سۋرەتتە تالانتتى قىزىمىز ادينا ماناتبەكوۆا

جۋىردا رەسەيدىڭ روسسيا-1 ارناسىنداعى «ۋديۆيتەلنىە ليۋدي» تەلەشوۋىندا جەرلەسىمىز ادينا ماناتبەكوۆا 35 سەكۋندتا 18 بەت وقىپ، كورەرمەندەر مەن قازىلار القاسىن تاڭقالدىردى. ول وقىپ قانا قويماي، سول وقىعانىنىڭ مازمۇنىن قازىلارعا ايتىپ تا بەرگەن. ونىڭ ەرەكشە قابىلەتى الەۋمەتتىك جەلىدە دە كەڭىنەن تارالدى.

جالپى، قازىرگى قازاق بالالارىنىڭ ىشىندە عىلىم-بىلىمگە، جاڭا تەحنولوگيالاردى مەڭگەرۋگە قۇشتار بالالار وتە كوپ. وسىدان ءبىراز ۋاقىت بۇرىن اقتاۋلىق ورىنگۇل ارىستان ەسىمدى وقۋشى دا الەمنىڭ تۇكپىر-تۇكپىرىنەن كەلگەن 150 زياتكەر وقۋشىلارمەن بىرگە 30 مىڭ ەسەپتى نەبارى 26 مينۋت 26 سەكۋندتا شىعارىپ، ەلدى سۇيسىنتكەن ەدى. سونىمەن قاتار، ورىنگۇل  2, 3 تاڭبالى ەسەپتەردى كالكۋلياتوردان دا تەز ەسەپتەپ، ءار ەسەپكە بار بولعانى 2 جارىم سەكۋند جۇمسايتىنىن ايتقان.

ال، 12 جاسىندا قبتۋ دىڭ ستۋدەنتى اتانعان ابزال مىرزاش تا كوپشىلىككە كەڭىنەن تانىمال. ول ءوزى قۇراستىرعان جاڭا ءالىپبي نۇسقاسىن ۇسىنىپ، ونىڭ كومپيۋتەرگە لايىقتالعان باعدارلاماسىن جاساپ شىققان بولاتىن.

تاعى ءبىر تالانتتى بالا ءنۇرالى بەيسەقوجا. ول دەنيس تەننىڭ قازاسىن ەستىگەن سوڭ، وعان ارناپ مۋزىكالىق شىعارما جازعان ەدى. ول دا نەبارى 12 جاستا. 4 جاسىنان باستاپ فورتەپيانودا ويناي باستاعان ونى ەڭ جاس كومپوزيتور دەپ تە اتاپ ءجۇر.

بۇدان بولەك سپورتتا، ونەردە، باسقا دا پاندىك وليمپيادالاردا توپ جارىپ جۇرگەن كىشكەنتاي تالانتتار از ەمەس. جانە ونداي دارىندار اۋىلدا دا جەتكىلىكتى.  تەك ولاردى تانىپ، ناسيحاتتاي ءبىلۋ كەرەك.

ءبىز ەلىمىزدىڭ دامۋ باعىتىن كوبىنە وتكەنىمىزدەن ىزدەپ جاتامىز. ءسويتىپ، تاريحتى قازبالاۋدان جالىقپايمىز. ال، بولاشاق دەگەن ءبىزدىڭ وتكەنىمىز ەمەس، كەلەر ۋاقىت ەكەنىن ەسكەرسەك، سول كەلەشەكتى بۇگىننەن باستاپ قولداۋعا ءتيىسپىز.

قورىتا كەلگەندە، تاريحتى قازبالاعاننان تۇك شىقپايدى. ودان دا، "بۇلاق كورسەڭ، كوزىن اش" دەگەن اتا-بابا ناقىلىن باستى باعدار ەتۋ كەرەك. “جاس بالا انادان تۋعاندا ەكى ءتۇرلى مىنەزبەن تۋادى", - دەيدى اباي 7 -قاراسوزىندە. "بىرەۋى - ىشسەم، جەسەم، ۇيىقتاسام دەيدى. بۇلار ءتاننىڭ قۇمارى. ال بىرەۋى; بىلسەم، كورسەم، تانىسام ەكەن دەيدى. كوزى كورگەن، قۇلاعى ەستىگەننىڭ ءبارىن سۇراپ، تىنىشتىق كورمەيدى. بۇلار جاننىڭ قۇمارى".

ەندەشە، اباي ايتقان سول ەكى مىنەزدى جاقسى جاققا تاربيەلەۋ اتا-انانىڭ پارىزى. ال، “اقىل، عىلىم، جۇرەكتى بىردەي ۇستاعان” وسكىندەر اتانىڭ عانا ەمەس ادامنىڭ بالاسى بولاتىنى اقيقات.

نۇربيكە بەكسۇلتانقىزى

Abai.kz