مەملەكەت باسشىسى قالاداعى جاڭا نىساندارمەن تانىسۋ بارىسىندا ەلوردانىڭ 20 جىلدىعىنا وراي الماتى وبلىسى قايتا جوندەۋدەن وتكىزگەن «جەتىسۋ» ساياباعىنا باردى.

وبلىس اكىمى ا.باتالوۆ نۇرسۇلتان نازارباەۆقا ساياباقتا الماتى وبلىسىنىڭ كورنەكتى ورىندارىنىڭ ءبارى كورىنىس تاپقانىن ايتتى. ونىڭ كىرە بەرىسىندە جەتىسۋدى بەينەلەيتىن جەتى اركا، سۋبۇرقاقتارى بار باستى اللەيا ورنالاسقان، سونداي-اق تاۋ سىلەمدەرىنىڭ كورىنىسى جانە كيىز ۇيگە ۇقساس ورىن-جايلارى بار «اپورت» الاڭى، ءتۇرلى جاستاعى بالالارعا ارنالعان «تەنگري» الاڭى، شاعان اللەياسى، «تامعالى تاس» پەتروگليفتەرى بەينەلەنگەن تاستار جانە شارىن شاتقالىنىڭ ۇلگىسى بار.

قازاقستان پرەزيدەنتى مەن كورەرمەندەر ءۇشىن ساحنادا الماتى وبلىسىنىڭ تانىمال ارتىستەرى جانە ەتنومادەني ورتالىقتارىنىڭ وكىلدەرى ونەر كورسەتتى.

شاراعا قاتىسۋشىلار الدىندا ءسوز سويلەگەن نۇرسۇلتان نازارباەۆ الماتى وبلىسى استانانىڭ مەرەيتويىنا كەرەمەت ساياباق تارتۋ ەتكەنىن جانە ونىڭ ەلوردا تۇرعىندارىنىڭ سۇيىكتى دەمالىس ورنىنا اينالاتىنىن اتاپ ءوتتى.

– بۇگىندە بارلىق وبلىستار كومەك كورسەتىپ، قولداۋ ءبىلدىرىپ جاتىر. ويتكەنى، استانا – بۇكىل قازاقستاننىڭ جەتىستىگى. باس قالا قۇرىلىسىنا وڭىرلەردىڭ ءبارى اتسالىستى جانە قازىر مۇندا ەلىمىزدىڭ ءار تۇكپىرىنەن كەلگەن ادامدار ءومىر سۇرەدى. ءبىز ءححى عاسىردا عالامات دۇنيەنى بىرگە جاسادىق. ادامزات تاريحىندا مۇنداي قالالار ەشقاشان 20 جىلدىڭ ىشىندە سالىنباعان. ال، ءبىز سالدىق! – دەدى قازاقستان پرەزيدەنتى.

نۇرسۇلتان نازارباەۆ ءسوزىنىڭ سوڭىندا وبلىس باسشىلىعى مەن قۇرىلىسشىلارعا ريزاشىلىق ءبىلدىردى جانە شاراعا قاتىسۋشىلاردىڭ ءبارىن الداعى ەلوردا كۇنىمەن قۇتتىقتاپ، باق-بەرەكە تىلەدى.

سونىمەن قاتار، نۇرسۇلتان نازارباەۆ قالانىڭ الماتى اۋدانىندا ورنالاسقان «جەرۇيىق» ساياباعىن ارالاپ كوردى. وندا ەلباسىعا 19 جىل بۇرىن ءوزى وتىرعىزعان العاشقى اعاش كورسەتىلدى.

Abai.kz