يدەيالار. ءومىردى وزگەرتەتىن يدەيالار. جاقسى جاققا وزگەرتەتىن. كوپشىلىككە تاراتۋعا، بارشاعا جار سالۋعا ابدەن لايىق يدەيالار. ولار وتە كوپ. قاي سالانى الساڭ دا، «ادام ءومىرىن جاقسارتۋعا ۇمتىلعان» جاندار بار. ءتىپتى كەيبىرەۋى ءوز كاسىبىنە قاتىستى بولماسا دا، جالپىعا ءتان وزىق ويىمەن بولىسەدى. مۇنداي بەلسەندىلەر ەشكىمنەن ەشنارسە سۇرامايدى، ەشكىمنەن ەشنارسە كۇتپەيدى، ولار ءبىر نارسەگە عانا تاۋەلدى – ءوز يدەيالارىنا! كۇن دەمەي، ءتۇن دەمەي، ويداعىسىن جۇزەگە اسىرماي قويمايدى، تىنباي تەر توگەدى. ەڭ باستىسى – ولار ۇسىنعان امالدار ادام بالاسىنىڭ پروبلەماسىن شەشۋدىڭ جولىن ۇسىنادى. ءيا-ءيا، ماسەلە وسىدا – ولار ۇسىنعان يدەيا ءومىر ساپاسىن وڭتايلى وزگەرتەدى. ەلىمىزدە پروبلەمالاردى كوتەرەتىن الاڭ قاپتاپ جاتىر، الايدا پروبلەمانىڭ شەشۋ جولىن، ءىس جۇزىندە تەكسەرىلگەن ءتاسىلىن ۇسىناتىن ەرەكشە الاڭ بار – ول TEDxAstana. TED – تەحنولوگيا، ويىن-ساۋىق پەن ونەرگە قاتىستى كوپشىلىككە تاراتۋعا لايىقتى يدەيالاردى ورتاعا سالاتىن كونفەرەنتسيا. ح – كونفەرەنتسيانىڭ دۇنيە ءجۇزىنىڭ تۇكپىر-تۇكپىرىندە، ايماقتاردا وتەتىنىن ءبىلدىرىپ-اق تۇر. استانادا ءۇشىنشى رەت ۇيىمداستىرىلعالى تۇرعان وي-تالقى «قايتا تۇلەۋدىڭ» بىرەگەي جولىن ورتاعا سالماقشى.

«وردا بۇزار» جاسقا جەتىپ قالعان ەلىمىز ءوزىنىڭ رۋحاني ازىعىن سالماققا سالعانىنا ءبىر جىل تولدى. تۇماندا اداسىپ جۇرگەندەي كۇي كەشكەندە، كۇندەي جارق ەتكەن «جاڭعىرۋ» بىرەۋدىڭ ءوتىن جارىپ جىبەرە جازداسا، سول جارىقتى كوپتەن كۇتكەن ەندى ءبىر جانعا ءۇمىت سىيلادى. قالتا تولىپ، قارىن توق، كويلەك كوك بولسا دا، جانىمىزدىڭ ازىپ-توزىپ كەتە جازداعانى بار...

ادام بالاسى بۇل ومىرگە كەلگەندە، بىلمەك ءۇشىن سۇراق قويسا، سول سۇراققا جاۋاپتى تەك ءوزى – تەك ىزدەنۋ ارقىلى تاپسا كەرەك. تابيعاتىندا بىلىمگە، رۋحاني ازىققا تاۋەلدى ادامزات، وزىنە ءوزى سىن كوزبەن قاراۋدان قالماعانى، ءوز ارەكەتىن ءوزى سارالاپ وتىرعانى ءجون. ويتپەسە، «ءبىز سياقتى» قۇندىلىعىن شاتاستىرىپ الادى. باسىمدىق ءبىرجولا ماتەريالدىق جاققا اۋىپ كەتپەي تۇرعاندا، ەتەك-جەڭدى جيناۋ قاجەت. ونى جيناستىرۋعا TEDxAstana كونفەرەنتسياسىنىڭ سپيكەرلەرى كومەكتەسەرى ءسوزسىز.

بۇگىندە استانا بەس جىل بۇرىنعىداي – مەن العاش كەلگەندەگىدەي ەمەس. قالانى تىرىلتەتىن، سويلەتەتىن، وزگەرتەتىن – ادامدار، قالا تۇرعىندارى. ەلورداعا العاشىندا وتانداستارىم كۇن كورىس قامىمەن كەلسە، ەندىگى جەردە ءبىر-بىرىنە ۇيرەنىسىپ، جاس قالامەن بىرگە ءوسىپ-ءونىپ، ورتاق ىستەرگە بەل بۋاتىنداي كۇيگە جەتتى. ولاي بولسا، كۇللى قازاقستان جۇرەگىنىڭ «تامىرىنا» اينالعان ەلوردالىقتار TEDxAstana سپيكەرلەرىن – ونەرتاپقىشتاردى، عالىمداردى، ءتۇرلى سالا ماماندارىنىڭ ويىن قابىلداۋعا، بىلۋگە، ولارمەن تانىسۋعا دايىن. وسى تۇستا تەك ءبىر كىلتيپان بار – مۇنداي «ەرەكشە» سپيكەرلەردى ۇعىنۋ ءۇشىن، ءسىز دە دايىن بولۋىڭىز كەرەك. وزگەرۋگە دايىن بولۋىڭىز كەرەك! ءوزىڭىز وزگەرىپ قانا قويماي، اينالانى، ءومىردى – قوعامدى وزگەرتۋ مۇمكىن ەكەندىگىنە سپيكەرلەردىڭ تاجىريبەسى ارقىلى كوز جەتكىزۋىڭىز قاجەت! ەموتسيا ەنەرگيا تۋدىرسا، TEDxAstana اتتى بىلەككە بىتكەن ەنەرگيا قوعامنىڭ ەڭ مىقتى قوزعاۋشى فاكتورلارىنىڭ بىرىنە اينالادى. سولاي ەمەس پە؟!

ەندەشە، كەزدەسۋگە دايىن بولىڭىز! 10 ماۋسىم «قايتا تۇلەۋ» كۇنى! ءسىز بەن ءبىزدىڭ باس قوسىپ، ءتۇرلى عىلىمدا: مەديتسينا، تەحنولوگيا، ءبىلىم، ونەر جانە باسقا سالانىڭ ونەرتاپقىشتارى مەن بىرەگەي يدەيا اۆتورلارىنىڭ نە ۇسىناتىنىن تىڭداپ، ومىرگە جاڭا سەرپىن بەرەتىن كۇن! تىڭدايتىن قۇلاق بولسا، ايتىلار وي دا ءپىسىپ جەتىلدى!

Abai.kz