قوستاناي قالاسىنىڭ اكىمدىگى جىل سايىن ءبىر شالا ءبۇلىنىپ قالادى. ونىسى قالىپتاسقان ءداستۇر بويىنشا تامىز ايىنىڭ اياعىندا مىندەتتى تۇردە اتالىپ وتەتىن «قالا كۇنى» دەيتىن مەرەكەدە ايدى اسپانعا شىعاراتىنداي داڭعويلىقتى باستاپ جىبەرگەنىنەن انىق بايقالادى. مۇنىڭ ەڭ ماڭىزدى بولىگى - ولسەڭ دە، تىرىلسەڭ دە كورشىمىزدىڭ انشىلەرىنىڭ ءبىرىن شاقىرىپ، وسىنداعى وزگە جۇرتقا ءبىر جاعىنىپ قالۋ. بۇل ءۇشىن قانداي دا شىعىننان ايانبايدى. ولار قانشا قوماقتى اقشا سۇراسا دا ءبىر اۋىز سوزگە كەلمەستەن ۇستاتا سالادى. جانە دە بۇل «ءداستۇر» ەش ۋاقىتتا بۇزىلعان ەمەس.

وبلىستى باسقارعان كۋلاگين كەزىندە دە، ءوز «پەرزەنتىمىز» سادۋاقاسوۆ باسقارعاندا دا ءدال وسىلاي بولدى. ەندى مىنە ارحيمەدىمىز دە (قازىرگى باسشىمىزدى ايتام) الدىڭعىلار سالعان جولمەن زۋلاتىپ كەلەدى. نە دەيمىز ەندى ءوڭىر تىزگىنىن ۇستاعان جاس باسشىمىزعا. «الدىنان جارىلقاسىن» دەيدىك تە قويدىق. ءبىزدىڭ قولدان نە كەلەدى؟ ونىڭ ۇستىنە اكىمىمىز ەش ۋاقىتتا جۋرناليستەردى كوزگە ىلگەن ەمەس، ولاردىڭ جازعاندارىن وقىعان دا ەمەس. بۇرىنعىداي وبلىستاعى جۋرناليستەرمەن كەزدەسىپ، ارنايى سۇحبات وتكىزۋ دەگەندى ۇمىتقانىمىز قاشان؟ بۇل اكىمىمىزدىڭ «قۇپيا» جۇمىسىنىڭ جەمىسى.

ارحيمەد مۇحانبەتوۆ

بيىل، مىنە، تامىزدىڭ 25 كۇنى وتەتىن بۇل مەرەكەدە دە سول داڭعويلىق ودان ءارى جالعاساتىن ءتۇرى بار. مۇنى قالالىق اكىمدىكتىڭ مادەنيەت ءبولىمىنىڭ باسشىسى ايسۇلۋ اۋباكىروۆانىڭ قۋانا حابارلاعان سوزىنەن ۇقتىق.

"قوستانايدىڭ تويىن دۇركىرەتەدى" دەگەن "كومبيناتسيانىڭ" انشىلەرى... مىنە، وسىلار

 - مەرەكەمىز رەسەيدىڭ «كومبيناتسيا» توبىنىڭ ونەر كورسەتۋمەن اياقتالادى، -دەيدى ول. - بۇگىن ولاردىڭ كەلەتىندىگى تۋرالى انىق بىلدىك. توپتىڭ مۇشەلەرى دە بۇرىنعىداي. وندا الەنا اپينا مىندەتتى تۇردە بولادى.

اپينانىڭ مىندەتتى تۇردە بولاتىنىنا جەرگىلىكتى بيلىك قانشا قۋانعانىمەن، بۇل شاتتىقتى ءبىز بولىسە المادىق. ويتكەنى بىرەۋدىڭ قاڭسىعىنا تاڭسىق بولۋدىڭ اياعى نەگە اكەلىپ سوعاتىنىن بولجاۋ قيىن ەمەس شىعار. قايران قازاقتىڭ بايلىعى دەسەڭىزشى، رەسەي جۇلدىزدارىن جارىلقاپ جاتقان. وسى ءوزىمىزدى قور ساناپ، وزگەلەردى زور سانايتىن قۇلدىق پسيحولوگيادان قاشان قۇتىلار ەكەنبىز؟

جايبەرگەن بولاتوۆ، قوستاناي

Abai.kz