توقسانىنشى جىلداردىڭ كەزىندە يسلام ينستيتۋتىندا مىناداي وقيعا بولعان ەكەن. ستۋدەنتتەرىنىڭ الدىندا سىيلى، وتە بەدەلدى ۇستاز دارىسحاناعا كويلەگىنىڭ ءبىر تۇيمەسىن دۇرىس سالماي كەلىپتى. ءوزى ءدارىس وقىپ تۇر. شاكىرتتەرىنىڭ نازارى بىردە ونىڭ ايتقان تامسىلىندە، بىردە ەبەدەيسىز سالىنعان كويلەگىنىڭ تۇيمەسىندە بولىپ، ويلارى ءبولىنىپ ابدەن ىعىرلارى شىقسا كەرەك. اقىرى ءوزارا سىبىرىلاسىپ اقىلداسا كەلە، ارالارىنان ءبىر شاكىرت قول كوتەرەدى:
- ۇستاز، كەشىرىڭىز، ءسىز كويلەگىڭىزدىڭ تۇيمەسىن دۇرىس سالماپسىز..! - دەپ جوندەۋىن وتىنەدى. سوندا تۇنجىراعان ۇستازى:
- نەگىزى، مەن كويلەگىمنىڭ تۇيمەسىن ادەيى وسىلاي سالىپ كىرگەن ەدىم. جۇمىسقا كەلگەندە، كافەدرادا وتىرعاندا مۇنى ەشكىم كورمەدى دەپ ويلايسىزدار ما؟! ەكىنشىدەن، وسى بولمايتىن نارسەگە بولا ويلارىڭ ەكىگە ءبولىنىپ، ەڭ ماڭىزدى ءبىلىم الۋعا دەگەن قۇشتارلىقتارىڭىزدى، ايتىلعان دۇنيەلەردى ساناعا ءسىڭىرىپ الۋعا دەگەن ۇمتىلىستارىڭىزدى باسقا نارسەگە اۋىستىرىپ العاندارىڭىزعا قىنجىلامىن. ۇشىنشىدەن، ۇستازدارىڭىزعا ەشقاشان سىن ايتۋعا داعدىلانباڭىزدار، ويتكەنى، ۇستازدىڭ اتى ۇستاز، ۇلكەننىڭ اتى ۇلكەن، ولاردى بارىنشا قادىرلەۋگە تيىسسىزدەر. تورتىنشىدەن، ايتاتىن ويلارىڭىز بار ما، وندا پىكىرلەرىڭىزدى جەكە-دارا قالعان كەزدە ايتىڭىزدار. ادەپتىلىك دەگەن وسى! - دەگەن ەكەن.
راسىندا، وسى قاسيەتتەن ايىرىلىپ بارامىز با، قالاي؟ ادىلدىكپەن ەسەپتەلەتىن تىك مىنەزدى بەتپاقتىققا، "ماقتامەن باۋىزدايتىن" تاپقىرلىقتى كەمسىتۋشىلىككە، ۇلكەنگە قۇرمەتتى جالپاقشەشەيلىككە، ۇياتتى مەڭزەيتىن وبال-ساۋاپ تۇسىنىگىن ارسىزدىققا ايىرباستاعان قوعام ەشقاشان ىلگەرى اتتاماسىن نەگە تۇسىنبەيمىز؟!
ءبىز اكىمشىل-امىرشىلدىك جۇيە كەشىرىم سۇراتاتىن جاتتىقتىرۋشىنى ەمەس (ول ونسىزدا سولاي بولارىن بىلدىك), ءوز ۇستازىن سىيلامايتىن، ۇلكەندى قادىرلەمەيتىن، قاساقانا ارەكەت جاساۋعا بەيىم، تۋ سىرتىنان پىشاق ۇرىپ، ساتىپ كەتۋگە دايىن (ارامزالىق دەسە دە بولادى) بالالاردىڭ تاربيەسى تۋرالى تالقىلاۋىمىز كەرەك ەدى. وكىنىشكە وراي، ولاي بولمادى. "ۇستازدىڭ مارتەبەسىن قايتارىڭدار!" دەپ بيلىككە سىن ايتقانعا قۇمار قوعام، مۇعالىمنىڭ قادىرىن ءوزى كوتەرۋگە بەيىل ەمەس ەكەندىگىن ءبىلدىرىپ الدى...

دارمەن سمايىلدىڭ facebook پاراقشاسىنان

Abai.kz