بايقاپ ءجۇرمىن، قازىر قالا حالقىنىڭ سانى 2 ملن. ادامنان استى دەيتىندەر كوپ. دەگەنمەن دە، ءبىز رەسمي مالىمەتكە سۇيەنەمىز. وسى رەتتە سەيسەنبى كۇنى الماتى قالاسى بويىنشا ستا­تيستيكا دەپارتامەنتىنىڭ جەتەك­شىسى باعلان قاراعۇلوۆ جۋرنا­ليستەرگە ارناپ «2018 جىلدىڭ قاڭتار-ماۋسىمى ارالىعىنداعى الماتى قالاسىنىڭ الەۋمەتتىك-ەكونومي­كالىق دامۋىنىڭ قىسقا­شا قورى­تىندىلارى» دەگەن تاقى­رىپتا ءباسپاسوز ءماسليحاتىن وتكىزدى.

وندا الدىمەن باعلان ابايبەكۇلى ەلىمىزدەگى ەڭ ۇلكەن قالا – الماتىنىڭ الەۋمەتتىك-ەكونوميكالىق جاعدايىنا توقتالىپ ءوتتى. ونىڭ ايتۋى بويىنشا، بيىلعى جىلعى 1 شىلدەدەگى جاعدايعا قاراي الماتى حالقى رەسمي تۇردە 1 ملن. 800 مىڭ ادامنان اسىپتى. ارينە، بۇل ءبىز ويلاعاننان الدەقايدا تومەن. بىراق رەسمي مەكەمەلەردىڭ مالىمەتىنە سۇيەنبەسە تاعى بولمايدى.

سونداي-اق، بيىلعى ءبىرىنشى توقساندا حالىقتىڭ ورتا ەسەپپەن جان باسىنا شاققانداعى اتاۋلى اقشالاي تابىستارى قر ۇلتتىق ەكونوميكا مينيسترلىگى ستاتيستيكا كوميتەتىنىڭ باعالاۋىنشا 130 085 تەڭگەنى قۇراعان. بۇل وتكەن جىلعى كورسەتكىشتەن 3,9 پايىزعا جوعا­رى ەكەن. ال ەندى وسى كەزەڭدەگى جۇمىس­سىزدار سانى 49,6 مىڭ ادامدى نەمەسە جۇمىسسىزدىق دەڭگەيى جالپى جۇمىس كۇشى سانىنىڭ 5,2 پايىزىن قۇراعان ەكەن. ءسويتىپ، قازىر شاھارداعى ءبىر قىز­مەتكەردىڭ ورتاشا ايلىق جالاقىسى 187 781 تەڭگە شاماسىندا بولدى دەپ تىركەلىپ وتىر.

ارينە، الماتىلىقتاردىڭ حال-اقۋالى كوپ جاعدايدا قالاداعى تاۋار باعالارىنا سايكەس بولاتىنى بەلگىلى. ويتكەنى، تۇرعىنداردىڭ الاتىن جال­اقى­سى كوپ بولعانىمەن، ونى قالاداعى تۇتىنۋ نارقىنداعى باعا ارى تارتساڭ بەرى جەتپەيتىندەي ەتىپ تاستايدى. وسى ورايدا تۇتىنۋ باعالارىنىڭ يندەكسى بيىلعى ماۋسىمدا وتكەن جىلعى سايكەس كەزدەگىگە قاراعاندا 102,4 پايىزدى قۇراعان. بۇل رەتتە ازىق-تۇلىك باعاسى – 2,5 پايىزعا، ازىق-تۇلىك ەمەس تاۋارلار – 2,3, اقىلى قىزمەتتەر قۇنى – 2,3 پايىزعا وسكەن.

وسى سەبەپتەردەن دە بيىلعى 1 توق­ساندا قالامىزدىڭ جالپى وڭىرلىك ءونىم كولەمى 2 396, 1 ملرد. تەڭگەنى قۇراعان. سونىمەن قاتار، ۇستىمىزدەگى جىلعى التى ايدا نەگىزگى كاپيتالعا سالىنعان ينۆەس­تيتسيالار كولەمى 296 425,6 ملن. تەڭگەنى قۇراعان. بۇل وتكەن جىلدىڭ سايكەس كەزەڭىنەن 22,7 پايىزعا ارتىق ەكەن. سوسىن اعىمداعى جىلعى التى ايدا قالا ونەركاسىپ ءوندىرىسىنىڭ كولەمى قولدا­نىستاعى باعالاردا 429,2 ملرد. تەڭگەنى قۇراپ، وتكەن جىلعى سايكەس كەز­دەگىدەن 4,4 پايىزعا ارتىق كورسەتكىشتە بولعان.

قورىتا ايتقاندا، قالاداعى سوڭعى جاعدايدى وسىلاي قىسقاشا ايتىپ شىققان ستاتيستيكا دەپارتامەنتىنىڭ جەتەكشىسى باعلان قاراعۇلوۆ ەندىگى جەردە مۇنداي ءباسپاسوز ءماسليحاتتارى ءار توقسان سايىن ءوتىپ تۇراتىنىن تىلگە تيەك ەتىپ ءوتتى. سوسىن ول ءسوزىنىڭ سوڭىندا كەلەر جىلى ەلىمىزدە قالىپتاسقان ءداس­تۇر بويىنشا حالىقتىق ساناق وتەتىنىن حابارلاپ ايتتى. بۇل رەتتە قازىر وزدە­رىنىڭ سول ساناققا دايىندالىپ جاتقا­نىن كەلتىردى.

قۇتتىبەك ايماحان

Abai.kz