جىلوي اۋدانىنان ءبىر كۇرەسكەر پالۋان شىقتى ما? مىقتى دزيۋدوشى مەن كاراتەشى شىقتى ما? ەڭ بولماسا جىلويدان شىققان ءبىر بوكسشىنى اتاپ بەرە الاسىڭدار ما? ەرتەرەكتە 4-اۋىلدان باۋىرجان ىبىراەۆ  دەگەن باۋىرىمىز شىققان بولاتىن. جايمەن شاكىرت تاربيەلەي باستاعان. ونى كوتەرمەلەپ, جاعدايىن جاساپ قولداۋ كورسەتكەن ەشكىم بولمادى. امال جوق, بوكستىڭ باعى جانباي ول بوكسشىمىزدىڭ ءومىر جاسى دا قىسقا بولدى. ا

ۋىلعا قاۋقيتىپ ساپاسىز فۋتبول الاڭىن سالا بەرگەننەن دە بىرنارسە ونە مە? سەبەبى, ونى قاداعالاپ, رەتتەپ وتىراتىن جاۋاپكەر بىرەۋ بولماسا، ونىڭ ءبارى بەكەر! سوڭعى شەتەل ۇلگىسىمەن سالىنىپ جاتقان فۋتبول الاڭدارىن قاراپ وتىرساڭ, استىڭعى سىمدارىن مىجىپ-مىجىپ سيىر كىرەتىندەي ەتىپ مايىستىرىپ تەسىپ تاستاعان. جانە ءبىر اۋىلدا بولسا ەكىنشى اۋىلدا جوق. وزگە اۋىلدىڭ بالدارى وزگە اۋىلداعى فۋتبول الاڭىنا بارىپ ويناي المايدى. سەبەبى, كۇشتەرى وزدەرىنەن اۋىسپايتىن "بوەۆيك" جاستار ءبىر-ءبىرىن ءوز شەكارالارىنا جاقىنداتپاي قىرىپ سالادى. ءار اۋىلدا جاستاردى اۋىزبىرلىككە ۇندەپ جاتقان نامىستى اعا بۋىندار جانە جوق!

جىلوي اۋدانىنا مىقتى باپكەرلەر مەن جاتتىقتىرۋشىلار شاقىرتپاي ەشتەڭە ونبەيدى. مىسالى, بارلىق جاعدايىن جاساپ قانات يسلامدى الىپ كەلسەك, قۇرىعاندا قۇلسارىدا 5 جىل تۇراقتاتساق, ارتىندا مىقتى شاكىرتتەر قالار ەدى. ارداق نازاروۆ سەكىلدى رۋحاني باي باۋىرلارىمىزدى الدىرىپ، 5 جىل ۇستاساق تا, ارتتا ءىز بەن ناتيجە قالار ەدى عوي. قۇر سپورتتىق كەشەندەر مەن عيماراتتار سالعاننان ەشتەڭە وزگەرمەيدى.

بىزگە, ءبىزدىڭ ۇرپاققا ۇستازدار جەتپەيدى, بىزدە ۇستازدار مۇلدەم جوق, بىزگە ۇستازدار اۋاداي قاجەت! جوعارىداعى اكىمدەر, وسىعان قاتتى كوڭىل بولىڭدەر! ايتپەسە, ەندىگى جەردە ءبارى كەش بولادى, بىزدە ۇرپاقتان ايرىلىپ قالۋ قاۋپى بار. مىنانداي ەكى كۇننىڭ بىرىندە ءبىر-ءبىرىن پىشاقتاپ جاتقان ورتادا ۇرپاق ءوسىپ ۇرپاق دامي ما? ەر بالالارىمىزدىڭ ءبارىن ەندىگى جەردە سپورتقا باۋلىماساق, قىزتەكە, پەدوفيل سەكىلدى باعىتقا ءبىر تابان جاقىنداپ كەتۋى مۇمكىن! ۇكىمەت, ەل بولىپ وتىرىپ بوقمۇرىن بالالارىمىزدىڭ تەنتەكتىكتەرىن توقتاتا الماساق, نيەتى مەن مىنەزىن وزگەرتە الماساق بىزگە ۇلكەن سىن! بۇلارعا ارا تۇسپەسەك, ەرتەڭگى كۇنى مۇنداي جاستاردان ەلىم دەپ شىرىلداعان مۇستافا وزتۇرىك سەكىلدى ۇلتشىل بورىلەرىمىزدى ءولتىرىپ كەتەتىن ساتقىندار عانا شىعادى. ءبىز ىقشاماۋدانداعى جاستار توبەلەسىن مىندەتتى تۇردە توقتاتامىز! بىزگە ءبىر-ءبىرىن قىراتىن ەمەس, ەلى جەرى, ۇلتى ءۇشىن تۇراتىن التىن ۇرپاق قاجەت! ءبىزدىڭ ءار ۇرپاق, ەرتەڭگى كۇنى ەل قورعايتىن ءبىر-ءبىر اسكەر! بىزگە وسكەلەڭ التىن ۇرپاقتىڭ نامىستى دا رۋحتى بولعانى ماڭىزدى! سوندىقتاندا, ءبىز اعا بۋىندار, بۇل ماسەلەدە بارىمىزدى سالامىز! قولدايتىن, قوشتايتىندارىڭ بولسا قانە, بوي كوتەرىڭدەر, حابارلاسىڭدار!

