حەلسينكيدەگى سامميتتەن سوڭ پۋتينمەن ءباسپاسوز كونفەرەنتسياسىن وتكىزگەن ترامپ ارناۋلى پروكۋرور روبەرت ميۋللەردىڭ تەرگەۋىن امەريكا ءۇشىن «قاسىرەت» دەپ اتادى.

امەريكالىق رەسپۋبليكاشىل سەناتور، قارۋلى كۇشتەر كوميتەتىنىڭ مۇشەسى ليندسي گرەم ادەتتە ترامپتى قولدايتىن. بىراق ترامپتىڭ دۇيسەنبى كۇنگى مالىمدەمەلەرىن اقش-تىڭ «السىزدىگى» دەپ باعالادى.

گرەم Twitter پاراقشاسىنا: «پرەزيدەنت ترامپ رەسەيدى 2016 جىلى سايلاۋعا ارالاسقانى ءۇشىن جاۋاپقا تارتىپ، الداعى سايلاۋعا ارالاسپاۋ جايلى قاتاڭ ەسكەرتۋ جاساۋ مۇمكىندىگىن جىبەرىپ الدى. ترامپتىڭ مۇنداي مالىمدەمەسىن رەسەي السىزدىك دەپ تۇسىنەدى. مۇنىڭ شەشكەنىنەن گورى تۋدىرعان ماسەلەسى كوپ» دەپ جازدى.

رەسپۋبليكاشىل سەناتور دجون ماككەين «حەلسينكيدەگى ءباسپاسوز كونفەرەنتسياسى – امەريكا پرەزيدەنتىنىڭ تاريحتاعى ەڭ ماسقارا بولعان كەزى. ترامپتىڭ اڭعالدىعىنان، وزىمشىلدىگىنەن، شىندىقتى بۇرىس قابىلداۋى مەن اۆتوريتارلى باسشىلارعا سىڭارجاقتىعىنان كەلگەن زالالدى باعالاۋ قيىن» دەدى.

اقش كونگرەسى وكىلدەر پالاتاسىنىڭ سپيكەرى، رەسپۋبليكاشىل پول رايان «رەسەيدىڭ ءبىزدىڭ ەلدەگى سايلاۋعا ارالاسقانىندا ەش ءشۇبا جوق. ول ءالى وسىنداعى (امەريكانى ايتادى) جانە الەمدەگى دەموكراتيانى شايقالتۋعا تىرىسىپ جاتىر. قۇندىلىقتارى مەن يدەالدارى قاراما-قايشى اقش پەن رەسەيدىڭ اراسىندا ەشبىر بايلانىس جوق» دەدى.

Abai.kz