن ەلىمىزدە يسلام ءدىنىنىڭ مۇلدە جويىلىپ كەتكەنى جاقسى. ولاردىڭ كوپشىلىگى ەلىمىزگە وسى ماقساتپەن دە كەلىپ، ونى جۇزەگە اسىرۋ ءۇشىن بارلارىن سالۋدا. ولار دا مەملەكەتتەن قاراجات سۇراپ جاتقان جوق. ولاردا دا بۇل جاعىنان ءبارى ويداعىداي شەشىلگەن. ولار ءۇشىن تەك مەملەكەت تاراپىنان ەشقانداي كەدەرگىنىڭ بولماعانى عانا قاجەت. جانە بۇل جاعىنان دا ولاردا ەشقانداي قيىندىق جوق. تەك شي شىعارماي ءوز ءىسىڭدى اتقارا بەر.
بىلاي قاراعاندا ەلىمىزدە دىندەردىڭ دامۋىنا تەڭ مۇمكىندىك بەرىلگەن ءتارىزدى كورىنۋى مۇمكىن. ءبارى دە زاڭ الدىندا بىردەي، ەشقايسىسىنىڭ دا مەملەكەت تاراپىنان ارتىقشىلىقتارى جوق. مۇنداي جاعدايدا ەسەڭدى جىبەرىپ الساڭ وزىڭنەن كور دەۋگە بولادى. بىراق، شەت ەلدەردەن كەلىپ جاتقان توپتاردىڭ قاي -قايسىسىن الساڭ دا ولاردىڭ ارتتارىندا تىرەك بولىپ تۇرعان مىقتى دا باي قولداۋشىلارى بار. ال، ەل مۇددەسى ءۇشىن تىرىسىپ جۇرگەن ءمازحابتىڭ ونداي ارقا سۇيەرى جوق. قىسقاشا ايتقاندا ءبارىنىڭ دە «اكەسى» بار دا، تەك ەلىمىزدەگى ءتول ءمازحابىمىز عانا «جەتىم بالانىڭ» كەبىن كيۋدە. سوندىقتان دا ول «ءيتتىڭ يەسى بولسا، ءبورىنىڭ ءتاڭىرى بار» دەگەندەي اللادان عانا ءۇمىت كۇتۋدە. بۇل جەردە تەڭ مۇمكىندىك جونىندە ايتۋ ورىنسىز.
جالپى، قازاق وزگەنىڭ كوڭىلىنە قاراپ، اركىمنىڭ ىعىنا جىعىلۋمەن جۇرگەندە ءوز قامىن ويلاي الماي پايداسىنان قاعىلىپ جاتادى. بىراق، ءدىن ماسەلەسىندە ەسەنى جىبەرۋ تەك پايدادان عانا قاعىلۋ ەمەس، بۇل ارىلماس بەينەتكە باسىڭدى شىرماۋ بولىپ تابىلادى. ءدىني احۋال وسى بەتىمەن كەتە بەرسە بەلگىلى ءبىر ۋاقىت وتكەن سوڭ ءار ءدىن، ءار توپ حالىقتى تۋ-تالاقاي ەتىپ ءبولىپ الاتىن بولادى. مۇنداي جاعدايدا بۇرىن دا باسى بىرىكپەي كەلگەن الا قازاقتار ەندى اركىمنىڭ جەتەگىندە جۇرگەن شالا قازاقتارعا اينالىپ ۇلت رەتىندە قۇرىپ بىتۋگە بەت بۇرادى.
ۇلت رەتىندە قۇرىپ بىتۋمەن عانا ءىس بىتە قويسا جاقسى، ابدەن جايعاسىپ العان سوڭ كوپتەگەن توپتار بيلىككە تالاسا باستايدى. ويتكەنى، ولاردىڭ ارتتارىندا تۇرعان كۇشتەر ەل بايلىعىنا قول سوزىپ، ءوز توبىن وسى ماقسات ءۇشىن پايدالانىپ، ونى بيلىككە وتىرعىزۋعا تىرىسادى. جانە ولاردىڭ ەشقايسىسى دا وڭايلىقپەن مايلى شومىشتەن قاعىلعىسى كەلمەيدى. سوندىقتان دا ءتۇرلى توپتارعا ءبولىنىپ ءوزارا قىرىلىساتىن جەرگىلىكتى «ابوريگەندەر» ءبىرىن-ءبىرى قىرىپ تاستاسا دا ولاردىڭ قاتتى قايعىرا قويماسى انىق.
