بۇگىندە قاي وڭىرگە بارسام دا، ماۋەلى بايتەرەكتەي بولعان شەجىرەلى  قارتتاردى ىزدەپ جان-جاعىما جالتاق­تاي­مىن. قازىر شاشىنا اق كىرىپ، كوپ جاساعان قاريالار بارشىلىق. بىراق  وراق اۋىزدى، شەشەن ءتىلدى اقساقالدى كورە الماي ءجۇرمىن. قازىرگى كەزدە ادام­داردا بەينەبىر قاربالاسۋ، جانتالاسۋ باسىمدىراق.

جاقىندا الماتىداعى قارتتار ۇيىندە بولدىم.  قارتتار ۇيىندە 300-دەن استام قارت مەكەن ەتەدى ەكەن. زەينەتكەر­لەردىڭ قوعامدىق ومىردەن وقشاۋلانىپ قالۋى ەلدەگى بارلىق قاريالاردىڭ با­سىن­داعى جاعداي. بايقاۋىمشا، مۇنداعى قارتتار­دىڭ ءالى دە قوعامعا بەرەرى بار، جاس ۇرپاق­قا ونەگە بولا الادى.   البەتتە، جاندارى جايساڭ قارتتاردىڭ تاعدىرى ارقيلى. دەگەنمەن، ولاردىڭ ومىردەن العان تاجىربيەلەرى مول. ەرتەڭگى كۇنگە دەگەن سەنىمدەرى بيىك. ولار ءاربىر اتقان تاڭعا شۇكىرشىلىك ايتىپ، اينالاسىنا جاقسىلىق پەن بەرەكە سىيلاۋعا تىرى­سادى. جاسى الپىستىڭ ورتا بەلىنەن اسسا دا ءالى مىعىم، ءوزىن شيراق ۇستايتىن قارتتار بار ەكەن. سولاردى ۇيىمداس­تىرىپ، اۋىلدارعا جىبەرسە دەگەن وي كەلەدى. قازىر اۋىلداعى ادامدار اعاش وتىرعىزىپ، باۋ-باقشا ەگۋدەن قالدى. ءۇيىنىڭ ىرگەسىندەگى جەر بوس جاتىر. قول قۋسىرىپ قاراپ وتىرۋدى ءجون كورمەيتىن  قاريالار بىرلەسىپ اۋىل­­دارعا بارىپ، بوس جاتقان جەردى يگەرىپ، باقشا باپتاۋ ىسىنە كىرىسسە. ءسويتىپ،  تابيعي تازا ءونىمنىڭ قىزىعىن دا وزدەرى كورەر ەدى. بۇل ۇسىنىستى اۋىل­داعى ادامدار دا قۇپتاپ وتىر. «ەڭكەي­گەننىڭ ەڭسەسىن ەڭبەك كوتەرەدى» دەمەكشى، اۋىل حالقىنىڭ باۋ-باقشا ەگىپ، نەسى­بەسىن مولايتۋعا ىنتاسى اۋعان. قا­ريالار دا ولاي بولسا دەنەمىزدىڭ،  بار­لىعى قوزعالىپ، ءارى دەنساۋ­لىققا پايدالى بولار ەدى دەپ وتىر. ادام بالاسى ەڭبەك ەتۋى ءتيىس. جۇمىستان ەش ۋاقىتتا قول ۇزبەۋ كەرەك.

الماتىدا 222 مىڭ زەينەتكەر تۇرادى ەكەن. جاسى كەلگەن ادامدار زەينەتاقى­مەن شەكتەلمەۋى ءتيىس. ولار وزدەرىنىڭ قوعامعا قاجەت ەكەنىن سەزىنگەنى ءجون. بۇل رەتتە الماتىدا ەگدە جاستاعى ازامات­تارعا ارنالعان «بەلسەندى ۇزاق ءومىر» ورتالىعى اشىلدى. زەينەتكەرلەردىڭ بوس ۋاقىتىن ءتيىمدى وتكىزۋگە ارنالعان مەكە­مەدە كىتاپحانا، كومپيۋتەر كابينەتى، يوگا، اەروبيكامەن اينالىسۋ ءۇشىن جابدىقتالعان فيتنەس زال، كينو كورىپ، كونتسەرت تاماشالايتىن، شاحمات، توعىز­قۇمالاق، دومينو وينايتىن، توقىما توقيتىن ارنايى زالدار بار. جاڭا ورتا­لىق ەگدە جاستاعى ازاماتتاردى قولداۋ­عا، بەلسەندى ءومىر سۇرۋگە جاعداي جاساۋعا ارنالعان قالالىق «بەلسەندى ۇزاق ءومىر» جول كارتاسىنىڭ اياسىندا اشىلدى. الماتىدا ەگدە جاستاعى جانداردىڭ سانى قالا تۇرعىندارىنىڭ 12 پايىزىن قۇرايدى. بەلسەندى ۇزاق ءومىر ورتالى­عىندا ەگدە جاستاعى جاندارعا كومپيۋ­تەرلىك ساۋات اشۋ، سمارتفونمەن جۇمىس ىستەۋدى مەڭگەرۋ، اعىلشىن ءتىلى ۇيرە­تىلەدى. الەۋمەتتىك-قوعامدىق بىرلەستىك­تەردىڭ ماماندارى اپتا سايىن تەگىن قۇقىقتىق، پسيحولوگيالىق، مەديتسينا­لىق كەڭەستەر بەرەدى. زەينەتكەرلەرگە موتيۆاتسيالىق سەمينارلار مەن شەبەر­لىك سىنىپتارى ۇيىمداستىرى­لادى. الداعى ۋاقىتتا Ata-اpa.kz ينتەرنەت پورتالى جۇمىس ىستەيتىن بولادى. مۇندا ەگدە جاندار ءۇشىن قاجەت الەۋمەتتىك جانە مەملەكەتتىك باعدارلامالار تۋرا­لى اقپاراتتار، ارنايى ەڭبەك بيرجاسى تۋرالى مالىمەتتەر بەرىلەدى.

تولەۋبەك مۇقاشەۆ 

قر پار­لامەنتى سەناتىنىڭ دەپۋ­تاتى

Abai.kz