سەزد حاتشىلىعىنىڭ باسشىسى قاسىم-جومارت توقاەۆ الەمدىك جانە ءداستۇرلى دىندەر ليدەرلەرى سەزىنىڭ اياسىندا بۇۇ وركەنيەتتەر اليانسىنىڭ جوعارى وكىلى ناسير ابدۋلازيز ءال-ناسەرمەن كەزدەستى. سەنات توراعاسى وسى جىلدىڭ ءساۋىر ايىندا بۇۇ قاۋىپسىزدىك كەڭەسىندەگى ارريا فورمۋلاسى بويىنشا كەزدەسۋ وتكىزۋ كەزىندە قولداۋ كورسەتكەنى ءۇشىن بۇۇ باس حاتشىسىنىڭ ارناۋلى وكىلىنە العىس ءبىلدىردى. اتالعان كەزدەسۋ اياسىندا سەزد ماقساتتارى مەن تۇجىرىمداماسىنىڭ تانىستىرىلىمى وتكەن بولاتىن.

ق.توقاەۆ قازىرگى ۇيىم نەگىزىندە كونفەسسيالار مەن وركەنيەتتەر ۇنقاتىسۋى جونىندەگى پرەزيدەنت ن.نازارباەۆتىڭ ورتالىعى قۇرىلاتىنى تۋرالى حاباردار ەتتى. جوسپارلانىپ وتىرعانداي، ورتالىق الەمدىك جانە ءداستۇرلى دىندەر ليدەرلەرى سەزىنىڭ ماقساتتارى مەن مىندەتتەرىن حالىقارالىق ارەنادا ىلگەرىلەتۋ جانە فورۋمدى ينستيتۋتتاندىرۋ ىسىندە ماڭىزدى قۇرال بولماقشى.

ن.ال-ناسەر بۇل باستامانى قولدايتىنىن، سونداي-اق «ۇنقاتىسۋدان اينىماۋ: الدىن-الۋ شارالارى جانە بەيبىتشىلىكتى قولداۋ جولىنداعى ارىپتەستىك» تاقىرىبى بويىنشا قاراشا ايىندا نيۋ-يوركتە وتەتىن وركەنيەتتەر اليانسىنىڭ جاھاندىق فورۋمىنا دايىندىق بارىسى تۋرالى ايتتى.

كيەلى تاقتىڭ دىنارالىق ۇنقاتىسۋ جونىندەگى پاپا كەڭەسىندەگى يسلاممەن بايلانىس ءبولىمىنىڭ مەڭگەرۋشىسى مونسەنور حالەد اكاشەمەن اڭگىمە بارىسىندا ق.توقاەۆ ريم-كاتوليك شىركەۋىنىڭ بەيبىتشىلىك پەن ىنتىماقتى قولداۋ جانە وركەنيەتتەر مەن دىندەر اراسىنداعى ديالوگتى دامىتۋ قىزمەتىن جوعارى باعالاپ، استانادا ءوتىپ جاتقان فورۋمعا قولداۋ كورسەتكەنى ءۇشىن العىس ءبىلدىردى.

ق.توقاەۆتىڭ پىكىرىنشە، «قازاقستان مەن ۆاتيكان اراسىنداعى قارىم-قاتىناس ءوزارا تۇسىنىستىك پەن سەنىمگە نەگىزدەلگەن سىندارلى ءىس-قيمىلدىڭ ۇلگىسى بولىپ تابىلادى».

سەنات توراعاسى قازاقستاندىق كاتوليكتەردىڭ ەلىمىزدەگى بەيبىتشىلىك پەن كەلىسىمدى نىعايتۋعا قوسقان ۇلەسىن اتاپ ءوتتى.

ح.اكاشە الداعى ۋاقىتتا قۇرىلاتىن كونفەسسيالار مەن وركەنيەتتەر اراسىنداعى ۇنقاتىسۋ جونىندەگى پرەزيدەنت ن.نازارباەۆتىڭ ورتالىعىنىڭ قىزمەتىنە ىقىلاس ءبىلدىرىپ، ۆاتيكاننىڭ الەمدىك جانە ءداستۇرلى دىندەر ليدەرلەرى سەزىنىڭ ىزگى باستامالارىن تولىعىمەن قولدايتىنىن جەتكىزدى.

Abai.kz