باربي دەگەن قۋرىشاق بار. قازىر تۇلىمشاعى جەلبىرەگەن بۇلدىرشىندەردىڭ ەكىنىڭ ءبىرىنىڭ قولىنان كورەسىڭ. ەس توقتاتقاندارى دا، وڭ-سولىن اجىراتىپ بولماعاندارى دا سول «سۇيكىمدى سۇلۋدى» ەرمەك قىلادى.

ول قۋىرشاقتىڭ وزىنەن جاساۋى كوپ. اينا-تاراعىنان باستاپ، وپا-دالابىن ەسەپتەمەگەندە، ىدىس-اياعى، اقىر سوڭى جەكە توسەك-ورنىنا دەيىن جەتىپ ارتىلادى. بالا كوڭىلى ءۇشىن اتا-انا شاما-شارقىنشا ءبارىن الىپ بەرەدى عوي... بىراق... جاقىندا سول قۋىرشاقتىڭ «جۇكتى ەكەنىن» ءبىلدىم... مۇمكىن «اياعى اۋىر بولعانىنا» ءبىراز ۋاقىت وتكەن شىعار. ءوز باسىم جاقىندا كوردىم. الگىمەن ءتىلى دە تولىق شىعىپ ۇلگەرمەگەن قىز بالا ويناپ ءجۇر.

اياعى اۋىر ءباربيدىڭ ءىشى «اشىلادى»، ياعني، تۋادى، ىشىنەن بالا شىعادى. قايتا «جۇكتى قىلعىسى كەلسە»، بالاسىن ىشىنە قايتا سالىپ قويادى. ءتىپتى، youtube-تە قارشاداي قىزداردىڭ ءباربيدى قالاي «بوساندىرىپ الۋ كەرەكتىگىن» بۇگە-شىگەسىنە دەيىن «ءتۇسىندىرىپ» بەرەتىن ۆيدەوسى دا ءورىپ ءجۇر. ءسابي-قۋىرشاقتى «اناسىنىڭ ىشىنەن شىعارا» بىلگەن بالا ونىڭ «ىشتە قالاي پايدا بولاتىنىنان» دا حابارى بارىنا كۇمانىم جوق... قاراپ وتىرىپ، انا جەتكىنشەكتەردىڭ جاسىندا بۇل تاقىرىپتا «قاراڭعى» بولعانىڭا قاراداي قىسىلادى ەكەنسىڭ. 

«قازىر زامان باسقا»، «ۋاقىت بولەك» دەپ ءوز-ءوزىمىزدى الداۋسىراتقانىمىزبەن، بالا بالالىق شاعىندا بالا بولعانى دۇرىس. بالالىق شاقتىڭ بار باقىتى دا سوندا ەمەس پە – سابيدەي تازا، سابيدەي پاك، سابيدەي اڭقاۋ كوڭىلىندە. ال، باربي سول بالالىقتى ۇرلاپ جۇرگەندەي كورىندى ماعان... 

ءبارىمىز بالا كەزدە قۋىرشاق قۇنداقتاپ، شاشىن تاراپ، كويلەگىن تىگىپ وستىك. بىراق «بالا بوسىندىرىپ» ويناعان ەمەسپىز. 

جالپى باتىستىڭ قاڭسىعىن تاڭسىق قىلۋدى قاشان قويار ەكەنبىز؟ بالانىڭ مىنەزىن بۇزۋ دەگەن وسى ەمەس پە؟ ءسىزدىڭ بالاڭىز دا باربيمەن ويناي ما؟ .... سۇراق كوپ...

بانۋ ءالىمجانوۆانىڭ Facebook-تەگى پاراقشاسىنان

Abai.kz