1972 جىل. 6-شى كلاستا وقىپ جۇرگەن كەزىم. ءبىزدىڭ كوكساراي اۋىلىنا بۇرىن ەشكىم ەستىپ بىلمەگەن توتەنشە اۋرۋ كەلدى. اۋىل جۇرتى ونىڭ قانداي اۋرۋ ەكەنىن ءتۇسىنىپ بولعانشا، 10-شى كلاستا وقيتىن ءبىر قىز دۇنيەدەن وزدى.

ورىس ءتىلى ساباعى ۇستىندە مازام كەتە باستادى. بۇرىن قازاق تىلىنەن ساباق بەرىپ جۇرگەن فازىلxان اعايىمىز ءبىر تاقىرىپتى ورىسشا ءتۇسىندىرىپ جاتىر. قاشانعىمىزداي تۇك ۇققانىمىز جوق. ەندى اڭعارسام، ءبىز تۇگىلى ۇستازىمىزدىڭ ءوزى ورىسشانى ونشا قاقپايدى ەكەن. سولاي بولا تۇرا سول اعاي دا، ورىسشانى ءبىز قۇرالپى تۇسىنەتىن وزگە مۇعالىمدەر دە ورىس كلاسىنا دا ساباق بەرە بەرەتىن. ساباق بەرگەندە، "دا", "نەت" دەگەن سياقتى ءبارىمىز تۇسىنەتىن ءبىر-ەكى ورىسشا ءسوز قوسىلعانى بولماسا، ورىس كلاستارىندا دا ساباق نەگىزىنەن قازاق تىلىندە وتەتىن. سەبەبى... ءيا. ءبارى قازاق. راس، ءبىر-ەكى وزگە ۇلت وكىلدەرى بار. الايدا ولار دا ءوز تىلدەرىنەن گورى قازاقشانى جاقسى بىلەدى. سوندىقتان ءوزىمىز بىلەتىن "دا", مەن "نەتكە" تاعى ءبىر ورىس ءسوزى قوسىلسا، سونىڭ ءوزىن قابىلداي الماي، باسىمىز اۋىراتىن. ءسىرا فازىلxان اعاي ورىس ءسوزىن كوپ ايتىپ جىبەردى-اۋ دەيمىن، ەكى شەكەم سىرقىراي باستادى.

ادەتتە ىسقىرۋ ءۇشىن ەرنىڭدى ءشۇيىرىپ، دەمدى سىرتقا شىعاراسىڭ. اۋرۋدىڭ اسەرى مە، بىلمەيمىن، ايتەۋىر "ەرىندى ءشۇيىرىپ تۇرىپ دەمدى ىشكە تارتسا، ىسقىرىلا ما ەكەن" دەگەن وي باسىما ساپ ەتە قالدى. سول-اق ەكەن، دەرەۋ بايقاپ كوردىم. ىسقىرىلادى ەكەن. فازىلxان اعايىم ورنىنان شورشىپ تۇردى. "كىم ىسقىرعان؟" دەدى. قازاقشالاپ ايتتى. ورنىمنان تۇردىم. فازىلxان اعايدى جوعارعى كلاستىڭ بالالارى "پۋرجينا" دەپ اتايتىن. نەگە ولاي اتايتىنىنا سول كەزدە كوزىم جەتتى. ەكى سەكىرىپ قاسىما جەتىپ كەلدى. سودان بار ىنتا-جىگەرىمەن مەنى ساباۋعا كىرىسىپ كەتتى. بۇرىن دا تاياق جەپ ءجۇرمىز عوي. جالپى ول كەزدە ءبىز مۇعالىمدى بالا سابايتىن ادام دەپ تۇسىنەتىنبىز. راس، ءار مۇعالىم ءار ءتۇرلى تاسىلمەن ۇراتىن.

ءجا، ول بولەك اڭگىمە. قانشا دەگەنمەن ۇستاز عوي. فازىلxان اعايىم دا ءوزىنىڭ قاتتى كەتكەنىن تۇسىنگەن ءتارىزدى. ساباقتان الىپ قالىپ، ماعان ءبىراز ۇلاعاتتى سوزدەر ايتتى. بالكىم ايادى. الدە قورىقتى. سەبەبى سول ساتتە مەنىڭ ەسىم كىرەسىلى-شىعاسىلى بولاتىن. ۇيگە قالاي جەتكەنىم ەسىمدە جوق. ەسىكتەن اتتاعان ساتتە-اق تالقىسىپ كەتتىم.

قۇديار ءبىلالدىڭ Facebook-تەگى پاراقشاسىنان

Abai.kz