اقتاۋدا ءوتىپ جاتقان سوتتا قىركۇيەكتىڭ 18-ءى كۇنى سۋديا ارالباي ناعاشىباەۆ ادۆوكاتتاردىڭ ءوتىنىشى قاناعاتتاندىرىلماعانىن، سوت جارىسسوزگە كوشەتەنىن حابارلادى. ادۆوكات جانار سۇندەتقاليەۆا ايىپتالۋشى ابلوۆاس جۇماەۆتىڭ اكەسىنىڭ قايتىس بولۋىنا بايلانىستى سوت وتىرىسىن كەيىنگە شەگەرۋدى سۇراعان. ايىپتالۋشىنىڭ ءوزى دە ءوزىن جايسىز سەزىنىپ تۇرعاندىقتان سوت وتىرىسىن كەيىنگە قالدىرۋدى سۇرادى. بىراق سۋديا ونىڭ ءسوزىن اياعىنا دەيىن تىڭداماستان پروكۋرورعا ءسوز بەردى.

ابلوۆاس جۇماەۆ 2018 جىلعى مامىردىڭ 11-ىندە سوت شەشىمىمەن قاماۋعا الىنعان. قدت قوزعالىسىنا قاتىسى بار دەگەن كۇدىككە 44 جاستاعى ابلوۆاس جۇماەۆتان وزگە 38 جاستاعى زايىبى ايگۇل اقبەرديەۆا مەن اقتاۋ تۇرعىنى جەڭىس بيسەنعازيەۆ تە ىلىنگەن. ولارعا قىلمىستىق كودەكستىڭ 179-بابىنىڭ 1-2 تارماعى بويىنشا (بيلىكتى باسىپ الۋعا شاقىرۋ - رەد.) قىلمىستىق ءىس قوزعالعان.

ناۋرىزدىڭ 13-ىندە استانا سوتى باس پروكۋراتۋرانىڭ ارىزى بويىنشا مۇحتار ءابليازوۆ باسقاراتىن قدت قوزعالىسىن "ەكسترەميستىك ۇيىم" دەپ تانىپ، قىزمەتىنە تىيىم سالعان.

Abai.kz