كەشە پارلامەنت دەپۋتتارىنىڭ بىرىككەن وتىرىسى بولىپ، «مەملەكەتتىك ءتىل تۋرالى زاڭ» جوباسى تالقىلاۋعا ءتۇستى. تالقىلاۋعا تۇسكەن زاڭ جوباسى تۋرالى رەداكتسيامىزعا پارلامەنت ءماجىلىسىنىڭ ءباسپاسوز ورتالىعى حابارلادى.

كەشە پارلامەنت دەپۋتتارىنىڭ بىرىككەن وتىرىسى بولىپ، «مەملەكەتتىك ءتىل تۋرالى زاڭ» جوباسى تالقىلاۋعا ءتۇستى. تالقىلاۋعا تۇسكەن زاڭ جوباسى تۋرالى رەداكتسيامىزعا پارلامەنت ءماجىلىسىنىڭ ءباسپاسوز ورتالىعى حابارلادى.

قوس پالاتانىڭ بىرىككەن وتىرسىن باسقارعان ءماجىلىس توراعاسى ورال مۇحامەتجانوۆ: «دەپۋتات مىرزالار، پارلامەنتتىڭ قاراۋىنا ءبىز كوپتەن كۇتكەن زاڭ جوباسى كەلىپ ءتۇستى. مەملەكەتتىك ءتىل تۋرالى زاڭدا ورىس ءتىلى ءوزىنىڭ رەسمي ستاتۋسىن جويادى»»، - دەپ باستادى ءسوزىن. سپيكەر پارلامەنت دەپۋتتارانىڭ ءبارى ەر-ازاماتتاردان عانا سايلانباعانىن، ولاردىڭ ورتاسىندا باحىت سىزدىكوۆا سياقتى كۆەنشى حانىمداردىڭ دا بارىن ەسكەرمەگەن سياقتى. سونىمەن قاتار «مەملەكەتتىك ءتىلدىڭ ايرىقشا مارتەبەسى تۋرالى» زاڭنىڭ جوباسىن نەحوروشوۆتار مەن سيمامباەۆتاردىڭ «كوپتەن كۇتىپ جۇرمەگەنىن» دە ەسكەرمەگەنگە ۇقسايدى. دەگەندەي-اق، سەناتور سيمامباەۆ: «ەلىمىزدە ۇلكەن ساياسي ناۋقان ءوتىپ جاتىر. اناۋ-مىناۋ ەمەس، پرەزيدەنت سايلاۋى. سايلاۋ ءوتىپ بولسىن. سودان كەيىن دە كورەلىك. ونىڭ ۇستىنە، اتالعان زاڭدى قابىلداۋعا ءبىزدىڭ قوعام دايىن با؟! اۋەلى سونى بىلەيىك. مىسالى، سولتۇستىك قازاقستان حالقىنا وسى زاڭ كەرەك پە؟ ەگەر بۇل زاڭ جوباسى قابىلدانىپ كەتسە، ولاردىڭ قۇقى تاپتالماي ما؟»،- دەپ شىعا كەلدى. سيمامباەۆ رەسمي تىلدە سايراي جونەلگەندە شىتىنا قالعان ورال بايعونىسۇلى ادەتتەگى ۇستامدىلىعىنان شەت كەتىپ، ۇستەلدى سۇق ساۋساعىمەن شەرتىپ قالدى دا: «مەملەكەتتىك ءتىلدىڭ مارتەبەسى جونىندە ماسەلە قوزعالسا ءبىتتى، نەگە وسى كەرباعا بەرەمىز؟ ەلباسىمىز 2005 جىلدىڭ كۇزىندە  «ايۋ دا ءتىل ۇيرەنەتىن ۋاقىت بولدى ەمەس پە؟» دەگەن ەدى عوي؟ جۇرت شەشىمىن سارىلا توسىپ جۇرگەن جايتتى ەندى سوزباقتاي بەرگەنىمىز ءجون ەمەس!»، - دەدى.

حابارلاماعا سۇيەنسەك، دەپۋتتاردىڭ 65 پايىزى زاڭ جوباسىن قۇپتاپ داۋىس بەرگەن كورىنەدى. 30 پايىزى قارسى بولعان. 5 پايىزى قالىس قالىپتى. قارسى بولعانداردىڭ قاتارىنان تابىلعان سوۆەت ارمياسىنىڭ قۇرىلعان كۇنى ارىپتەستەرىن قۇتتىقتاۋدان تانبايتىن تاڭىربەرگەن بەردىوڭعاروۆ تا: «بۇل نە قىلعان اسىعىستىق؟ مەن سيمامباەۆتىڭ پىكىرىنە قوسىلامىن. سايلاۋ ءوتسىن، سودان سوڭ كورەلىك. الدە زاڭدى قابىلداماساق، قازاقتار پرەزيدەنت سايلاۋىنا كەلمەي قويادى نەمەسە قارسى داۋىس بەرەدى دەپ قورقاسىزدار ما؟»، - دەگەن ءۋاج ايتتى. وسى كەزدە بەردىوڭعاروۆقا شانشىلا قاراپ «سەن ءوزى نە ايتىپ وتىرسىڭ؟» دەپ ءسوز العان ەلجاندى دەپۋتات بەكبولات تىلەۋحان رەسەي فەدەراتسياسىنىڭ وزىندە مەملەكەتتىك ءتىلدىڭ ءبىر عانا ءتىل  ورىس ءتىلى ەكەنىن ايتا كەلىپ فەدەراتسيا قۇرامىنداعى حالىقتار تاعدىرىنان، يۋنەسكو-نىڭ الەم تىلدەرى تۋرالى ەسەبىنەن كوپتەگەن مىسالدار كەلتىردى. «تمد ەلدەرىنىڭ بارىندە  ورىس دياسپوراسى ، تۋراسىنا كوشسەك، سلاۆيان ءتىلدى ۇلت وكىلدەرى ءومىر سۇرۋدە. بىراق سول دياسپورا وكىلدەرى جەرگىلىكتى ۇلتتىڭ تىلىندە سويلەپ تاتۋ-ءتاتتى تىرلىك قۇرىپ جاتىر.  بىزدە دە سولاي. قازاقستاندا ءتىل ماسەلەسىنە  ساياسي استار تاڭىپ كۇردەلەندىرىپ وتىرعان ءبىزبىز، مەنىڭ سيمامباەۆ سياقتى ارىپتەستەرىم»،- دەپ رەنىشىن جاسىرا المادى. تىلەۋحان مىرزانىڭ پىكىرىن جاراسباي سۇلەيمەنوۆ، نۇرتاي سابيليانوۆ، مۇرات ابەنوۆ باستاعان دەپۋتتار جارىسا قولداپ باقتى. ەكى جاقتى پىكىردى تىڭداپ، داۋىسقا سالعان سوڭ قايتادان ءسوز العان ءماجىلىس توراعاسى  ورال مۇحامەتجانوۆ: «كوپشىلىك داۋىس مەملەكەتتىك ءتىل جاعىندا. دەموكراتيا دەگەنىمىز  وسى. زاڭ جوباسى پرەزيدەنتتىڭ قول قويۋىنا جىبەرىلەدى. سونىمەن، مەملەكەتتىك ءتىل تۋرالى ءسوز وسىمەن ءتامام»،- دەدى.

ر.S. بۇگىن پارلامەنتتىڭ سۋىرتپاسىنا «ءدىن تۋرالى زاڭنىڭ» جوباسى مەن «ءىرى كەن ورىندارىنا مەملەكەتتىك باقىلاۋ تۋرالى» زاڭنىڭ جوباسى كەلىپ ءتۇستى.