تاجىك پارلامەنتىنىڭ تومەنگى پالاتاسىنىڭ دەپۋتاتتارى 13 ماۋسىمدا قىلمىستىق كودەكستىڭ "تەرروريستىك سيپاتتاعى قىلمىستاردى جاساۋعا شاقىرۋ جانە (نەمەسە) تەرروريستىك ءىس-ارەكەتتەردى جاريا تۇردە اقتاۋ" دەگەن 179-بابىنا ەنگىزىلگەن وزگەرىستەر مەن تولىقتىرۋلاردى ءبىر اۋىزدان ماقۇلدادى. اتالعان باپقا «ينتەرنەت ارقىلى» دەگەن ءسوز تىركەسى ەنگىزىلگەن. ياعني الەۋمەتتىك جەلىلەر ارقىلى تەرروريزمگە ۇندەگەندەر ۇزاق مەرزىمگە باس بوستاندىعىنان ايىرىلادى.
تاجىكستاننىڭ سوت تاجىريبەسىندە فەيسبۋكتا تەرروريستىك سيپاتتا دەلىنگەن ماتەريالدارعا "لايك" باسقانى ءۇشىن جاۋاپقا تارتىلعان بىرنەشە وقيعالار بولدى.
تاجىكستانداعى تاۋەلسىزدىك باق-تىڭ ۇلتتىق قاۋىمداستىعى توراعاسى نۋريددين كارشيبوەۆ قىلمىستىق كودەكسكە ەنگىزىلگەن وزگەرىستەر ەكسترەميزم جانە تەرروريزمگە قاتىستى قىلمىستى قاتايتۋ دەپ بىلەدى. ونىڭ سوزىنشە، وسىعان دەيىن كەيبىر زاڭدارعا ەنگىزىلگەن وزگەرىستەر بۇل ماسەلەگە تىكەلەي نە جاناما قاتىستى بولعان.
«كەز كەلگەن ەسى دۇرىس ادام تەرروريزم مەن ەكسترەميزمنىڭ پايدا بولۋىن قولدامايدى. بىراق قۇقىق قورعاۋ ورگاندارى تاراپىنان زاڭ نورمالارىن دۇرىس تالدامايدى دەگەن قاۋىپ بار. سول ءۇشىن پارلامەنت وكىلدەرى حالىق اراسىندا دۇرىس ءتۇسىندىرۋ جۇمىستارىن جۇرگىزۋ كەرەك»، - دەيدى ول.
Abai.kz
