ۇلتتىق بانكىنىڭ باسقارماسىمەن قابىلدانعان قاۋلىعا سايكەس شىمكەنت قالاسى ءۇشىن "7-20-25" باعدارلاماسى بويىنشا ساتىپ الىناتىن تۇرعىن ءۇيدىڭ ەڭ جوعارعى سوماسى  25 ملن. تەڭگەگە دەيىن ۇلعايتىلدى. بۇرىن بۇل سوما 15 ميلليون تەڭگەنى قۇراعان بولاتىن.

ەستەرىڭىزگە سالا كەتەيىك، اعىمداعى جىلدىڭ 19 شىلدەسىندە شىمكەنت رەسپۋبليكالىق ماڭىزى بار قالانىڭ مارتەبەسىنە يە بولدى. ءتيىستى جارلىققا مەملەكەت باسشىسى قول قويدى.

«بۇل شىمكەنت تۇرعىندارى ءۇشىن جاعىمدى جاڭالىق. قالادا تۇرعىن ءۇي قۇرىلىسى بەلسەندى تۇردە دامىپ كەلەدى. بۇگىندە شىمكەنتتە 700 مىڭ شارشى مەتر تۇرعىن ءۇي سالىنۋدا. ءليميتتىڭ ۇلعايۋى قالا تۇرعىندارىنا تۇرعىن ءۇي جاعدايىن جاقسارتۋعا قوسىمشا مۇمكىندىك بەرەدى»، - دەدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.

وسىلايشا، ەلىمىزدىڭ 5 قالاسىندا باعدارلاما اياسىندا تۇرعىن ءۇيدى ساتىپ الۋدىڭ ەڭ جوعارعى سوماسى 25 ملن. تەڭگەنى قۇرايدى. بۇلار استانا، الماتى، اقتاۋ، اتىراۋ جانە شىمكەنت. باسقا وڭىرلەردە باعدارلاما بويىنشا تۇرعىن ءۇيدى 15 ملن. تەڭگەدەن قىمبات ەمەس باعاعا ساتىپ الۋعا بولادى.

Abai.kz