جاقىن ارادا الماتىنىڭ قوعامدىق كولىكتەرى 86 پايىزعا جاڭارادى. سونداي-اق، جۇرگىزۋشىلەرگە بىرىڭعاي ايلىق جالاقى مەن ورتاق كيىم ۇلگىسى ەنگىزىلمەك. بۇل تۋرالى "Almaty.tv" تەلەارناسى حابارلايدى. 

ەندى اۆتوبۋس تىزگىنىندەگىلەرگە بىرىڭعاي جالاقى بەرىلەدى. ولار 180 مىڭنان باستاپ 250 مىڭ تەڭگە ارالىعىندا ايلىق الادى.

جۇرگىزۋشىلەر جولاۋشىلارعا قىزمەت كورسەتۋدى جاقسارتىپ قانا قويماي، كۇندەلىكتى جۇمىسقا كيەتىن كيىمىن دە تۇبەگەيلى وزگەرتەدى. بۇدان بىلاي قالاداعى بارلىق قوعامدىق كولىك جۇرگىزۋشىلەرى بىرىڭعاي كوكشىل ءتۇستى فورما كيەدى. ولارعا شەتەلدىڭ تاجىريبەسى نەگىزىندە 4 مەزگىلگە ساي كومپلەكت بەرىلەدى. ماسەلەن، جۇرگىزۋشىلەر قىستا جىلى كۇرتەشە كيسە، جازدا ولارعا فۋتبولكا مەن كەپكا تاراتىلادى. ءبىر جۇرگىزۋشىنىڭ كيىم جيىنتىعى 40 مىڭ تەڭگە تۇرادى.

قازاننىڭ سوڭىنا دەيىن بارلىق اۆتوبۋس جۇرگىزۋشىسى اتتەستاتسيا وتەدى. قالاداعى  2500 جۇرگىزۋشى وسى ايدىڭ سوڭىنا دەيىن تەست تاپسىرىپ، حالىقپەن جۇمىس ىستەي الاتىنىن دالەلدەۋى ءتيىس. ەڭ اۋەلى، جۇرگىزۋشىلەردىڭ جول ەرەجەسىن قانشالىقتى جەتىك بىلەتىنى قاداعالانادى. كەيىن، پسيحولوگيالىق ساۋالدارعا جاۋاپ بەرەدى. مۇنىڭ بارلىعىنا 50 مينۋت ۋاقىت بەرىلەدى.

"بارلىعى 40 سۇراق، ونىڭ 3-4 پسيحولوگيالىق، ياعني جۇرگىزۋشى ستەرسستىك جاعدايلاردان قالاي شىعاتىنى تەكسەرىلەدى. سەبەبى ءار ءتۇرلى جولاۋشى بولادى. ماس، اشۋشاڭ سەكىلدى جولاۋشىلارعا جۇرگىزۋشى قالاي جاۋاپ بەرەتىنىن باقىلايمىز", - دەدى الماتى كولىك بىلىكتىلىك ورتالىعىنىڭ اتقارۋشى ديرەكتورى ساكەن ورمانبەكوۆ.

تەست ناتيجەلەرى اۆتوپارك يەلەرىنە تاپسىرىلادى. ءساتتى تاپسىرعان جۇرگىزۋشىلەرگە سەرتيفيكات بەرىلەدى. ال اتتەستاتسيانى تاپسىرا الماعاندار دايارلىق كۋرسىنان وتەدى. اۆتوبۋس تىزگىنشىلەرىن قايتا دايارلاۋ ءۇشىن 40 ساعات كولەمىندە وقىتۋ كوزدەلىپ وتىر. وقۋ اقىسى تاسىمالداۋشى كومپانيا مەن الەۋمەتتىك باعدارلامالار باسقارماسى ەسەبىنەن تولەنەدى.

"قازىر قالادا جولاۋشىلاردى تاسىمالداۋعا كۇن سايىن 1560 قوعامدىق كولىك جولعا شىقسا، ونىڭ 479 بىلتىر جاڭارعان. بيىل 719 اۆتوبۋستى زاماناۋي ۇلگىدەگى جايلىسىنا الماستىرۋ كوزدەلىپ وتىر. ءسويتىپ، جىل سوڭىنا دەيىن مەگاپوليستىڭ اۆتوبۋس پاركى 86 پايىزعا جاڭارادى. بۇل البەتتە، كولىكتەردىڭ ءجۇرۋ جيىلىگىن جىلدامداتىپ، جولاۋشىلاردىڭ ۋاقىتتارىن ۇنەمدەيدى", - دەدى "الماتىەلەكتروترانس" جشس ديرەكتورى ريزۆان تسيناەۆ.

تاعى ءبىر وزگەرىس، ەندى  تۇرعىنداردى ۇرىلاردان ساقتاۋ ءۇشىن، ولاردىڭ ءتۇر-الپەتى اشىق جاريالانادى. قازىر بوستاندىقتا جۇرگەن ۇرىلاردىڭ سۋرەتى قوعامدىق كولىكتەرگە قىستىرىلماق.

"جىل باسىنان باستاپ 350 ۇرلىقشى ۇستالدى. ولار 411 قىلمىس جاساعان. قازىرگى ۋاقىتتا بوستاندىقتا جۇرگەن ۇرلىقشىلاردىڭ سۋرەتتەرى ەندى ءاربىر قوعامدىق كولىكتەردە كورسەتىلەتىن بولادى. بۇل بىرىنشىدەن، ۇرلىقتىڭ الدىن-الۋ شارالارى بولىپ تابىلادى. اتالعان ۇرلىقتاردىڭ الدىن الۋ ماقساتىندا بۇكىل الماتىنىڭ قوعامدىق كولىكتەرىندە بەينەكامەرالار ورناتىلادى", – دەدى الماتى قالاسى ءىىد جەرگىلىكتى پوليتسيا قىزمەتى باسشىسىنىڭ مىندەتىن اتقارۋشى تورەحان يسين.

Abai.kz