قازاقستاننىڭ مەملەكەتتىك بورىشى 14,2 تريلليون تەڭگە نەمەسە ءجىو-ءنىڭ 24,8 پروتسەنتىن قۇراپ وتىر. سەنات دەپۋتاتى ءالي بەكتاەۆ مەملەكەتتىك قارىزدىڭ جىل سايىن ءوسىپ بارا جاتقانىنا الاڭداۋشىلىق ءبىلدىردى، دەپ حابارلايدى Sputnik قازاقستان تىلشىسى.

ال سەناتورلاردىڭ الدىندا ەسەپ بەرگەن قر قارجى ۆيتسە-ءمينيسترى رۋسلان بەكەتاەۆ بولدى.

- مەن مىنا ماسەلەگە كوڭىل بولگىم كەلەدى. زايم دەگەن قارىز عوي، سولاي ەمەس پە؟! قارىزدى قايتاتىن جەرگە، ياعني وندىرىسكە، بيزنەسكە، تاعى باسقا سالالارعا سالۋ كەرەك. ءتۇرلى حالىقارالىق قارجى ينستيتۋتتارىنان قانشاما قارىز الىپ، ونى ءبىلىم، مەديتسينا، جۇمىسپەن قامتۋ سالالارىنا سالۋ دەگەندى ءوز باسىم تۇسىنبەيمىن. سىزدەر ەكونوميستسىزدەر عوي، ماعان سونى تۇسىندىرىڭىزدەرشى. نەگە ءبىز قارىزدى قايتپايتىن سالاعا سالامىز؟ سول ءبىلىم سالاسىنا دا، دەنساۋلىق سالاسىنا دا ءوزىمىزدىڭ بيۋدجەتتە اقشا قاراستىرىلعان. مۇعالىمدەردى دايارلاۋ، وقىتۋ، مەكتەپتەرگە ءتيىستى ماتەريالدىق جاعداي جاساۋ، مۋلتيمەديالىق كابينەتتەر الىپ بەرۋ، مەديتسينالىق ساقتاندىرۋدى ءتۇسىندىرۋ – مۇنىڭ بارلىعى ءبىزدىڭ مەملەكەتتىك ورگانداردىڭ تىكەلەي مىندەتى.

رەسپۋبليكالىق بيۋدجەتتىڭ بۇكىل شىعىسى وسىنداي نارسەلەردەن قۇرالادى، سولارعا قارجى قارايمىز. بىراق ءبىز شەتەلدەن، بولماسا حالىقارالىق قارجى ۇيىمدارىنان قارىز الامىز دا، ءسويتىپ ونى قايتپايتىن سالاعا سالامىز. مەن وسىنى تۇسىنبەيمىن. قارجىگەرلەر، ماعان ءتۇسىندىرىپ بەرىڭىزدەرشى.

رۋسلان باقىتجانۇلى، ءسىز ءوز سوزىڭىزدە مەملەكەتتىك بورىشتىڭ قاۋىپسىز دەڭگەيدە ساقتالىپ وتىرعانىن بىرنەشە مارتە اتاپ ءوتتىڭىز. مەملەكەتتىك قارىزدى قالاي ازايتۋ كەرەكتىگىن ەمەس، ونى قاۋىپسىز دەڭگەيدە ساقتاۋ تۋرالى اڭگىمە ايتىپ وتىرسىز. ءبىزدىڭ قارجى ورگاندارىنىڭ لەكسيكونى قالاي وزگەرىپ جاتقانىن ءتۇسىنىپ وتىرسىز با؟ سوڭعى 5 جىلدا ۇكىمەتتىڭ قارىزى 5,8 ەسەگە وسكەن. بۇگىندە مەملەكەتتىك قارىزدىڭ جالپى كولەمى ءجىو-ءنىڭ 50 پروتسەنتىنە جۋىقتادى. ءجىو-ءنىڭ 50 پروتسەنتى دەگەن قازاقستاننىڭ بار تاپقان تابىسىنىڭ تەڭ جارتىسى. تۇسىنەسىز بە؟

ءبىز بيۋدجەتتىك زاڭناما اياسىندا وسى شەكتى دەڭگەيدى ءوز قولىمىزبەن كوتەرىپ وتىرمىز. ۇكىمەت ءوز قاۋلىسىمەن كوبەيتىپ وتىر، سول ارقىلى شەكتى دەڭگەيدەن اسقان جوقپىز دەپ ءوزىمىزدى جۇباتامىز. قالاي سوندا؟ مەملەكەتىمىزدىڭ ەكونوميكالىق تۇراقتىلىعىنا نەگە سونشا نەمقۇرايلى قارايمىز؟ مەن وسىنى تۇسىنبەيمىن

كۆازيسەكتوردىڭ سىرتقى قارىزىنىڭ شەكتى كولەمىن 2018 جىلى 7 تريلليون تەڭگە دەپ بەكىتتىڭىزدەر. بۇل قانداي پروتسەنت سوندا، نەدەن ولاي بەكىتىلىپ وتىر؟ 7 تريلليون دەگەن ەشتەڭە بىلدىرمەيدى. ءسىز ءوز سوزىڭىزدە ەاەو ەلدەرى ءۇشىن شەكتى دەڭگەي 50 پروتسەنت دەپ ايتىپ ءوتتىڭىز. ال بۇگىندە باسقا ەلدەردە مۇنىڭ دەڭگەيى قانداي؟ ماسەلەن، وزبەكستاندا، رەسەيدە. نەگە باسقا ەلدەرمەن سالىستىرمايسىزدار؟ ءوزىمىزدى جۇباتاتىن اقپاراتتار تاۋىپ وتىرا بەرەمىز.

ءالي بەكتاەۆ، سەنات دەپۋتاتى

سەنات وتىرىسىندا سويلەگەن سوزىنەن ءۇزىندى

Abai.kz