قوعامدىق دامۋ ۆيتسە-ءمينيسترى بەرىك ارىن «ءدىني ەكسترەميزم مەن تەرروريزمنىڭ الدىن الۋ ماسەلەلەرىندە قوعامدىق ينستيتۋتتاردىڭ ءرولى» تاقىرىبىنداعى رەسپۋبليكالىق كونفەرەنتسيا بارىسىندا ءدىني ەكسترەميزم مەن تەرروريزمنىڭ الدىن الۋ جۇمىستارىندا ءدىني بىرلەستىكتەرگە ۇلكەن ءۇمىت ارتىلاتىنىن مالىمدەدى.

ۆيتسە-ءمينيستردىڭ ايتۋىنشا، ەكسترەميستىك يدەيالاردىڭ تارالۋىنا ساراپشى قاۋىمداستىقتىڭ، عىلىم جانە شىعارماشىلىق، بۇقارالىق اقپارات قۇرالدارى وكىلدەرىنىڭ ينتەللەكتۋالدى تۇردە قارسى تۇرۋى ماڭىزدى. گۋمانيتارلىق سالاداعى عالىمداردىڭ، ءدىنتانۋشىلاردىڭ جانە رەسمي ءدىن قىزمەتكەرلەرىنىڭ كۇش-جىگەرى ارقاسىندا ەكسترەميستەر مەن تەرروريستەردىڭ تەرىس يدەولوگياسىن انىقتاپ، وسىنداي يدەيالاردى، ءدىني ىلىمدەردى  تاراتۋشىلاردىڭ زاڭعا قايشى ارەكەتتەرى ايقىن كورسەتىلۋى ءتيىس.

«ءبىز اتالعان جۇمىستاردى جۇزەگە اسىرۋدا  ەلدەگى رەسمي تىركەلگەن ءدىني بىرلەستىكتەردى، ەڭ الدىمەن ءبىزدىڭ قوعامىمىزدىڭ رۋحاني دامۋىنىڭ پروبلەمالارىن شەشۋدە ماڭىزدى ءرول اتقارىپ كەلە جاتقان ءداستۇرلى ءدىني بىرلەستىكتەردى سەنىمدى سەرىكتەستەر رەتىندە ساناپ، ولارعا ۇلكەن ءۇمىت ارتامىز.  بىز ىنتىماقتاستىق اياسىندا قازاقستان مۇسىلماندارى ءدىني باسقارماسىمەن جانە ورىس پراۆوسلاۆ شىركەۋىمەن مەموراندۋمعا قول قويدىق»، - دەدى بەرىك ارىن.

ءدىني ەكسترەميزم مەن تەرروريزمنىڭ الدىن الۋ بويىنشا جۇمىستار ۇكىمەتتىك ەمەس ۇيىمداردىڭ قاتىسۋىمەن ىسكە اسىرىلۋدا.  ايماقتىق كونسۋلتاتسيالىق ورتالىقتار جەلىسى قۇرىلدى. ورتالىقتار ءدىن ماسەلەلەرى تۋرالى كەڭەس بەرەدى. ولاردىڭ قىزمەتكەرلەرى دەسترۋكتيۆتى ءدىني اعىمداردىڭ كوشباسشىلارى جانە بەلسەندىلەرىمەن جەكە كەزدەسۋلەر وتكىزەدى. بۇدان بولەك، قۇقىق قورعاۋ ورگاندارى مەن اكىمدىكتەردىڭ قىزمەتكەرلەرىنە ارنالعان دارىستەر مەن سەمينارلار ۇيىمداستىرىلادى.

«تەرروريزمگە قارسى كوميتەت» رەسپۋبليكالىق قوعامدىق بىرلەستىگى،  «ءدىنتانۋشىلار كونگرەسى» قوعامدىق ۇيىمى،  «ءدىن ماسەلەلەرىن زەرتتەۋ ورتالىقتارىنىڭ قاۋىمداستىعى» قوعامدىق ۇيىمى، «ۋاقىپ» ققق، «اقنيەت اقپاراتتىق-ءتۇسىندىرۋ جانە بەيىمدەۋ ورتالىعى» قوعامدىق قورىمەن جانە ت.ب ۇكىمەتتىك ەمەس ۇيىمدارمەن بەلسەندى ىنتىماقتاستىق ورناعان. تۇتاستاي العاندا مينيسترلىك اتالعان باعىت بويىنشا 29 ۇكىمەتتىك ەمەس ۇيىممەن بىرلەسىپ جۇمىس ىستەيدى.

ايتا كەتەيىك، كونفەرەنتسياعا مۇددەلى مەملەكەتتىك ورگانداردىڭ، قوعامدىق جانە ءدىني بىرلەستىكتەردىڭ وكىلدەرى، قر پارلامەنتىنىڭ وكىلدەرى، ءدىنتانۋشىلار مەن ساراپشىلار قاتىسىپ، تۇرعىندار اراسىندا، سونىڭ ىشىندە جاستار اراسىندا ءدىني ەكسترەميزم مەن تەرروريزمنىڭ الدىن الۋعا باعىتتالعان جۇمىستاردى جەتىلدىرۋ جونىندە ءوز ۇسىنىستارىن ورتاعا سالدى.

نۇرگەلدى ابدىعانيۇلى

Abai.kz