ەكى دىنگە بولىنگەن تالاي ۇلتتاردىڭ «باستارى ءبىر قازانعا سيماي» جاتقاندا ءجۇز دىنگە بولىنگەن جاعدايدا قازاقتاردىڭ باسىنىڭ «ون قازانعا» دا سيۋى نەعايبىل ەكەنىن دە ەسكەرگەن ءجون. جالپى، قاي جاعىنان الىپ قاراساڭ دا ءجۇز دىنگە يە بولۋ قازاققا «دەموكراتياشىل ۇلتپىز» دەگەن قۇر ماقتاننان باسقا تۇك تە جاقسىلىق اكەلمەيدى.
شىن مانىندە ەشقانداي مەملەكەت ءوز ازاماتتارىنىڭ ءتۇرلى سەنىمدى ۇستاناتىن سانسىز توپتارعا ءبولىنىپ، قىرىق قۇراۋ بولۋىنا مۇددەلى ەمەس. بىراق، كوپتەگەن ەلدەر سەنىم بوستاندىعى دەگەن دەموكراتيا قۇندىلىعىن ۇستانامىز دەپ كىم كورىنگەنگە ەسىكتەرىن اشىپ قويىپ، ەندى وزدەرى وسى ءبىر قاتەلىكتەرىنىڭ قۇرباندارىنا اينالۋدا. مىسالعا، مەملەكەتتى مويىندامايتىن، مەملەكەتتىك، قوعامدىق ىستەردەن قول ءۇزىپ، ەلدى قورعاۋدان دا باس تارتاتىن، ادامگەرشىلىك قۇندىلىقتاردى بۇرمالاپ، حالىقتى بۇزۋمەن عانا اينالىساتىن ءتۇرلى سەكتالارعا قانداي مەملەكەت مۇقتاج. بىراق، قوعامدارى ىشتەي ءىرىپ، حالقى بىرلىكتەن ايرىلىپ جاتسا دا ونداي مەملەكەتتەر وزدەرى ناسيحاتتايتىن باستى قۇندىلىقتارىنان باس تارتا الماۋدا. ولار شىن مانىندە «ءوز قولدارىن وزدەرى كەسە الماۋدا».
دىندەگى الا-قۇلالىق ەشبىر مەملەكەتكە دە ءتيىمدى ەمەس. سول سەبەپتى دە مەملەكەت ءدىني توپتاردى كوبەيتۋ ەمەس، ولاردى ازايتۋ باعىتىندا جۇيەلى تۇردە جۇمىس جاساۋى قاجەت. حالىقتىڭ ساناسىن ۋلاپ، بىرلىگىن بۇزىپ، ىشتەي ىرىتەتىن ءجۇز توپتان، رۋحاني تازالىقتى، بيىك ماقسات-مۇراتتى ۇستانىپ، حالىقتى ۇيىستىراتىن ومىرشەڭ ەكى-ءۇش ءدىن ارتىق ەكەنى ەش كۇمانسىز.
ومىرشەڭ ءدىن قاشاندا حالىقتىڭ، ۇلتتىڭ ومىرشەڭدىگىن قامتاماسسىز ەتەدى. سوندىقتان دا ءوزىنىڭ بولاشاعىن قامتاماسسىز ەتكىسى كەلەتىن مەملەكەت ءۇشىن تولىققاندى، ومىرشەڭ ءبىر دىنگە باسىمدىق بەرىپ، ءوز باعىت- باعدارىن سول ءدىن ارقىلى تۇزەپ، سول ءدىن ارقىلى ءوز ازاماتتارىنىڭ بىرلىگىنە قول جەتكىزۋ ءتيىمدى. ءبىزدىڭ جاعدايىمىزدا مۇنداي ءدىننىڭ قىزمەتىن يسلام ءدىنى اتقارسا، يسلام ىشىندە دە ءتۇرلى توپتار كوبەيىپ جاتقان قازىرگى كەزەڭدە نەشە عاسىردان بەرى ۇلتتىق دىلىمىزگە ءسىڭىستى بولىپ كەتكەن حانافي ءمازحابىنا ەشقانداي دا بالاما جوق.