بۇيىرسا, قىركۇيەكتىڭ ءبىرىنشى جۇلدىزىن "جىلوي جاستارىنىڭ دوستىق كۇنى" دەپ بەلگىلەپ, ورتالىق ساياباق ماڭىنا ۇلكەن جينالىس وتكىزەيىك! بۇل ەل بولىپ قولعا الاتىن ۇلكەن شارۋا! بۇعان ۇلكەن-كىشى ءبارىڭ اتسالىسىڭدار! نەگە ءبىز ىرگەسى سوگىلمەگەن ۇلكەن ەل بولا وتىرىپ ىقشاماۋدان توبەلەسىن توقتاتۋعا قاۋقارسىزبىز? جوعارى بيلىكتە وتىرعاندار اي قاراپ وتىر ما? الدە ولارعا قازاقتىڭ ءبىر-بىرىمەن قىرىلىپ ءولۋى كوك تيىن با? وسى ماسەلەدە اۋدان اكىمى ۇلكەن جينالىس ۇيىمداستىرۋى كەرەك! بارلىق لاۋازىمدى تۇلعالاردىڭ باسىن قوسىپ بۇل تىعىرىقتان شىعاتىن جولدى ىزدەۋ كەرەك! مىسالى, ەلدىڭ تىنىشتىعى بارلىق قۇقىق قورعاۋ قىزمەتكەرلەرىنە تيەسىلى ەمەس پە? ءبىر-ءبىرىن اياۋسىز قىرىپ جاتقان جاستاردىڭ پروبلەماسى الدە ولاردىڭ قۇزىرلارىنا كىرمەي مە? بۇل تەك ءىىب-ءنىڭ موينىندا دەگەنگە مەن ەشۋاقىتتا قوسىلمايمىن! بىزدە "تەرروريزمنىڭ الدىن الۋ" دەگەن ساياسات پەن كوزقاراس بار ما? بۇگىن ءوز باۋىرىنا پنەۆمات, اسا تاپانشالارىمەن وق اتىپ, پىشاقپەن تىلگىلەپ جاتقان جاستار وسە كەلە ەرەگەسپەن, كەك الۋ ماقساتىندا وزدەرىنە قارسى ءبىر مولتەكاۋداندى تۇگەل جارىپ جىبەرۋدى ىسكە اسىرماسىنا كىم كەپىل? سەبەبى, قازىرگى تاڭدا شەكاراسىز الەۋمەتتىك ينتەرجەلىنىڭ سيقىرلى ۋاعىزى كۇشى بويىنا سيماي بۋىرقانىپ تۇرعان ميسىز جاستارعا ۇيرەتپەي جاتقان بالەلەرى جوق! سوندىقتاندا, ءبارىڭدى جىلوي اۋدانىنداعى شىمبايعا باتقان وسى وزەكتى ماسەلەنى توقتاتۋعا شاقىرامىن! ەلدە "شۇكىر ءتىرىمىن, مەن بارمىن" دەگەن نامىستى, ەلىن ويلايتىن مىقتى جىگىتتەر بولسا, ءبىراۋىزدان اتسالىسىڭدار!

"جاللعىزدىڭ ءۇنى, جاياۋدىڭ شاڭى شىقپاس" دەگەن, ءبىر ادامنىڭ شىرىلى نە شەشەدى? سوندىقتاندا, "ءجىپ بىرىكسە ارقان, ەل بىرىكسە قالعان" دەگەن قاعيدامەن ءبىر جەڭنەن قول شىعارايىق, اعايىن! ءوزىن قاسقىر سانايتىن قازاق باۋىرلارىما ايتارىم, بولتىرىكتەرىڭدى دۇرىستاپ باۋلىڭدار! ۇيرەتىلمەگەن بولتىرىك ءشيبورى-شاكالعا اينالادى. ال قازاق جازيراسىن وڭكەي ءشيبورى قاپتاسا, وندا ءبىر كۇنى ءوز بولتىرىگىڭنىڭ قولىنان ءولدىم دەي بەر!

كوزدەرىڭدى اشىڭدار, ويانىڭدار باۋىرلار! 

تۇرار شاپقارا

Abai.kz