ۋاتساپ ارقىلى تاراپ جاتقان الماتى وبلىسىنىڭ اۋماعىنداعى قىتاي كاسىپورىندارى مەن جۇمىسشىلارىنا قاتىستى تاراپ جاتقان اقپاراتتار 100 پايىز ارانداتۋ!

انىعىن اتقارۋشى بيلىك تۇسىندىرە مە، جوق پا، وزدەرى بىلەر. بىراق، تالدىقورعان - ءۇشارال باعىتىنداعى اۆتوبان قۇرىلىسىن جۇرگىزۋ ءۇشىن قىتاي كومپانياسىنىڭ 3 اۋدان اۋماعىنان بىرنەشە جۇمىسشىلار قالاشىعىن تۇرعىزعانى راس! اقسۋ اۋدانى اۋماعىندا وسى جاعدايعا قانىق اداممەن ءوزىم سويلەستىم. ازىرگە جەرگىلىكتى تۇرعىندار تاراپىنان جاپپاي بوي كورسەتۋ، قارسىلىق ءبىلدىرۋ بايقالماعان. قحر مەملەكەتتىك تۋىنىنىڭ جەلبىرەۋىنە قاتىستى نارازىلىق سوزدەر ايتىلعان ەكەن، قازىر قالاشىقتارداعى قىزىل جالاۋ الىنىپ تاستالعان. (جالپى، بۇل جايلى دا اڭىز تاراپ كەتكەن عوي).

ەندى ەلدىڭ كوڭىل كۇيى تۋرالى: اناۋ ايتقانداي فوبيا مەن كونترارەكەت بايقالمايدى! مۇمكىن ىشتەي ءتاستۇيىن بولۋ شىعار، بىراق جاقىن ارادا وبلىستا "الدەكىمدەر" كۇتەتىندەي "سوعىس" بولمايدى!

ەل قويىن قۇرتتاپ، ايرانىن ۇرتتاپ ءجۇرىپ جاتىر.

بىراق، اقپارات ارانداتۋشىلىعى بولا بەرەتىن شىعار، ويتكەنى رەسمي تاراپ ءۇنسىز عوي.

ايتپاقشى، كەشە تالدىقورعاندا ەكى وبلىستىق گازەتتىڭ 100 جىلدىعى تويلاندى. ءدال سول كەزدە ۋاتساپتا انا اڭگىمە "كوپيروۆات، ۆستاۆيت" بولىپ جاتتى. قايراتكەرلەر، ءبىز ۇلت جاناشىرلارى دەپ تانيتىندار كوپ جينالدى. ەشكىم ەل ءىشىن كەزگەن ءسوز تۋرالى ايتپادى. ەسەسىنە، اعانىڭ ءىنىنى "شوشقا" دەپ تىلدەپ، اكىم بەرەتىن كونۆەرتكە تالاس بولدى. 

قىسقاسى، ەل امان، جۇرت تىنىش!

مەرەكە قۇتتى بولسىن، ارىپتەستەر!

قالماحانبەت مۇحامەتقاليدىڭ Facebook-تەگى پاراقشاسىنان

Abai.kz