حانافي ءمازحابى قازىرگى كەزەڭدە مەملەكەتىمىزدىڭ ەڭ باستى وداقتاسى بولىپ تابىلادى. ويتكەنى، مەملەكەت حالىقتىڭ، سونىڭ ىشىندە دە ۇلتىمىزدىڭ مۇددەسىن باسشىلىققا الىپ، ءوز ساياساتىن وسى تۇرعىدان انىقتاسا، ءمازحابتىڭ دا ماقساتى وسى باعىتتا مەملەكەت مۇددەسىمەن تولىق ۇشتاسادى. ارينە، ءمازحاب ەڭ اۋەلى ءدىننىڭ مۇددەسىن، يسلام قۇندىلىقتارىن باسشىلىققا الادى. جانە وعان وسى نەگىزدە مەملەكەتتىڭ دە، ۇلتتىڭ دا مۇددەلەرىن ەسكەرىپ، وسى باعىتتا نەعۇرلىم ءتيىمدى شەشىم تابۋ قاجەت بولادى. وسى تۇرعىدان العاندا ءمازحاب باسشىلىعىنىڭ موينىنا العان جۇگى دە اۋىر، جاۋاپكەرشىلىگى دە ۇلكەن.
ءوزىنىڭ وسى ءبىر قيىن مىندەتىن اتقارۋ بارىسىندا ءمازحاب باسشىلىعى مەملەكەتتىڭ جاردەمىنە وتە مۇقتاج. ويتكەنى، ونىڭ قولدا بار مۇمكىندىكتەرى، ونىڭ اتقارۋعا ءتيىستى مىندەتتەرىنە تولىق ساي ەمەس. وسىنداي جاعدايدا مەملەكەت تە وعان ءوز تاراپىنان بەلگىلى ءبىر تاپسىرمالار جۇكتەپ، دىني احۋالعا بايلانىستى تۋىنداپ جاتقان قيىندىقتاردى شەشكەنىن قالايدى. بىراق، شىندىعىنا كەلگەندە، بارىنشا قولداۋ كورسەتىپ جاتپاعان جاعدايدا مەملەكەتتىڭ ءمازحابتان كوپ نارسە تالاپ ەتۋى ورىنسىز بولىپ تابىلادى. «الاسى قولىم بەرەسى» دەگەندەي كىم دە بولسا العانىنا قاراي بەرۋگە تىرىسادى. سول سەبەپتى دە مەملەكەتتىڭ «اساتپاي جاتىپ قۇلدىق دەگىزۋگە» تىرىسۋى ادىلدىك ەمەس.
مەملەكەت ءدىن ماسەلەلەرىندە وزىنە ءمازحابتان ارتىق سەنىمدى وداقتاس تابا المايدى. ويتكەنى، ءمازحابتان باسقا توپتاردىڭ تۇگەلدەي دەرلىگى كەلىمسەكتەر بولىپ تابىلادى. جانە ولاردىڭ نەگىزگى ورتالىقتارى شەتەلدەردە ورنالاسقان. سوندىقتان دا ولاردىڭ ارتتارىندا ءوز مۇددەلەرىن كوزدەگەن بەلگىلى ءبىر كۇشتەردىڭ تۇرعانىن جوققا شىعارۋعا بولمايدى. ولاي بولسا كەلىمسەك توپتاردىڭ مەملەكەتتىڭ مۇددەسىن قورعاپ، ەل ءۇشىن، ۇلت ءۇشىن قىزمەت ەتپەيتىنى انىق. ولاردىڭ بار ءىس-ارەكەتتەرى سىرتقى كۇشتەردىڭ قولجاۋلىقتارى قىزمەتىن اتقارۋدان ارتىلمايدى. سوندىقتان دا مەملەكەت ءۇشىن ونداي توپتار ءۇشىن قام جەپ، بايەك بولۋدىڭ قاجەتى شامالى.
مۇنداي كەلىمسەك توپتار كۇشەيگەن سايىن ءمازحابتىڭ السىرەي بەرەتىنىن ەسكەرگەن ءجون. ويتكەنى، حالىقتىڭ دىنگە بەيىم بولىگى وزدەرىنە ادام تارتۋدىڭ ايلا تاسىلدەرىن جەتىك مەڭگەرگەن، قالتالارى دا قالىڭ سونداي توپتاردىڭ ىقپالدارىنا ءتۇسىپ، سولاردىڭ پايداسىنا تاڭداۋ جاسايدى. تىپتى، ءمازحاب ۇستاناتىن نامازحانداردىڭ دا جىكشىلدەر تاراپىنان جۇرگىزىلىپ جاتقان كۇشتى ناسيحاتقا سانالارى ۋلانىپ، ءمازحابتى تاستاپ جاتقاندارى بەلگىلى. ولاي بولسا كەلىمسەك توپتاردىڭ كوبەيۋى ءمازحاب جاماعاتىن ازايتاتىنى، سول سەبەپتى دە ولاردىڭ كۇشەيۋى ءمازحابتىڭ السىرەۋى ەسەبىنەن جۇزەگە اساتىنى ەشقانداي دا كۇمانسىز.
