وقيعا شىلدەنىڭ 29-ى كۇنى تاجىكستاننىڭ حاتلون وبلىسى داڭعارا اۋدانىندا ورىن الدى. بەلگىسىز بىرەۋلەر ۆەلوسيپەدپەن ساياحاتتاپ جۇرگەن شەتەلدىك تۋريستەر توبىن كولىكپەن قاعىپ، وقيعا ورنىنان قاشىپ كەتكەن. وقيعا سالدارىنان اقش-تىڭ ەكى ازاماتى، گوللانديالىق جانە شۆەيتساريانىڭ ءبىر ازاماتى قازا تاپتى. تاعى بىرنەشە شەتەلدىك جارالانىپ، اۋرۋحاناعا جەتكىزىلدى.
يم يدەولوگياسىن جۇرگىزەتىن Amaq اقپاراتتىق سايتى 31 شىلدەدە ۆيدەو جاريالادى. وندا شەتەلدىك تۋريستەردى ءولتىردى دەپ ايىپتالىپ وتىرعان ءتورت جاس جىگىت يم باسشىسى ابۋباكىر ءال-باعداديعا انت بەرىپ جاتىر. انت بەرۋشىلەر تالدىڭ استىندا، نۇرەك سۋقويماسى جاعاسىندا وتىر، ولاردىڭ ارتىندا يم-ءنىڭ قارا جالاۋى ءىلۋلى تۇر.
ۆيدەوروليكتە تەراكتىدەن كەيىن ۇستالدى دەپ حابارلانعان حۋسەين ابدۋسامادوۆ ورىس تىلىندە سويلەيدى. ۆيدەودان ۇستاۋ كەزىندە قارسىلىق بىلدىرگەندىكتەن ءولتىرىلدى دەلىنگەن دجافاريدين يۋسۋپوۆ پەن زافار سافاروۆتى دا بايقاۋعا بولادى. يم شەتەلدىك تۋريستەرگە شابۋىلدى موينىنا العان.
تاجىكستان باس پروكۋراتۋراسى بۇل وقيعاعا قاتىستى تەرروريزم جانە ادام ءولتىرۋ ءىسى بويىنشا قىلمىستىق ءىس قوزعالعانىن مالىمدەدى.
Abai.kz
