31 – تامىز كۇنى ۋكراينانىڭ دونەتسك ايماعىندا بولعان جارىلىستان  سەپەراتيستەردىڭ جەتەكشىسى الەكساندر زاحارچەنكو قازا تاپتى. بۇل مالىمەتتى   قازاقستاندىق سايتتار دا جارىسا جازدى.

بىراق، وسى جايت ەلىمىزدەگى جۋرناليستەردىڭ ۇستانىمدارى ەكى ءتۇرلى ەكەنىن كورسەتىپ بەرگەندەي. ماسەلەن، Tengrinews.kz سايتى  “دونەتسك حالىق رەسپۋبليكاسىنىڭ باسشىسى الەكساندر زاحارچەنكونى ولتىرگەن كۇدىكتىلەر ۇستالدى”،- دەپ جازادى.

الايدا، قازاقستان رەسمي تۇردە مويىنداماعان ايماقتى  مەملەكەت رەتىندە قاراستىرىپ، اقپارات بەرۋگە جۋرناليستەردىڭ قانداي قۇقىعى بار؟ مۇنى سول سايتتىڭ تىلشىلەرى شىنىمەن بىلمەدى مە؟ الدە، بەيتاراپ بولۋعا ءتيىس جۋرناليستەر ءوز ۇستانىمدارىن كورسەتىپ قالۋعا تىرىستى ما؟ قالاي دەسەك تە، مەملەكەتتىك مۇددەگە سايكەس كەلمەيتىن اقپارات تاراتۋ زاڭعا قايشى ەكەنىن ەسكەرۋگە ءتيىسپىز. بۇل تۋرالى  رۋسلان تۇسىپبەكوۆ ەسىمدى ازامات تا  facebook پاراقشاسىندا جازعان بولاتىن.

ەستەرىڭىزگە سالا كەتەيىك، الەكساندر زاحارچەنكو دونەتسك قالاسىنداعى كافەلەردىڭ بىرىندە بولعان جارىلىستان قازا تاپتى. رەسەي  بۇل شابۋىلعا رەسمي كيەۆتى ايىپتاعان بولاتىن. قارسى تاراپ مۇنى "تەررورشىلار مەن ولاردىڭ رەسەيلىك دەمەۋشىلەرىنىڭ اراسىنداعى قاقتىعىس ناتيجەسى" دەپ سيپاتتادى.

ال، الەكساندر زاحارچەنكو وسى كەزگە دەيىن ءوزىن "دونەتسك حالىق رەسپۋبليكاسىنىڭ جەتەكشىسى" دەپ كورسەتىپ كەلگەن. ءبىزدىڭ مەملەكەت رەسمي تۇردە دونەتسك حالىق رەسپۋبليكاسىن مويىنداعان ەمەس. بىراق، ءورىستىلدى جۋرناليستەردىڭ سەپاراتيستەر قۇرعان الدەبىر ساياسي ۇيىمدى "مەملەكەت" دەپ تانۋى كەزدەيسوقتىق بولماسا كەرەك.

نۇربيكە بەكسۇلتانقىزى

Abai.kz