مۇنداي جاعدايدا ءمازحابتىڭ ارتىنان تىرەك بولۋعا ءتيىستى مەملەكەت ءوز ورنىنان تابىلا الماسا، ءمازحابتىڭ ءحالى وتە مۇشكىلگە اينالۋى مۇمكىن. ال، وزىنىڭ ەڭ سەنىمدى وداقتاسى بولىپ تابىلاتىن ءمازحاب السىرەسە، مەملەكەتتىڭ دە كۇشتى بولۋى نەعايبىل. ويتكەنى، ءمازحاب دەگەنىمىز ءوز ەلى ءۇشىن، ءوز ۇلتى ءۇشىن ۋايىم جەگەن وتانشىل مۇسىلمانداردىڭ بىرلەستىگى. سول سەبەپتى دە مۇنداي مۇسىلماندار ازايعان سايىن مەملەكەت تە وزىنە تىرەك بولار سەنىمدى ازاماتتارعا دەگەن مۇقتاجدىقتى قاتتى سەزىنەتىن بولادى.
مەملەكەتىمىز زايىرلى، دەموكراتيالىق ەل رەتىندە دىندەرگە ەسىگىن ايقارا اشىپ، ولاردىڭ تارالۋىنا قولايلى جاعداي جاساپ جاتىر. بۇل ونىڭ الەمدىك قاۋىمداستىقتان لايىقتى ورىن الۋىنا مۇمكىندىك بەرەتىن قاجەتتى قادامداردىڭ ءبىرى ەكەنىنە كەلىسۋگە بولار. ويتكەنى، قالتارىسى كوپ ساياساتتىڭ قىر-سىرى بيلىك باسىنداعى باسشىلارعا جاقسىراق ايان. تەك ەلىمىزدەگى ءدىني بوستاندىق ەل مۇددەسى ءۇشىن قىزمەت ەتىپ جاتقان حانافي مازحابىن وركەندەتۋمەن ۇشتاستىرىلىپ وتىرىلعانى ءجون بولار ەدى. بۇل مەملەكەت ءۇشىن «قاسقىردى دا توق قىلىپ، قويدى دا امان ساقتايتىن» بىردەن-ءبىر وڭتايلى شەشىم بولىپ تابىلادى. بار مۇمكىندىگى تولىق اشىلىپ، ناسيحاتتالۋى دا جاقسى جولعا قويىلعان جاعدايدا حانافي مازحابى كەلىمسەكتەرگە قارسى جاقسى باسەكەلەستىك تانىتىپ، مەملەكەتتى سەنىمدى تىلمەن قامتاماسسىز ەتەتىن بولادى. ويتكەنى، وتە ومىرشەڭ يسلام ءدىنىنىڭ ءبىر ءمازحابى بولىپ تابىلاتىن حانافي ءمازحابى كەلىمسەكتەرگە ءوز ەسەسىن جىبەرە قويمايتىن زور الەۋەتكە يە.
ءدىن ىسىندە ناسيحاتتىڭ ماڭىزى وتە زور ەكەنىن ەسكەرۋ قاجەت. كۇشتى جانە ۋاقتىلى ناسيحات جۇرگىزگەن توپ نەعۇرلىم قابىلەتتى، نەعۇرلىم جىگەرلى جانداردى ءوز تۋىنىڭ استىنا توپتاستىرىپ الادى. ال، مۇنداي جاندار ءىستىڭ بارىسىن سول توپتىڭ پايداسىنا شەشىپ بەرەتىن بولادى. ويتكەنى، قابىلەتتى دە جىگەرلى كوشباسىلاردىڭ سوڭىنا حالىق ويلانباستان ەرەدى.
«اۋزى قيسىق بولسا دا باي بالاسى سويلەسىن» دەگەندەي ناسيحاتتىڭ كۇشتى بولۋىن قاراجات شەشەدى. قاراجات ءوز ۇستانىمدارىن كەڭىنەن ۇسىنىپ، ونىڭ قولجەتىمدىلىگىن قامتاماسىز ەتىپ، سول ارقىلى ونى حالىقتىڭ ساناسىنا سىڭىرۋگە مۇمكىندىك بەرەدى. وسىنداي جولمەن تامىرى تەرەڭگە جىبەرىلىپ، ابدەن بەكىگەن ءدىني كوزقاراستى كەيىن قايتا وزگەرتۋ وڭايعا سوقپايدى. سوندىقتان دا ەلىمىزدە ءدىنىمىزدىڭ دامۋىن بەتىمەن جىبەرمەي، ونى مەملەكەت تاراپىنان ءجىتى قاداعالاپ، ونىڭ شەشىمىن كۇتكەن ماسەلەلەرىن كەشىكتىرمەي قولعا الىپ، وعان قاجەتتى باعىتتا بارىنشا قولداۋ جاساپ وتىرۋ قاجەت.
