ماجىلىستە ۆيتسە-سپيكەر گۇلميرا يسيمباەۆانىڭ توراعالىق ەتۋىمەن ۇكىمەتتىك ساعات ءوتتى. وندا مادەنيەت جانە سپورت ءمينيسترى ارىستانبەك مۇحامەديۇلى ءتۋريزمنىڭ جاي-كۇيى تۋرالى جانە ونى قازاقستاندا دامىتۋ بويىنشا جۇرگىزىلىپ جاتقان جۇمىستار تۋرالى بايانداما جاسادى.

شارا بارىسىندا گ. يسيمباەۆا مەملەكەت باسشىسى ءوزىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا جانە سەسسيانى اشۋ كەزىندە ءتۋريزمنىڭ رولىنە ەرەكشە توقتالىپ، ۇكىمەتكە ەلىمىزدىڭ سىرتتان كەلۋ ءتۋريزمى مەن ىشكى ءتۋريزمىن دامىتۋدىڭ 2019 – 2023 جىلدارعا ارنالعان مەملەكەتتىك باعدارلاماسىن ازىرلەۋدى تاپسىرعاندىعىنا توقتالدى.

قازىرگى تاڭدا ەكونوميكانىڭ باسقا دا كوپشىلىك سەكتورلارىمەن سالىستىرعاندا تۋريزم يندۋسترياسىنىڭ مۋلتيپليكاتيۆتىك اسەرى بارىنشا كۇشتى. سوندىقتان دا الىس-جاقىن شەت ەلدەردىڭ كوپشىلىگى ەكونوميكالىق دامۋدى جەدەلدەتۋ قۇرالى رەتىندە ءدال وسى ءتۋريزمدى تاڭداپ وتىر، - دەدى، ۆيتسە-سپيكەر.

ءوز كەزەگىندە قوسىمشا بايانداما جاساعان ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى گۇلنار يكسانوۆا ەلىمىزدەگى تۋريزم سالاسىنىڭ پروبلەمالارىنا توقتالدى. اتاپ ايتقاندا، ءتۋريزمنىڭ الەمدىك رەيتينگىسىنىڭ تومەندىگى، ونىمدەر مەن قىزمەتتەردىڭ كوبىنە ستاندارتتار جۇيەسىنە سايكەس كەلمەۋى جانە ينفراقۇرىلىم نىساندارىنىڭ باسەكەگە قابىلەتسىزدىگى سياقتى تاعى باسقا دا ماسەلەلەردى كوتەردى. سونداي-اق، حالىقارالىق دەڭگەيدە قازاقستاننىڭ ايتارلىقتاي ارتتا قالىپ وتىرعاندىعىن، قازاقستانعا كەلەتىن تۋريستەردىڭ سانى ءازىربايجان، گرۋزيا ەلدەرىنە قاراعاندا تومەن ەكەندىگىن ايتتى.

ۇكىمەت ساعاتى بارىسىندا ءماجىلىس دەپۋتاتتارى بايانداماشى مەن وتىرىسقا شاقىرىلعان مەملەكەتتىك ورگاندار باسشىلارىنىڭ الدىنا بىرقاتار وزەكتى ماسەلەلەر قويدى.

جارىسسوزدە ءسوز سويلەگەن دەپۋتات ن. سابيليانوۆ ەلىمىزدىڭ تۋريزم سالاسىن دامىتۋ بارىسىندا جەرگىلىكتى حالىققا جاعداي جاساپ، ءوز ەلىمىزدە حالىقتىڭ جاقسى دەمالۋىن قامتاماسىز ەتۋ سياقتى ءبىرشاما ۇسىنىستار ايتسا، دەپۋتات وكسىكباەۆ ۇلتتىق ونىمدەردى برەندكە اينالدىرۋدى ۇسىندى.

وتىرىستى قورىتىندىلاعان ۆيتسە-سپيكەر ءبىرىنشى كەزەكتە باسەكەگە قابىلەتتى تۋريستىك سالانى قالىپتاستىرۋ مەن دامىتۋ – بۇل مەملەكەتتىك بيۋدجەتتىڭ كىرىس بولىگىن ۇلعايتۋ، ينۆەستيتسيالار اعىمى، جۇمىس ورىندارىنىڭ سانىن كوبەيتۋ، حالىقتىڭ دەنساۋلىعىن جاقسارتۋ، تاريحي-مادەني جانە تابيعي مۇرانى ساقتاۋ جانە ۇتىمدى پايدالانۋ ەسەبىنەن قازاقستاننىڭ الەۋمەتتىك-ەكونوميكالىق دامۋىن قامتاماسىز ەتە الاتىن ناقتى قۇرال بولىپ تابىلاتىنىن نەگىزگە الۋعا ءتيىسپىز، - دەدى.

سونىمەن قاتار، گ. يسيمباەۆا بۇگىنگى تالقىلاۋ بارىسىندا ايتىلعان پىكىرلەر مەن ۇسىنىستار، ۇكىمەت دايىنداپ جاتقان 2019-2023 جىلدارعا ارنالعان ءتۋريزمدى دامىتۋدىڭ مەملەكەتتىك باعدارلاماسى، سونداي-اق، جاقىندا پارلامەنتكە كەلىپ تۇسەتىن تۋريزم تۋرالى زاڭ جوباسىنىڭ قابىلدانۋى، ەڭ باستىسى – ەلباسىمىز نۇرسۇلتان ءابىشۇلى نازارباەۆتىڭ وسى ماڭىزدى سالاعا ۇدايى قامقورلىعى، پروبلەمالاردى شەشۋدىڭ جولدارىن كورسەتىپ بەرۋى تۋريزم سالاسىن ەكونوميكانى دامىتۋدىڭ تاعى ءبىر سەنىمدى تەتىگىنە اينالاتىنان سەنىم ءبىلدىردى.

ۇكىمەت ساعاتىنىڭ قورىتىندىسى بويىنشا مەملەكەتتىك ورگاندارعا تۋريزم سالاسىن دامىتۋ جونىندە ۇسىنىمدار ازىرلەندى.

Abai.kz