پارلامەنت سەناتىنىڭ توراعاسى قاسىم-جومارت توقاەۆ ۆاتيكاندا جانە يتاليادا ساپاردا بولدى.

ق. توقاەۆ ۆاتيكاندا كيەلى تاقتىڭ مەملەكەتتىك حاتشىسى پەترو پارولينمەن كەزدەسىپ، حالىقارالىق كۇن ءتارتىبىنىڭ نەگىزگى ماسەلەلەرى بويىنشا كەلىسسوز جۇرگىزدى.

سەنات توراعاسى قازاقستان مەن ۆاتيكان اراسىنداعى ديپلوماتيالىق قاتىناستار ورناعان 26 جىلدا جوعارى دەڭگەيدەگى ءوزارا تولىق تۇسىنىستىك پەن سەنىمگە نەگىزدەلگەن سىندارلى ىنتىماقتاستىق قالىپتاسقانىن اتاپ ءوتتى. ريم پاپاسى يوانن پاۆەل ءىى-ءنىڭ 2001 جىلى استاناعا ساپارى تاريحي وقيعا بولدى. ق.توقاەۆتىڭ ايتۋىنشا، بۇل ساپار قازاقستاندىقتاردىڭ ءالى ەسىندە، كوپتەگەن ۇلتتار مەن كونفەسسيالاردىڭ، ونىڭ ىشىندە كاتوليك ءدىنىنىڭ وكىلدەرى ءۇشىن تۋعان جەرگە اينالعان ءبىزدىڭ ەلىمىزدىڭ ىشكى جانە سىرتقى ساياساتىنا جوعارى باعا رەتىندە سانايدى.

جۇزدەسۋشىلەر جاھاندىق قاۋىپسىزدىكتى نىعايتۋ جانە دىندەر، مادەنيەتتەر مەن وركەنيەتتەر اراسىنداعى ۇنقاتىسۋدى جالعاستىرۋعا ەكى مەملەكەتتىڭ ۇستانىمدارىنىڭ جاقىندىعىن اتاپ ءوتتى.

ق. توقاەۆ الەمدىك جانە ءداستۇرلى دىندەر كوشباسشىلارىنىڭ سەزى تۋرالى مەملەكەتتىك حاتشىنى حاباردار ەتتى. پرەزيدەنت نۇرسۇلتان نازارباەۆتىڭ باستاماسىمەن شاقىرىلعان بۇل فورۋم ءىرى كونفەسسيالاردىڭ وكىلدەرى، مەملەكەتتەر مەن حالىقارالىق ۇيىمداردىڭ باسشىلارى جانە بەلگىلى ساياساتكەرلەر باس قوساتىن ءارى جاھاندىق سىن-قاتەرلەرگە بىرلەسىپ جاۋاپ ىزدەۋگە ارنالعان ەرەكشە الاڭ بولىپ تابىلادى.

بيىلعى 10-11 قازاندا استانادا «ءدىني كوشباسشىلار قاۋىپسىز الەم جولىندا» تاقىرىبى بويىنشا الەمدىك جانە ءداستۇرلى دىندەر ليدەرلەرىنىڭ VI كەزەكتى سەزى وتەدى. ق.توقاەۆ مەملەكەت باسشىسى ن. نازارباەۆتىڭ ريم پاپاسى فرانتسيسككە ارنالعان الداعى فورۋمعا قاتىسۋعا شاقىرۋدى ۆاتيكاننىڭ مەملەكەتتىك حاتشىسىنا تابىس ەتتى.

قازاقستان استاناسىنا كەلۋگە جانە سەزگە قاتىسۋعا شاقىرۋ كاردينال پەترو پارولينگە دە بەرىلدى.

پارلامەنت سەناتىنىڭ توراعاسى استانادا وتكەن «ەكسپو-2017» كورمەسىنە بەلسەندى قاتىسقانى ءۇشىن كيەلى تاققا العىسىن ءبىلدىردى. ۆاتيكان پاۆيلونى قازىرگى كەزدەگى وزەكتى ماسەلەلەر مەن بارشا ادامزاتتىڭ بولاشاعى ءۇشىن تابيعات ۇيلەسىمى ماڭىزدى ەكەنىنە كاتوليك شىركەۋى باسا نازار اۋدارىپ وتىرعانىن كورسەتتى.

پەترو پارولين الەمدىك جانە ءداستۇرلى دىندەر ليدەرلەرىنىڭ VI سەزىندە شاقىرعانى ءۇشىن العىسىن ءبىلدىردى. ول فورۋم الەمگە كەڭىنەن تانىمال بولا باستاعانىنىن ايتا كەلىپ، ۆاتيكان الداعى ۋاقىتتا دا بارلىق ءدىني نانىم-سەنىمدى ۇستانۋشىلار اراسىندا بەيبىتشىلىك پەن كەلىسىمدى ورنىقتىرۋ جونىندەگى قازاقستان پرەزيدەنتى ن.نازارباەۆتىڭ كۇش-جىگەرىنە قولداۋ ءبىلدىرۋدى جالعاستىرا بەرەتىنىن ناقتىلادى.

قازاقستان سەناتىنىڭ باسشىسى سول كۇنى يتاليا سەناتىنىڭ توراعاسى ماريا ەليزابەتتا البەرتي-كازەللاتيمەن كەلىسسوز جۇرگىزدى.

ق.توقاەۆ ديپلوماتيالىق قاتىناستار ورناعان 26 جىلدا قازاقستان مەن يتاليا ەكىجاقتى ىنتىماقتاستىقتى دامىتۋدا تاماشا تابىستارعا جەتكەنىن اتاپ ءوتتى. يتاليا ءبىزدىڭ ەلىمىزدىڭ ءۇشىنشى ساۋدا ارىپتەسىنە اينالدى، ءوزارا ساۋدا اينالىمىنىڭ كولەمى 10 ميلليارد دوللارعا جەتتى، 2006 جىلدان بەرى 10 جىلدا يتاليالىق تىكەلەي ينۆەستيتسيالار كولەمى 6 ميلليارد دوللاردى قۇرادى.

كەزدەسۋ بارىسىندا قازاقستاننىڭ كولىك-لوگيستيكالىق الەۋەتىنە جانە جىبەك جولىنىڭ جاڭا تۇجىرىمداماسىن ىسكە اسىرۋدا ءبىزدىڭ ەلىمىزدىڭ نەگىزگى رولىنە باسا نازار اۋدارىلدى. ق.توقاەۆتىڭ پىكىرىنشە، قازاقستان مەن يتاليا ءبىر-بىرىنەن الشاق ورنالاسسا دا كولىكتەردىڭ دامۋىنىڭ ارقاسىندا ەكى ەل جاقىن ارىپتەس بولا الادى.

كەلىسسوزدەر قورىتىندىسى بويىنشا قارقىندى پارلامەنتارالىق بايلانىستاردى جالعاستىرۋعا ۋاعدالاستىققا قول جەتتى. م.ە. البەرتي- كازەللاتي قازاقستانعا ساپارلاپ كەلۋگە شاقىرۋدى قابىل الدى.

Abai.kz