ەگەر مەملەكەت مازحابقا تيىسىنشە كوڭىل بولمەي، ونى نىعايتۋعا نەمقۇرايلىلىق تانىتاتىن بولسا، وندا بۇل زور اعاتتىق بولار ەدى. ويتكەنى، حالىقتىڭ دىنگە دەگەن رۋحاني سۇرانىسى ايتارلىقتاي جوعارى. سوندىقتان دا ولار وزدەرىنە جول تاۋىپ ءوز سۇرانىستارىن قاناعاتتاندىرۋعا ۇمتىلادى. جانە ولارعا وسى باعىتتا ءوز جاردەمىن ۇسىنۋشىلار دا جەتەرلىك. سول سەبەپتى دە ەلىمىز قازىرگى كەزەڭدە شەشىمى قيىن زور ماسەلەگە اينالىپ بارا جاتقان جىكشىلدىك ماسەلەسىمەن بەتپە-بەت كەلىپ وتىر.
ءوزى دىنگە كوپ ءمان بەرمەسە، وزگەلەر دە سولاي دەپ ويلاپ بەيقامدىققا سالىنۋ دا مەملەكەت ءۇشىن ۇلكەن اڭعىرتتىق بولىپ تابىلادى. شىندىعىنا كەلگەندە ءوزىمىز يگەرۋگە اسىقپاي جۇرگەن رۋحاني كەڭىستىگىمىزدى وزگەلەر باسىپ قالۋعا تىرىسىپ، جانتالاسۋدا. ولار بار مۇمكىندىكتى مەيلىنشە پايدالانىپ، قارجىلارىن دا اياماي شاشىپ جاتىر. سوندىقتان دا ولار ءوز ىستەرىنىڭ ناتيجەسىن كورۋدە.
مۇنداي جاعدايدا ءوز ەلىمىزدە، ءتول مازحابىمىزدى وركەندەتۋگە تىرىسىپ، ەل يگىلىگى ءۇشىن ءىس جاساپ جاتقان ءدىني باسشىلىق پەن مازحابي ۇيىمدارعا مەملەكەت تاراپىنان تيىسىنشە قارجى ءبولىنىپ تۇرعانى دۇرىس بولار ەدى. مۇنسىز ءدىن ءىلىمىن تەرەڭ زەرىتتەپ، ىزدەنىستەردى قاجەتتى باعىتتاردا ورىستەتۋ، جانە سول نەگىزدە ناسيحات ءىسىن جولعا قويىپ، حالىقتىڭ ءدىني ساۋاتىن كوتەرۋ قيىنعا سوعادى. وسىنداي قولدىڭ قىسقالىعىنىڭ سالدارىنان دا مازحابىمىزدى تانۋ، جانە ونى ناسيحاتتاۋ كەمشىن بولىپ، قالتالارى قالىڭ وزگەلەر الدىمىزدى وراپ كەتۋدە.
ەگەر مەملەكەتىمىز وسى ءدىن ماسەلەسىندە ۇتىلاتىن بولسا، وندا مول قارجى سالىپ جاتقان باسقا سالالاردىڭ يگىلىكتەرىن كورە الماي قالۋى دا ابدەن مۇمكىن. ويتكەنى، رۋحاني داعدارىس پەن ءدىني الاۋىزدىق كوپتەگەن مەملەكەتتەردىڭ بار جەتىستىكتەرىن جوققا شىعارىپ، العا باسقان قادامدارىن كەرى كەتىرۋدە. سوندىقتان دا مەملەكەتىمىزگە وسى كەزدەن باستاپ دىنگە كوبىرەك كوڭىل ءبولىپ، وعان دۇرىس باعىت بەرىپ، ونى ءبىر ارناعا سالىپ جىبەرۋ باعىتىندا اۋقىمدى شارالاردى اتقارعان ءجون بولار ەدى. سوندا ەلىمىز وسى كۇشتىڭ ارىنىمەن العا قارىشتاي باسىپ، ەشكىمگە دە دەس بەرمەي كەتەتىن بولادى. ويتكەنى، ءدىنى بەرىك ەلدىڭ ءىسى دە بەرەكەلى، قاۋىپسىزدىگى دە مىعىم بولاتىنى ءسوزسىز!
«اباي-اقپارات»
